ଭୁବନେଶ୍ୱର/ବାରଙ୍ଗ,୯।୫(ବ୍ୟୁରୋ/ଡି.ଏନ୍.ଏ.): ଖୋର୍ଦ୍ଧା ଜିଲା ଚନ୍ଦକା ଥାନା ଅର୍ନ୍ତଗତ ଗିରିଙ୍ଗାପୁଟ ଗ୍ରାମରେ ହନୁମାଙ୍କଡ ଆକ୍ରମଣରେ ଶୁକ୍ରବାର ଜଣେ ବିଧବା ମହିଳାଙ୍କର ମୃତ୍ୟୁ ଘଟିଥିଲା। ସେ ହେଲେ କଅଁଳ ମାଝୀ। ତେବେ ଆକ୍ରମଣ କରିଥିବା ମାଙ୍କଡ଼କୁ ଶନିବାର ଟ୍ରାଙ୍କୁଲାଇଜ କରି ଧରାଯାଇଛି।
ପ୍ରକାଶ ଯେ, କଅଁଳ କାମସାରି ଘରକୁ ଫେରୁଥିବା ବେଳେ ଗ୍ରାମମୁଣ୍ଡ ଶନି ମନ୍ଦିର ନିକଟ ଗଛରେ ଥିବା ହନୁମାଙ୍କଡ ତାଙ୍କ ଉପରକୁ ଡେଇଁପଡିଥିଲା। ତାଙ୍କୁ କାମୁଡି କ୍ଷତାକ୍ତ କରିଥିଲା। ଫଳରେ କଅଁଳ ତଳେ ପଡିଯିବାରୁ ରାସ୍ତାକଡ଼ରେ ଥିବା ପଥରରେ ମୁଣ୍ଡଟି ସକ୍ତ ଆଘାତ ହୋଇ ପ୍ରବଳ ରକ୍ତଶ୍ରାବ ହୋଇଥିଲା। ସ୍ଥାନୀୟ କେତେକ ଯୁବକ ଏହା ଦେଖି ମାଙ୍କଡ଼କୁ ଗୋଡ଼ାଇବାରୁ ସେ ପଳାଇଯାଇଥିଲା। ପରିବାର ଲୋକ ପୋଲିସକୁ ଖବର ଦେବା ସହ ଚିକିତ୍ସା ପାଇଁ କଅଁଳକୁ କ୍ୟାପିଟାଲ ହସ୍ପିଟାଲକୁ ନେଇଥିଲେ। ତେବେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଚନ୍ଦକା ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ବେଳେ ଚନ୍ଦକା ବନବିଭାଗ କର୍ମଚାରୀମାନେ ଶନିବାର ସକାଳେ ଟ୍ରାଙ୍କୁଲାଇଜ କରି ମାଙ୍କଡ଼କୁ ଧରିଥିବା ଜଣାପଡିଛି।
