ପରଜଙ୍ଗ, ୭।୧(ଡି.ଏନ.ଏ.): ଢେଙ୍କାନାଳ ଜିଲା ପରଜଙ୍ଗ ଥାନା ମହାବିରୋଡ଼ ଫାଣ୍ଡି ଅଧୀନ ପଙ୍ଗାତିରା ଗ୍ରାମରେ ସୋମବାର ବିଳମ୍ବିତ ରାତିରେ ଏକ ହତ୍ୟାକାଣ୍ଡ ଘଟିଛି । ସ୍ବାମୀର ଟାଙ୍ଗିଆ ଚୋଟରେ ସ୍ତ୍ରୀର ମୃତ୍ୟୁ ହୋଇଥିବାବେଳେ ଶାଶୁ ଗୁରୁତର ଆହତ ହୋଇଛନ୍ତି। ସୂଚନାଯୋଗ୍ୟ, ଗତ କିଛିଦିନ ହେବ ସ୍ବାମୀ ଲଳିତ ସାହୁଙ୍କର ଅନ୍ୟ ଜଣେ ମହିଳା ସହ ପ୍ରେମ ସମ୍ପର୍କ ଗଢି ଉଠିଥିଲା। ଏହାକୁ କେନ୍ଦ୍ର କରି ସ୍ତ୍ରୀ-ସ୍ବାମୀଙ୍କ ମଧ୍ୟରେ ଘଟଣାଦିନ ସନ୍ଧ୍ୟାରେ ପାଟିତୁଣ୍ଡ ହୋଇଥିଲା। ଫଳରେ ସ୍ତ୍ରୀ ମିତା ସାହୁ (୩୦) ସେହି ଗ୍ରାମରେ ଥିବା ନିଜ ବାପଘର ଗ୍ରାମକୁ ଯାଇ ଥିଲେ। ତେବେ ସୋମବାର ବିଳମ୍ବିତ ରାତିରେ ନିଶାସକ୍ତ ଅବସ୍ଥାରେ ସ୍ବାମୀ ଲଳିତ ଶ୍ୱଶୁର ଘରେ ପହଞ୍ଚି କବାଟ ବାଡେଇବାରୁ ଶାଶୁ କବାଟ ଖୋଲିଥିଲେ। ସେହି ସମୟରେ ହାତରେ ଧରିଥିବା ଟାଙ୍ଗିଆରେ ଶାଶୁଙ୍କ ମୁଣ୍ଡକୁ ଆକ୍ରମଣ କରିଥିଲେ। ପରେ ସ୍ତ୍ରୀ ମିତା ଘରେ ଶୋଇଥିବାବେଳେ ତାଙ୍କୁ ଟାଙ୍ଗିଆରେ ହତ୍ୟା କରି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଘଟଣାସ୍ଥଳରେ ମହାବିରୋଡ଼ ଫାଣ୍ଡି ଅଧିକାରୀ ବିନୟ କୁମାର ସାହୁ ପହଞ୍ଚି ତଦନ୍ତ ଆରମ୍ଭ କରିବା ସହ ମିତାଙ୍କ ମୃତଦେହ ଜବତ କରିଛନ୍ତି। ଏହାସହ ଲଳିତଙ୍କ ଟାଙ୍ଗିଆ ଚୋଟରେ ଆହତ ହୋଇଥିବା ଶାଶୁ ଏବେ ଡାକ୍ତରଖଶନାରେ ଚିକିତ୍ସିତ ହେଉଛନ୍ତି। ଅଭିଯୁକ୍ତଙ୍କୁ ଧରିବାକୁ ପୋଲିସ ଚେଷ୍ଟା ଚଳାଇଛି।
