ସୋନପୁର,୧୭।୫(ନି.ପ୍ର.)-ଲକ୍ଡାଉନ୍ ଯୋଗୁଁ ତାମିଲନାଡୁର ନାମକୋଲରେ ଫସି ରହିଥିବା ସୁବର୍ଣ୍ଣପୁର ଜିଲାର ୪୫ ଜଣ ଶ୍ରମିକ ଘରକୁ ପେରୁଛନ୍ତି। ଶନିବାର ରାତିରେ ଅନ୍ୟ ଜିଲାର ଓଡିଆ ଶ୍ରମିକଙ୍କ ସହିତ ୩ଟି ବସ୍ ଯୋଗେ ନାମକୋଲରୁ ବାହାରିଛନ୍ତି। ଦୀର୍ଘ ୧୮ଶହ କିଲୋମିଟରର ଯାତ୍ରା ପରେ ସୋମବାର ରାତି ୯ଟା ସୁଦ୍ଧା ଶ୍ରମିକମାନେ ସମ୍ବଲପୁରରେ ପହଞ୍ଚତ୍ବେ ବୋଲି ସୂଚନା ମିଳିଛି। ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକର ମହଦା, ଲିମ୍ବପାଲି ଓ କୋଟସମଲାଇ ଗ୍ରାମର ଏହି ପ୍ରବାସୀ ଶ୍ରମିକମାନେ ଘରକୁ ଫେରିବା ପାଇଁ ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାୟୀ ରେଜିଷ୍ଟ୍ରେଶନ କରିଥିଲେ । ନିଜ ନିର୍ବାଚନମଣ୍ଡଳୀର ବିଧାୟକ ପଦ୍ମନାଭ ବେହେରା ରାଜ୍ୟ ପରିବହନ ମନ୍ତ୍ରୀ ଅଛନ୍ତି। ହେଲେ ନିଜ ଘରକୁ ଫେରିବା ପାଇଁ ସରକାରଙ୍କ ପକ୍ଷରୁ ଶ୍ରମିକମାନଙ୍କୁ କୌଣସି ସହାୟତା ମିଳିଲାନି। କେନ୍ଦ୍ର ସରକାର ସ୍ବତନ୍ତ୍ର ଶ୍ରମିକ ଟ୍ରେନ୍ ଓ ବସ୍ ସେବା ପ୍ରଚଳନ କରିଛନ୍ତି। ରାଜ୍ୟ ସରକାର ଏଥିପାଇଁ ନୋଡାଲ ଅଫିସର ମଧ୍ୟ ନିଯୁକ୍ତ କରିଛନ୍ତ। କିନ୍ତୁ ସବୁ ଠୁ ନିରାଶ ହେଲା ପରେ ସୂତା କାରଖାନାରେ କାମ କରୁଥିବା ଶ୍ରମିକମାନେ ନିଜ ଖର୍ଚ୍ଚରେ ସେମାନଙ୍କ ଘରକୁ ଫେରିବାକୁ ବାଧ୍ୟ ହୋଇଛନ୍ତି। କର୍ମସଂସ୍ଥାନ ହରାଇ ଭୋକ ଉପବାସରେ ଥିବା ଶ୍ରମିକମାନେ ନିଜ ସଞ୍ଚତ୍ତ ଅର୍ଥରୁ ୫ହଜାର ୫ଶହ ଟଙ୍କା ଲେଖାଏ ବସ୍ ଭଡା ଦେଇ ଘରକୁ ଫେରୁଛନ୍ତି। ସୂତା କାରଖାନାର ମାଲିକ ଶ୍ରମିକମାନଙ୍କୁ ଘରକୁ ଫେରିବା ସମୟରେ ରାତ୍ରୀ ଭୋଜନ ସହିତ ପ୍ରତି ଶ୍ରମିକଙ୍କୁ ୫ଶହ ଟଙ୍କା ଲେଖାଏ ଦେଇଥିବା କୋଟସମଲାଇ ଅଞ୍ଚଳର ପ୍ରବାସୀ ଶ୍ରମିକ ଚିଣ୍ଟୁ ମନ୍ତ୍ରା(୧୮) ଓ ଲକ୍ଷ୍ମୀନ୍ଦ୍ର ବସ୍ତିଆ(୪୫) କହିଛନ୍ତି। ଏହି ଶ୍ରମିକମାନେ ଗତ ୧ ବର୍ଷ ଧରି ସେଠାରେ କାମ କରୁଥିଲେ। କରୋନା ଭୂତାଣୁ ସଂକ୍ରମଣକୁ ରୋକିବା ପାଇଁ ସାରା ଦେଶରେ ଲକ୍ଡାଉନ୍ ଘୋଷଣା ହେବା ପରେ କାରଖାନା ବନ୍ଦ ରହିଥିଲା। ଶତାଧିକ ଓଡିଆ ଶ୍ରମିକ କରୋନା ସଂକ୍ରମିତ ଅଞ୍ଚଳରୁ କିଭଳି ନିଜ ଭିଟାମାଟିକୁ ଫେରିବେ ମାନସିକ ଚାପରେ ଥିଲେ। କାରଖାନା ମାଲିକଙ୍କ ସହଯୋଗରେ ତାମିଲନାଡୁ ପୋଲିସ ଶ୍ରମିକମାନଙ୍କୁ ସମ୍ବଲପୁର ପର୍ଯ୍ୟନ୍ତ ବସ୍ ଯୋଗେ ଆସିବା ପାଇଁ ଅନୁମତି ପ୍ରଦାନ କରିଥିବା ଜଣାପଡିଛି। ଏହି ଶ୍ରମିକଙ୍କୁ ସୁବର୍ଣ୍ଣପୁର ଜିଲା ପ୍ରଶାସନ ସମ୍ବଲପୁରରୁ ଆଣିବାର ବ୍ୟବସ୍ଥା କରିବାକୁ ଶ୍ରମିକମାନେ ଅନୁରୋଧ କରିଛନ୍ତି।
