ଦେବଗଡ଼, ୧୦।୧(ଡି.ଏନ.ଏ.)-ପ୍ରଧାନପାଟ ଫୁଟବଲ କ୍ଲବ ଆନୁକୂଲ୍ୟରେ ସ୍ଥାନୀୟ ଇନ୍ଦିରାଗାନ୍ଧୀ ଷ୍ଟାଡିୟମଠାରେ ଗତ ସୋମବାର ଠାରୁ ଆରମ୍ଭ ହୋଇଥିବା ସର୍ବଭାରତୀୟ ପ୍ରଧାନପାଟ କପ ଫୁଟବଲ ଟୁର୍ନାମେଣ୍ଟ ପୁଲ ‘ବି’ର ପ୍ରଥମ ମ୍ୟାଚରେ ଗୁରୁବାର ଦେବଗଡ ଫୁଟବଲ କ୍ଲବକୁ ୧-୦ ଗୋଲରେ ପରସ୍ତ କରି କୋଲକାତାର ହୁଗୁଳି ଫୁଟବଲ ଏକାଡେମୀ ବିଜୟୀ ହୋଇଛି। ମ୍ୟାଚକୁ ରେଫରୀ ଭାବେ ଅଶ୍ୱିନୀ କୁମାର ବେରିହା, ଅରୁଣ କୁମାର ଭୋଇ, ନୀଳ ନାୟକ ଓ ଦେବରାଜ ନାଗ, ରାଜନ ଝାଙ୍କର ପରିଚାଳନା କରିଥିଲେ। ମ୍ୟାଚ କମିଶନର ଭାବେ ହେମନ୍ତ କୁମାର ମହାପାତ୍ର ଦାୟିତ୍ୱ ତୁଲାଇଥିଲେ। କ୍ଲବର ସଭାପତି ସୁବାସ ଚନ୍ଦ୍ର ଭୋଇଙ୍କ ଅଧ୍ୟକ୍ଷତାରେ ପୁରସ୍କାର ବିତରଣୀ ଉତ୍ସବ ଆୟୋଜିତ ହୋଇଥିଲା। ଏଥିରେ ମୁଖ୍ୟ ଅତିଥି ଭାବେ ସମ୍ବଲପୁର ଏମ୍ପି ନିତେଶ ଗଙ୍ଗଦେବ, ସମ୍ମାନିତ ଅତିଥି ଭାବେ ଦେବଗଡ ଜିଲା ପରିଷଦ ଅଧ୍ୟକ୍ଷା ସୁଧାମୟୀ ପଟେଲ, ପୂର୍ବତନ ଜିଲା ପରିଷଦ ଅଧ୍ୟକ୍ଷ ରଞ୍ଜିିତ କୁମାର ପଟେଲ, ଡେପୁଟି କମାଣ୍ଡେଣ୍ଟ ଭବାନୀ ଶଙ୍କର ସେଠ, ଜିଲା କ୍ରୀଡା ସଂସଦର ସମ୍ପାଦକ ଧିରେନ୍ଦ୍ର କୁମାର ନାୟକ, ଆଇନଜୀବୀ ସଚ୍ଚିକାନ୍ତ ଦାଶ ଓ ଶବ୍ୟସାଚୀ କପରଦାର ପ୍ରମୁଖ ମଞ୍ଚାସୀନ ରହିଥିଲେ। ସୁଜୟ ସୋରେନଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରିବା ସହ ଆୟୋଜକ ଏବଂ ଉପସ୍ଥିତ ଦର୍ଶକମାନଙ୍କୁ ଉତ୍ସାହିତ କରିଥିଲେ। ବେଣୁଧର ଗଡନାୟକ ମ୍ୟାଚର ଧାରାବିବରଣୀ ପ୍ରଦାନ କରିଥିଲେ। ଟୁର୍ନାମେଣ୍ଟ ଆୟୋଜନରେ ଅଲେଖ ନାଏକ, କିଶୋର ରାୟ, ପୁରୁଷୋତମ ସ୍ବାଇଁ, ସୁଧିର ଦାସ, ଡିଲେଶ୍ୱର ସ୍ବାଇଁ, ରାଘବ ମହାରଣା, ପ୍ରଦୀପ ସାହୁ, ବିକାଶ କୁମାର ଅଗ୍ରୱାଲ, ରୂପକ ମାଝି, ମଛିନ୍ଦ୍ର ନାୟକ, ସଞ୍ଜିବ ନାୟକ, ଯୋଗେଶ ନାୟକ, ଅନନ୍ତ ମେହେର ଓ ଜୟକୃଷ୍ଣ ସାମଲଙ୍କ ସମେତ କ୍ଲବର ସମସ୍ତ ସଦସ୍ୟ ସକ୍ରୀୟ ସହଯୋଗ କରୁଛନ୍ତି। ଶୁକ୍ରବାର ପୁଲ ‘ବି’ର ଦ୍ୱିତୀୟ ମ୍ୟାଚ ଝାଡ଼ଖଣ୍ଡର ଧାନବାଦ ଫୁଟବଲ ଏକାଡେମୀ ଓ ଅନୁଗୋଳ ଜିଲାର ନାଲକୋ ଜେଆରଏଫ୍ସି ମଧ୍ୟରେ ଅନୁଷ୍ଠିତ ହେବ ବୋଲି ଆୟୋଜକ ପ୍ରଧାନପାଟ କ୍ଲବ ସମ୍ପାଦକ ବିକାଶ କୁମାର ପ୍ରଧାନ ସୂଚନା ଦେଇଛନ୍ତି।
