ବଡବିଲ, ୩୧ା୩ (ସ୍ବ.ପ୍ର.)-କରୋନା ଭୂତାଣୁ ସଂକ୍ରମଣ ରୋକିବା ନିମନ୍ତେ ସମସ୍ତ ରାଜ୍ୟ ସୀମାନ୍ତଗୁଡିକୁ ସିଲ୍ କରିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ଏହି ପରିପ୍ରେକ୍ଷୀରେ ଝାଡଖଣ୍ଡ ରାଜ୍ୟର ବଡଜାମଦା ପୋଲିସ ସୀମା ସିଲ୍ କରିବାକୁ ଯାଇ କେନ୍ଦୁଝର ଜିଲା ବଡବିଲ ପୌରାଞ୍ଚଳର ନାଲଦା ଅଞ୍ଚଳରେ ପଶି ଟେଣ୍ଟ ବାନ୍ଧିବାରୁ ବିବାଦ ଦେଖାଦେଇଛି। ସ୍ଥାନୀୟ ପ୍ରଶାସନିକ ଅଧିକାରୀ ଏହା ଜାଣିବା ପରେ ସୀମାନ୍ତରେ ପହଞ୍ଚି ଝାଡଖଣ୍ଡ ପୋଲିସ ଦ୍ୱାରା ନିର୍ମାଣ ହୋଇଥିବା ଟେଣ୍ଟକୁ ହଟାଇ ନେବାକୁ କହିଥିଲେ। ଏହାକୁ ନେଇ ଏବେ ଉଭୟ ରାଜ୍ୟ ପୋଲିସ ମଧ୍ୟରେ ଟଣାଓଟରା ଦେଖାଦେଇଛି। ଝାଡଖଣ୍ଡ ପୋଲିସ ପକ୍ଷରୁ କୁହାଯାଇଛି ଯେ, ଏଠାକୁ ଓଡିଶା ପୋଲିସ କେବେ ଆସୁ ନ ଥିବାରୁ ତେଣୁ ସୀମାରେଖା କେଉଁଠାରୁ ଆରମ୍ଭ ଆମେ ଜାଣିନାହୁଁ। ଏହାଛଡା ପୂର୍ତ୍ତ ବିଭାଗ ଓ ପୌର ପରିଷଦ ପକ୍ଷରୁ ସ୍ବାଗତମ ଓ ଧନ୍ୟବାଦ ତୋରଣ ସୀମାରେଖାଠାରୁ ଅନେକ ଦୂରରେ ରହିଥିବାରୁ ତାହା ମଧ୍ୟ ଭ୍ରମ ସୃଷ୍ଟି କରୁଛି।
ଝାଡଖଣ୍ଡ ପୋଲିସ ସୀମାନ୍ତ ସିଲ ନିମନ୍ତେ ଟେଣ୍ଟ କରୁଥିବା ସ୍ଥାନ ବଡବିଲ ବନ ବିଭାଗ କାର୍ଯ୍ୟାଳୟର ଠିକ୍ ସମ୍ମୁଖରେ ରହିଛି। ଝାଡଖଣ୍ଡ ପୋଲିସ ସୀମା ଭିତରକୁ ପଶି ଆସିଥିଲେ ହେଁ ଓଡିଶା ପୋଲିସ ସୀମାନ୍ତ ସିଲ୍ କରିବା ନେଇ କୌଣସି ପଦକ୍ଷେପ ନେଇ ନ ଥିଲା। ତେବେ ଓଡ଼ିଶା ସୀମା ଭିତରକୁ ଝାଡଖଣ୍ଡ ପୋଲିସର ପ୍ରବେଶ ଓ ଟେଣ୍ଟ ନିର୍ମାଣକୁ ଗଣମାଧ୍ୟମର ପ୍ରତିନିଧିମାନେ ବିରୋଧ କରିବା ସହ ଏନେଇ ବଡବିଲ ପୌର ନିର୍ବାହୀ ଅଧିକାରୀ ଏବଂ ତହସିଲଦାରଙ୍କୁ ସୂଚନା ଦେଇଥିଲେ। ପ୍ରଶାସନିକ ଅଧିକାରୀମାନେ ପହଞ୍ଚି ନିର୍ମାଣାଧୀନ ଟେଣ୍ଟକୁ ହଟାଇବାକୁ ନିର୍ଦ୍ଦେଶ ଦେଇଥିବା ଜଣାପଡିଛି।
