ଭୁବନେଶ୍ୱର,୭।୨(ବ୍ୟୁରେ): କେନ୍ଦ୍ରାପଡା ଜିଲା ମାର୍ଶାଘାଇରେ ସୂଚନା ଅଧିକାର କର୍ମୀ ରଞ୍ଜନ କୁମାର ଦାସଙ୍କ ହତ୍ୟା ଘଟଣାକୁ ଚପାଇ ଦେବାକୁ ଉଦ୍ୟମ ଚାଲିଛି। ରାଜନେତାଙ୍କ ଚାପରେ ସ୍ଥାନୀୟ ପୋଲିସ ଉପଯୁକ୍ତ ତଦନ୍ତ କରୁନାହିଁ ବୋଲି ଓଡିଶା ସୂଚନା ଅଧିକାର ଅଭିଯାନ ସଂଘ (ଓସା) ଅଭିଯୋଗ କରିଛି। ଘଟଣାର ଉଚ୍ଚସ୍ତରୀୟ ତଦନ୍ତ କରାଯାଇ ମୃତ ରଞ୍ଜନଙ୍କ ପରିବାରକୁ ନ୍ୟାୟ ଓ ସୁରକ୍ଷା ଯୋଗାଇ ଦେବାକୁ ଦାବି କରିଛି ସଂଘ। ଅପରପକ୍ଷରେ ଏକମାତ୍ର ରୋଜଗାରିଆ ପୁଅକୁ ହରାଇ ବୃଦ୍ଧ ମାତାପିତା ଅସହାୟ ହୋଇପଡିଛନ୍ତି। ମା ଶଯ୍ୟାଶାୟୀ ଓ ବାପା କାମ କରିବାକୁ ଅକ୍ଷମ। ତେଣୁ ସରକାର ୧୦ ଲକ୍ଷ ଟଙ୍କା ପ୍ରାଥମିକ କ୍ଷତିପୂରଣ ପ୍ରଦାନ ଲାଗି ଦାବି କରିଛନ୍ତି ସଂଘର ରାଜ୍ୟ ଆବାହକ ପ୍ରଦୀପ ପ୍ରଧାନ।
ଖବରଦାତା ସମ୍ମିଳନୀରେ ଉପସ୍ଥିତ ଥିବା ମାନବାଧିକାର କର୍ମୀ ଶ୍ରୀ ଅଖଣ୍ଡ, ସଂଯୁକ୍ତା ପାଣିଗ୍ରାହୀ, ରଞ୍ଜୁଲତା, ଜିତେନ୍ଦ୍ର ପ୍ରମୁଖ କହିଛନ୍ତି, ରଞ୍ଜନ ଓଡିଶା ସୂଚନା ଅଧିକାର ଅଭିଯାନର ଜଣେ ସକ୍ରିୟ ସଦସ୍ୟ ଓ କେନ୍ଦ୍ରାପଡା ଜିଲାର ଆବାହକ ଥିଲେ। ସୂଚନା ଅଧିକାର ଆଇନରେ ତଥ୍ୟ ମାଗି ରଞ୍ଜନ ସରକାରୀ ଯୋଜନାକୁ କ୍ରିୟାଶୀଳ ଓ ସ୍ବଚ୍ଛତା ଆଡକୁ ନେବାରେ ସହାୟତା କରୁଥିଲେ। ଅନେକ ଦୁର୍ନୀତି ଓ ଅନିୟମିତତାର ପର୍ଦ୍ଦାଫାଶ କରିଥିଲେ। ଭିତରକନିକାରେ ବେଆଇନ ନିର୍ମାଣ, ବେଆଇନ ଚିଙ୍ଗୁଡି ଘେରି ଆଦିକୁ ବିରୋଧ କରି ଆନ୍ଦୋଳନ ଜାରି ରଖିବା ସହ ଲୋକାୟୁକ୍ତଙ୍କ ନିକଟରେ କେସ୍ ମଧ୍ୟ ରୁଜୁ କରିଥିଲେ। କିନ୍ତୁ ସ୍ବାର୍ଥରେ ଆଞ୍ଚ ଆସିବାରୁ ରାଜନେତା, ପ୍ରଶାସନିକ ଅଧିକାରୀ ଓ ଅସାମଜିକ ଗୋଷ୍ଠୀ ତାଙ୍କୁ ହତ୍ୟା କରିଛନ୍ତି। ଜୀବନ ପ୍ରତି ବିପଦ ଥିବା ଦର୍ଶାଇ ଗତ ଡିସେମ୍ବର ୧୧ରେ ରଞ୍ଜନ ପାଟକୁରା ଥାନାରେ ଏକ ଏତଲା ଦେଇଥିଲେ। ପୋଲିସ ତୁରନ୍ତ ପଦକ୍ଷେପ ଗ୍ରହଣ ନ କରିବାରୁ ଗତ ୧ ତାରିଖରେ ତାଙ୍କୁ ହତ୍ୟା କରାଯାଇଥିବା ସେମାନେ ଅଭିଯୋଗ କରିଛନ୍ତି। ସେତେବେଳେ ମଧ୍ୟ ସ୍ଥାନୀୟ ଲୋକେ, ପରିବାର ଓ ସଂଘ ସଦସ୍ୟମାନେ ଏହାକୁ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ କରିଥିଲେ। ରଞ୍ଜନଙ୍କ ସମ୍ପର୍କୀୟ ବଳରାମ ଦାସଙ୍କ ଏତଲା ଅନୁସାରେ ପୋଲିସ କେସ୍ ନଂ.୨୪/୨୦୨୦ ରୁଜୁ କରି ମୃତଦେହକୁ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରିଥିଲା। ଘଟଣାର ୬ଦିନ ବିତିଯାଇଥିଲେ ମଧ୍ୟ ପୋଲିସ ଠିକ୍ ଭାବେ ତଦନ୍ତ ନ କରି ଚୁପ୍ ବସିଛି। ଏ ସଂକ୍ରାନ୍ତରେ ସଂଘ ଜାତୀୟ ଅନୁସୂଚିତ କମିଶନଙ୍କ ଦୃଷ୍ଟି ଆକର୍ଷଣ କରିବା ସହିତ ଏହି ସମ୍ବେଦନଶୀଳ ମାମଲାରେ ହସ୍ତକ୍ଷେପ କରିବାକୁ ନିବେଦନ କରିଥିବା ରାଜ୍ୟ ଆବାହକ ପ୍ରଦାନ କହିଛନ୍ତି।
