ନୂଆଦିଲ୍ଲୀ,୨୨।୪ (ପି.ଟି.): ବିଶ୍ୱ ବ୍ୟାଡ୍ମିଣ୍ଟନର ସର୍ବୋଚ୍ଚ ପ୍ରଶାସନିକ ସଂସ୍ଥା ବ୍ୟାଡମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ‘ଆଇ ଆମ ବ୍ୟାଡମିଣ୍ଟନ’ ସଚେତନତା ଅଭିଯାନ ଆରମ୍ଭ କରିଛି। ବିଡବ୍ଳ୍ୟୁଏଫ୍ ବିଶ୍ୱ ଚାମ୍ପିୟନ ପି.ଭି. ସିନ୍ଧୁଙ୍କୁ ଏହି ଅଭିଯାନର ଅନ୍ୟତମ ଆମ୍ପାସାଡର ନିଯୁକ୍ତ କରିଛି।
ଏହି ଅଭିଯାନ ମାଧ୍ୟମରେ ଖେଳାଳିମାନେ ବ୍ୟାଡିମିଣ୍ଟନ ପ୍ରତିଥିବା ସେମାନଙ୍କର ଭଲପାଇବା ଓ ସମ୍ମାନ ପ୍ରଦର୍ଶନ କରିପାରିବେ। ଖେଳାଳିମାନେ ସାଧୁତାର ସହ ଖେଳିବାକୁ ଅନ୍ୟମାନଙ୍କୁ ଏହି ଅଭିଯାନ ଦ୍ୱାରା ପ୍ରବର୍ତ୍ତାଇ ପାରିବେ। ଯେ କୌଣସି କ୍ରୀଡ଼ାରେ ସାଧୁତା ଓ ସ୍ବଚ୍ଛତା ଅବଲମ୍ବନ କରିବା ନିହାତି ଜରୁରୀ ବୋଲି ସିନ୍ଧୁ କହିଛନ୍ତି। ଆମ୍ବାସାଡର ହିସାବରେ ଏହି ବିଷୟକୁ ଆମେ ହାଇଲାଇଟ୍ କରିପାରିଲେ ଏହା ଦ୍ୱାରା ଅଧିକରୁ ଅଧିକ ଖେଳାଳି ସକାରାତ୍ମକ ଭାବେ ପ୍ରଭାବିତ ହେବେ ବୋଲି ୨୪ ବର୍ଷୀୟ ସିନ୍ଧୁ କହିଛନ୍ତି। ଜଣେ ଖେଳାଳି ନିଜ ପାଇଁ ଖେଳିଥାଏ। ତେଣୁ ଏଥିରେ ସାଧୁତା ଓ ସ୍ବଚ୍ଛତା ଅବଲମ୍ବନ କରିବା ଉଚିତ ବୋଲି ଅଲିମ୍ପିକ୍ସ ରୌପ୍ୟ ପଦକ ବିଜୟିନୀ ସିନ୍ଧୁ କହିଛନ୍ତି।
ସିନ୍ଧୁଙ୍କୁ ବାଦ୍ଦେଲେ ଏହି ଅଭିଯାନରେ ବ୍ରାଣ୍ଡ ଆମ୍ବାସାଡର ନିଯୁକ୍ତ ହୋଇଥିବା ଅନ୍ୟ ଖେଳାଳିମାନେ ହେଲେ କାନାଡାର ମିଲେଲେ ଲି, ଦୁଇ ଚାଇନା ଖେଳାଳି ଝେଙ୍ଗ୍ ସି ଓ୍ବେଇ, ହୁଆଙ୍ଗ୍ ୟା କ୍ୱିୟଙ୍ଗ୍, ଇଂଲଣ୍ଡର ଜ୍ୟାକ ଶେଫାର୍ଡ, ଜର୍ମାନୀର ଭାଲେସ୍କା ନୋବ୍ଲାଉଚ୍, ହଂକଂର ଚାନ୍ ହୋ ୟୁଏନ ଓ ଜର୍ମାନୀର ମାର୍କ ଜ୍ୱିବ୍ଲେର। ଏହି ଅଭିଯାନ ଦ୍ୱାରା ଖେଳାଳିମାନଙ୍କୁ ସଚେତନ କରିହେବ ବୋଲି ବିଡବ୍ଲ୍ୟୁଏଫ୍ ତରଫରୁ କୁହାଯାଇଛି।
୨୦୧୬ରୁ ଯେଉଁ ଖେଳାଳିମାନେ ଏହି ଅଭିଯାନରେ ସାମିଲ ହୋଇଥିଲେ ସେମାନେ ହେଲେ ଭାରତର ସାଇନା ନେହ୍ବାଲ, ଭିକ୍ଟର ଆକ୍ସେଲସେନ, ହେଣ୍ଡ୍ରା ସେଟିଓ୍ବାନ, କ୍ରିଷ୍ଟିନା ପେଡେରସନ, ଚେନ୍ ଲଙ୍ଗ୍, ମିସାକି ମାସୁଟୋମୋ ଓ ଅକାୟା ଟାକାହାସି। କ୍ରୀଡ଼ାରେ ମ୍ୟାଚ୍ ଫିକ୍ସିଂ, ମ୍ୟାଚ୍ ଫଳାଫଳକୁ ନିୟନ୍ତ୍ରଣ କରିବା ଡୋପିଂ କଳଙ୍କ ସଦୃଶ। ତେଣୁ ବ୍ୟାଡମିଣ୍ଟନକୁ ଏହି କଳଙ୍କରୁ ଦୂରେଇ ରଖିବା ଜରୁରୀ ଓ ଏଥିରେ ‘ଆଇ ଆମ ବ୍ୟାଡମିଣ୍ଟନ’ ଅଭିଯାନ ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ବିଡବ୍ଲ୍ୟୁଏଫ୍ ତରଫରୁ କୁହାଯାଇଛି।
