ବିନିକା, ୨୪।୧ (ଡି.ଏନ୍.ଏ.)-
ସୁବର୍ଣ୍ଣପୁର ଜିଲା ବିନିକା ବ୍ଲକ ଆଖିଦାଦର ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଲୟ ଆଏଜ୍କେ ୮ ବଛର ହେଲା ଅବେବସ୍ତା ଘେରରେ ରହିଛେ। ସ୍କୁଲ ସମସିଆର ସମାଧାନ ଲାଗି ପ୍ରଧାନଶିକ୍ଷକ ବ୍ରଜ ବିହାରୀ ପଣ୍ଡା ବିଇଓକଁରନୁ ଡିଇଓ ତକ୍ ଜନେଇଛନ୍। ହେଲେ ଆଏଜ୍ତକ ବିଭାଗ ତରଫୁ କେହେନ୍ସି ପରକାର ପଦକ୍ଷେପ ନାଇଁ ନିଆଯାଇଥିବାର ସେ କହିଛନ୍।
ସୂଚନା ଅନ୍ସାରେ ଆଖିଦାଦର ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଲୟରେ ୧ମରୁ ୮ମ ଶ୍ରେଣୀ ତକ୍ ୮୯ ଝନ୍ ଛାତ୍ରୀଛାତ୍ର ପାଠ୍ ପଢ଼ୁଛନ୍। ଛାତ୍ରୀଛାତ୍ରକଁର ଭିତ୍ରୁ ୯୦ ପରତିଶତ ଆଦିବାସୀ ସମାଜର। ହେଲେ ଇ ସ୍କୁଲରେ ଶିକ୍ଷକ ଅଭାବ ରହିଥିଲାବେଲେ ଛାତ୍ରୀଛାତ୍ରକର ଲାଗି ପଢ଼ାକୁଠିର ବି ବଡ଼ଭାରି ଅଭାବ ରହିଛେ। ଏନ୍ତାଥି ପିଲାକର ପାଠ୍ପଢ଼ା ଖେଲଢ଼େପ ହେଉଥିବାର ଗଁାବାସୀ ଆର ଅଭିଭାବକମାନେ ଅଭିଯୋଗ କରିଛନ୍। ଏହେଦେ ସ୍କୁଲରେ ୬ ଝନ୍ ସହକାରୀ ଶିକ୍ଷକ ଜାଗାରେ ୩ ଝନ୍ ରହିଛନ୍। ସେନ୍ତା ଶିକ୍ଷକ ଅଭାବୁ ସ୍କୁଲର ପ୍ରଧାନଶିକ୍ଷକ ଛାତ୍ରୀଛାତ୍ରକୁଁ ୯ ବିଷେରେ ପାଠ୍ ପଢ଼ଉଥିବାର ଜନାଯାଇଛେ। ସ୍କୁଲରେ ୮ଟା ଶ୍ରେଣୀର ଛାତ୍ରୀଛାତ୍ର ପାଠ୍ପଢ଼ବାର ଲାଗି ୪ଟା ନ କୁଠି ରହିଛେ। ପରଥମ, ଦୁତୀଅ, ତୁରତୀଅ ଶ୍ରେଣୀର ୩୫ ଛାତ୍ରୀଛାତ୍ର ଗୁଟେ କୁଠିଥି, ୪ର୍ଥ ଆର ୫ମ ଶ୍ରେଣୀର ମୋଟ ୨୩ ଛାତ୍ରୀଛାତ୍ର ଗୁଟେ କୁଠିଥି। ସେନ୍ତା ୬ଷ୍ଠ, ୭ମ ଆର ୮ମ ଶ୍ରେଣୀର ୩୧ ଝନ୍ ଛାତ୍ରୀଛାତ୍ର ଗୁଟେ କୁଠିଥି ବସି ପାଠ୍ ପଢ଼ୁଛନ୍। ଆରଗୁଟେ କୁଠିଥି ଅଫିସ୍ କାଯ୍ ଚାଲିଛେ। ସ୍କୁଲରେ କୁଠି ଅଭାବୁ ପଢ଼ାକୁଠିମାନକେ ବି ଜିନିଷପାତି, ପିଲାକର ବେଲାର ରଁଧାଖଁଦା ସାମାନ ଚାଉଲ, ଡାଲି ରଖାଯାଉଛେ। ଇଆଡ଼େ ବାଡ଼ା ଅଭାବୁ ସ୍କୁଲ୍ର ଚାର୍ହିକୁତି ମେଲା ପଡ଼ିଛେ। ଏନ୍ତାଥି ସ୍କୁଲ ଛୁଟି ହେଲେ ପରିସର ଅସାମାଜିକ ଲୁକ୍କର ପାଏନ୍ଘାଟ୍ ପାଲଟୁଛେ। ୨୦୧୨-୧୩ ସାଲେ ୬୦ ହଜାର ଟଁକା ଅନୁଦାନରେ ସ୍କୁଲରେ ଗୁଟେ ରଁଧାଘର ତିଆରି ହେଇଥିଲା। ହେଲେ ହଲ୍କା କାମ୍ ଲାଗି ଏହେଦେ ରଁଧା ଘରର କଁାଥି ଫାଟି ଅଁା କରି ବିପଦ୍ ଅବସ୍ତାରେ ରହିଛେ। ସେନ୍ତା ରଁଧାଘରଟା ଏତେ ଛୁଟିଆ ଯେ, ସେଠାନେ ସାମାନ ରଖ୍ବାର ତ ଦୂରର କଥା ରଁଧାବଢ଼ା କରବାକେ ବି ସୁବିଧା ନାଇଁ ହେବାର। ଏନ୍ତାଥି ସ୍କୁଲ ବାରନ୍ଡାରେ ପିଲାକର ଲାଗି ରଁଧାବଢ଼ା ହେଉଛେ। ହେଲେ ବରଷା ଦିନେ ବାରନ୍ଡାରେ ରଁଧାବଢ଼ାରେ ବଡ଼ଭାରି ଅସ୍ବିଧା ହେଉଛେ। ଇଥିରଲାଗି ସ୍କୁଲର ରଁାଧେନ୍ ରାଜେଶ୍ୱରୀ ବାଘ ନିଜର ଘରେ ରଁଧାବଢ଼ା କରି ଭାତତୁନ୍ ସ୍କୁଲକେ ଦୁହାରୁଥିବାର କହିଛନ୍। ଜିଲାପାଳ ଇ ସ୍କୁଲ ଉପରେ ଦୁରୁଷ୍ଟି ଦେଇ ସମସିଆର ସମାଧାନ କରବାକେ ଆଖିଦାଦର ଗଁାବାସୀ ଦାବି କରିଛନ୍। ଇ ବାବ୍ଦେ ମତାମତ ଲାଗି ଡିଇଓ ପୁଷ୍ପା ମିଞ୍ଜକଁର ମୋବାଇଲ ନମ୍ବର ୭୯୭୮୪୩୦୦୪୩ ଆର ବିନିକା ବିଇଓ ଶଶୀଭୂଷଣ ସେଠୀକୁଁ ତାକର ମୋବାଇଲ ନମ୍ବର ୯୯୩୭୮୮୨୦୪୬ରେ ବାରବାର ଯୋଗାଯୋଗ କରାଯାଇଥିଲେ ବି ମତାମତ ନାଇଁ ମିଲିପାରି।
