ଭଦ୍ରକ ଅଫିସ,୬।୧-ଭଦ୍ରକ ଷ୍ଟେଶନରୁ ସହରକୁ ପ୍ରବେଶ ପଥ ଚରମ୍ପା ଷ୍ଟେଶନ ଫିଡର ରୋଡ୍ରେ ଟ୍ରାଫିକ ଜାମ୍ ସମସ୍ୟା ଯୋଗୁ ଯାତ୍ରୀମାନେ ଦୈନିକ ହଇରାଣ ହେଉଛନ୍ତି। ରାସ୍ତା ଜାମ୍ ଯୋଗୁ ସାଧାରଣ ଲୋକେ ଚାଲି ଚାଲି ଯିବା ମଧ୍ୟ କଷ୍ଟକର ହୋଇପଡୁଛି। ଷ୍ଟେଶନ ଆରପାଖର ଲୋକେ ଭଦ୍ରକ ସହରକୁ ଆସିବା ପାଇଁ ନାନା ସମସ୍ୟା ଭୋଗୁଛନ୍ତି। ଏଭଳି ସ୍ଥିତିରେ ପ୍ରଶାସନ, ରେଳ କର୍ତ୍ତୃପକ୍ଷ ଓ ପୂର୍ତ୍ତବିଭାଗ ନୀରବଦ୍ରଷ୍ଟା ସାଜିଛନ୍ତି। ଏହି ସମସ୍ୟା ସମାଧାନ ଦିଗରେ କୌଣସି ପଦକ୍ଷେପ ନିଆଯାଉ ନ ଥିବା ଅଭିଯୋଗ ହେଉଛି।
ପ୍ରକାଶ ଯେ, ଭଦ୍ରକ ଷ୍ଟେଶନରେ ମାସର ପ୍ରାୟ ୧୫ଦିନ ସିମେଣ୍ଟ, ଗହମ ଓ ଚାଉଳ ଟ୍ରେନରୁ ଅନ୍ଲୋଡ ହୋଇ ଟ୍ରକ ଯୋଗେ ଗୋଦାମକୁ ସ୍ଥାନାନ୍ତର ହୁଏ। ଏଥିପାଇଁ ପ୍ରାୟ ୨ଶହରୁ ୩ଶହ ଟ୍ରକ ମାଲ ନେବା ପାଇଁ ନିୟୋଜିତ ହୋଇଥାଏ। ଫଳରେ ଟ୍ରାଫିକ ସମସ୍ୟା ସୃଷ୍ଟି ହୁଏ। ଚରମ୍ପା ଷ୍ଟେଶନ ରୋଡ୍ର ଓଭରବ୍ରିଜ ନିକଟରେ ଏହି ଦିନରେ ଟାଉନ ଥାନା ପୋଲିସ ଓ ଚରମ୍ପା ଫାଣ୍ଡି ଦ୍ୱାରା ଟ୍ରାଫିକ ନିୟନ୍ତ୍ରଣ ପାଇଁ ସ୍ବତନ୍ତ୍ର ପୋଲିସ ମୁତୟନ ରହିଥାନ୍ତି। ହେଲେ ସୀମିତ ପୋଲିସ ଟ୍ରାଫିକ ସମସ୍ୟାକୁ ନିୟନ୍ତ୍ରଣ କରିବା ପାଇଁ ବିଫଳ ହେଉଥିବା ଅଭିଯୋଗ ହୋଇଆସୁଛି। ପୂର୍ତ୍ତ ବିଭାଗ ଅଧୀନରେ ଥିବା ଏହି ରାସ୍ତାର ଉଭୟପାର୍ଶ୍ୱ ଜବରଦଖଲକାରୀଙ୍କ କବ୍ଜାରେ ରହିଥିବାରୁ ରାସ୍ତା ସମ୍ପ୍ରସାରଣ ହୋଇପାରୁ ନାହିଁ। ଏହାକୁ ନେଇ କୋର୍ଟ କଚେରି ପର୍ଯ୍ୟନ୍ତ ମାମଲା ଯାଉଛି। କିନ୍ତୁ ଏହାର କୌଣସି ବିକଳ୍ପ ପ୍ରତି ଷ୍ଟେଶନ କର୍ତ୍ତୃପକ୍ଷ ତତ୍ପର ହେଉନାହାନ୍ତି। ଟ୍ରାଫିକ୍ ସମସ୍ୟା ଯୋଗୁ ଯାତ୍ରୀମାନେ ଠିକ୍ ସମୟରେ ଷ୍ଟେଶନରେ ପହଞ୍ଚି ପାରୁ ନ ଥିବା କହୁଛନ୍ତି। ଅପରପକ୍ଷେ ଏହି ଟ୍ରାଫିକ ସମସ୍ୟା କାରଣରୁ ବାରମ୍ବାର ଦୁର୍ଘଟଣା ଘଟୁଥିବା ନଜିର ରହିଛି। ପ୍ରସ୍ତାବରେ ଅଟକିଥିବା ଶର୍ଟକଟ ରାସ୍ତାକୁ କାର୍ଯ୍ୟକ୍ଷମ କରାଇବା ସକାଶେ ପୂର୍ବତନ କାଉନସିଲର ଉର୍ମିଳା ଚୌଧୁରୀ, କାମେଶ୍ୱର ପରିଡା, ରଞ୍ଜନ ଜେନା, ବଟକୃଷ୍ଣ ରାଉତ, ସମାଜସେବୀ ଖଗେଶ୍ୱର ବାରିକ, ରାଜକିଶୋର ମିଶ୍ର, ରୋଟାରିଆନ ଶିଶିର ମିଶ୍ର ଓ ବିଜୁ ବିଶ୍ୱାଳ ପ୍ରମୁଖ ବହୁବାର ଦାବି କରିଆସିଥିବା ପ୍ରତିକ୍ରିୟା ରଖିଛନ୍ତି। ଅନ୍ୟପକ୍ଷେ ତାରିଣୀ ଲେଭଲ କ୍ରସିଂ ନିକଟରେ ଓଭରବ୍ରିଜ ନିର୍ମାଣ ଦାବିରେ କଂଗ୍ରେସ ପକ୍ଷରୁ ୩ ଥର ରେଳରୋକୋ କରାଯାଇଛି। ହେଲେ ଏଷ୍ଟିମେଟ କରାଯାଇ କାର୍ଯ୍ୟାରମ୍ଭ ଯୋଜନା କେବଳ ଯୋଜନାରେ ଅଟକିଛି। ଏ ସମ୍ପର୍କରେ ରେଲୱେ କର୍ତ୍ତୃପକ୍ଷ କହିଛନ୍ତି, ରାସ୍ତା ନିର୍ମାଣ କରିବା ରାଜ୍ୟ ସରକାରଙ୍କ ଦାୟିତ୍ୱ। ଏଣୁ ପୂର୍ତ୍ତ ବିଭାଗ ରାସ୍ତା ନିର୍ମାଣ କରିବ। ଏଥିରେ ରେଲୱେର କୌଣସି ଭୂମିକା ନାହିଁ। ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଶ୍ରୀନିବାସ ମଲ୍ଲିକଙ୍କୁ ପଚାରିବାରୁ ଶର୍ଟକଟ ରାସ୍ତା ନିର୍ମାଣ ପରିବର୍ତ୍ତେ ରେଲୱେ ଓଭରବ୍ରିଜ୍ କରାଯାଇ ଜାତୀୟ ରାଜପଥକୁ ଏକ ସ୍ବତନ୍ତ୍ର ରାସ୍ତା ଯୋଗେ ସଂଯୋଗ କରାଯିବା ପାଇଁ ଯୋଜନା ହୋଇ ଏଷ୍ଟିମେଟ୍ ତିଆରି ସରିଛି। ଟେଣ୍ଡର ପରେ କାର୍ଯ୍ୟ ଆରମ୍ଭ କରାଯିବ ବୋଲି କହିଛନ୍ତି।
