ତିହିଡ଼ି,୧୧।୬(ଡି.ଏନ.ଏ.)- ଭଦ୍ରକ ଜିଲା ତିହିଡ଼ି ବ୍ଲକ ଅଧୀନ ଚାରିତରଫ ମୌଜାର ୧୭୧ ଜଣ ଚାଷୀଙ୍କୁ ପ୍ରଧାନମନ୍ତ୍ରୀ ଫସଲବୀମା ମିଳିପାରୁ ନାହିଁ। ଚାଷୀମାନେ ବାରମ୍ବାର ଆନ୍ଦୋଳନ କରି ପୂର୍ବରୁ ୩ଥର ସମବାୟ ସମିତିରେ ତାଲା ପକାଇଥିବା ସତ୍ତ୍ୱେ କୌଣସି ପ୍ରତିକାର ନ ହେବାରୁ ସେମାନେ ପୁଣି ମଙ୍ଗଳବାର ଆଉ ଥରେ ତାଲା ପକାଇଛନ୍ତି। ବୀମା ରାଶି ନ ମିଳିବା ଯାଏ ସେମାନେ ତାଲା ଖୋଲିବେ ନାହିଁ ବୋଲି ଚେତାବନୀ ଦେଇଛନ୍ତି। ତାଲା ପଡ଼ି ରହିବା ଯୋଗୁ ସମିତିର କାର୍ଯ୍ୟ ବନ୍ଦ ରହିଛି। କର୍ମଚାରୀମାନେ କାର୍ଯ୍ୟାଳୟକୁ ଯାଇ ପାରୁନାହାନ୍ତି।
ଆନ୍ଦୋଳନକାରୀ ଚାଷୀ ଅଭିଯୋଗ କରିଛନ୍ତି ଯେ, ସମବାୟ ସମିତି ଅଧୀନରେ ୨୦୧୭ରେ ମୋଟ ୧୭୧ ଜଣଙ୍କୁ ବୀମାରାଶି ମିଳିନାହିଁ। ବାହାରପାଳ ଗ୍ରାମର ୧୪୧, ଚାରିତରଫ ଗ୍ରାମର ୨୪ ଓ ଖଡ଼ିଯାଣ ଗ୍ରାମର ୬ ଜଣ ଚାଷୀ ମୋଟ ୧୦ ଲକ୍ଷ ୧୬ ହଜାର ଟଙ୍କା ବୀମାରାଶି ପାଇବାରୁ ବଞ୍ଚତ୍ତ ହୋଇଛନ୍ତି। ଏ ସମ୍ପର୍କରେ ରେଜିଷ୍ଟ୍ରାର ଅଫ କୋଅପରେଟିଭ, ଭୁବନେଶ୍ୱରରେ ମାମଲା ରୁଜୁ କରାଯିବା ପରେ ୩ ଥର ଶୁଣାଣି କରାଯାଇଛି । ବୀମା କମ୍ପାନୀକୁ ଡକାଇ ସମିତି ପକ୍ଷରୁ ଆବଶ୍ୟକ କାଗଜପତ୍ର ଦାଖଲ କରାଯାଇଛି। ଏହାମଧ୍ୟରେ ଅପେକ୍ଷାରେ ୨ବର୍ଷ ବିତିଗଲାଣି। ସମ୍ପ୍ରତି ତିହିଡ଼ି ସ୍ଥିତ ବାଲେଶ୍ୱର-ଭଦ୍ରକ କେନ୍ଦ୍ର ସମବାୟ ବ୍ୟାାଙ୍କରେ ବ୍ୟାଙ୍କ ସଭାପତି ରଘୁନାଥ ଲେଙ୍କା, ସମିତି ସମ୍ପାଦକ ଚିତ୍ତରଞ୍ଜନ ସ୍ବାଇଁ ଏବଂ ସଭାପତି ସୁବାସ ଚନ୍ଦ୍ର ସ୍ବାଇଁଙ୍କ ମଧ୍ୟରେ ଏନେଇ ଆଲୋଚନା ହୋଇଥିଲା। ଫସଲବୀମାରୁ ବଞ୍ଚତ୍ତ ହୋଇଥିବା ଚାଷୀଙ୍କ ସମ୍ପର୍କରେ ଏକ ନିର୍ଦ୍ଦିଷ୍ଟ ଫର୍ମ ପୂରଣ କରି ପଠାଇବାକୁ ସ୍ଥିର ହୋଇଥିଲା। ପରେ ସମିତି ପକ୍ଷରୁ ଏହାକୁ ପଠାଯାଇଥିଲେ ମଧ୍ୟ ବୀମାରାଶି ନ ମିଳିବାରୁ ସୋମବାର ଶ୍ରୀଧର ପାଢ଼ୀ, ସୁବାସ ସେଠୀ, ବଳରାମ ସୁଆର, ସୁଶାନ୍ତ ପଣ୍ଡା, ସୁନୀଲ ପଣ୍ଡା, ବାବାଜୀ ପଣ୍ଡା, ଆନନ୍ଦ ଚନ୍ଦ୍ର ପଣ୍ଡା, ମନୋଜ ପଲାଇ, ବୁଦ୍ଧିରାମ ଜେନା, ପ୍ରଦୀପ ବାରିକ, ବିଚିତ୍ର ବାରିକ, ଗୌରାଙ୍ଗ ପଲାଇ, ଦେବେନ୍ଦ୍ର ପଣ୍ଡା ପ୍ରମୁଖ ଚାଷୀ ସମିତି ଆଗରେ ବିକ୍ଷୋଭ କରିି କାର୍ଯ୍ୟାଳୟରେ ତାଲା ପକାଇ ଦେଇଥିଲେ।
