କେମ୍ବ୍ରିଜ,୧୫-୧୨: ଭାରତ ଏବେ ମାନ୍ଦାବସ୍ଥା ସହ ଜୁଝୁଥିବା ବେଳେ ଦେଶର ଅର୍ଥ ବ୍ୟବସ୍ଥାକୁ ନେଇ ପୂର୍ବତନ ମୁଖ୍ୟ ଅର୍ଥନୈତିକ ପରାମର୍ଶଦାତା (ସିଇଏ) ଅରବିନ୍ଦ ସୁବ୍ରମଣ୍ୟନ ସତର୍କ କରାଇଛନ୍ତି। ବର୍ତ୍ତମାନର ମାନ୍ଦାବସ୍ଥା ଗ୍ରେଟ୍ ସ୍ଲୋଡାଉନ ବା ବହୁତ ବଡ । ଭାରତୀୟ ଅର୍ଥନୀତି ଆଇସିୟୁ ଆଡକୁ ବଢୁଥିବାର ପ୍ରତୀୟମାନ ହେଉଛି। ଦ୍ୱେତ ବାଲାନ୍ସ ସିଟ୍ ଯୋଗୁ ଦେଶର ଅର୍ଥ ବ୍ୟବସ୍ଥା ପ୍ରଭାବିତ ହେଉଛି ବୋଲି ହାଓ୍ବାର୍ଡ ୟୁନିଭର୍ସିଟିଠାରେ ଏକ ପେପର ପ୍ରେଜେନଟେଶନ ଅବସରରେ ସୁବ୍ରମଣ୍ୟନ ଏହା କହିଛନ୍ତି।
୨୦୧୪ ଡିସେମ୍ବରରେ ସିଇଏ ଥିବା ବେଳେ ସେ, ଦ୍ୱେତ ବାଲାନ୍ସ ସିଟ ସମସ୍ୟାନୁ ନେଇ ଚେତବାନୀ ଦେଇଥିଲେ। କର୍ପୋରେଟଗୁଡିକୁ ପ୍ରଦାନ କରାଯାଉଥିବା ଋଣ ଅନାଦାୟ ଋଣ(ଏନ୍ପିଏ)ରେ ରୂପାନ୍ତରିତ ହେଲେ ସାଧାରଣତଃ ଟ୍ବିନ ବାଲାନ୍ସ ସିଟ୍ ସମସ୍ୟା ଦେଖାଦେଇଥାଏ। ଏହା ବ୍ୟାଙ୍କଗୁଡିକର ସମସ୍ୟାକୁ ବଢାଇ ଦେଇଥାଏ। ଏଭଳି ସ୍ଥିତି ଯୋଗୁ ପ୍ରଥମତଃ ଶିଳ୍ପ ସଂସ୍ଥାଗୁଡିକ ଏହା ଦ୍ୱାରା ଚିନ୍ତାରେ ରହିବା ଯୋଗୁ ନୂଆ ନିବେଶ କରି ପାରନ୍ତି ନାହିଁ। ଏହାବାଦ ବର୍ଦ୍ଧିତ ଏନ୍ପିଏ ଯୋଗୁ ବ୍ୟାଙ୍କ ଋଣ ଯୋଗାଣ ଲାଗି ସମସ୍ୟା ସାମ୍ନା କରନ୍ତି। ଏହା ଯୋଗୁ ଅର୍ଥବ୍ୟବସ୍ଥାର ଅଭିବୃଦ୍ଧି ମନ୍ଥର ସ୍ଥିତିକୁ ଚାଲିଯାଏ।
ସୁବ୍ରମଣ୍ୟନ ତାଙ୍କ ରିସର୍ଚ୍ଚ ପେପରରେ ୨୦୦୪ରୁ ୨୦୧୧ ପର୍ଯ୍ୟନ୍ତ ଇସ୍ପାତ, ଶକ୍ତି ଏବଂ ଭିତ୍ତିଭୂମି କ୍ଷେତ୍ରରେ ଯେଉଁ ଋଣ ଏନ୍ପିଏ ହୋଇଛି ତାକୁ ଟ୍ବିନ୍ ବାଲାନ୍ସ ସିଟ୍-୧ ବୋଲି ବିଚାର କରିଛନ୍ତି। ବିମୁଦ୍ରୀକରଣ ପରେ ଅଣବ୍ୟାଙ୍କିଙ୍ଗ ବିତ୍ତ ପ୍ରତିଷ୍ଠାନ ଏବଂ ରିୟଲ ଇଷ୍ଟେଟ କ୍ଷେତ୍ରରେ ଆସିଥିବା ନଗଦ ସଙ୍କଟକୁ ସେ ଟ୍ବିନ ବାଲାନ୍ସ ସିଟ୍-୨ ବୋଲି କହିଛନ୍ତି। ସୁବ୍ରମଣ୍ୟନଙ୍କ କହିବାନୁଯାୟୀ, ଗତ ବର୍ଷ ସେପ୍ଟେମ୍ବରରେ ସାମ୍ନାକୁ ଆସିଥିବା ଆଇଏଲଆଣ୍ଡଏଫ୍ଏସ୍ ସଙ୍କଟ ଯୋଗୁ ୯୦ ହଜାର କୋଟି ଟଙ୍କାର ଋଣ ସମ୍ପର୍କରେ ପ୍ରଘଟ ହୋଇଥିଲା। ଏହା ଦ୍ୱାରା ବଜାର ପ୍ରଭାବିତ ହୋଇଥିବା ବେଳେ ଏନବିଏଫ୍ସି କ୍ଷେତ୍ରକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା। ଚଳିତ ବର୍ଷ ସେପ୍ଟେମ୍ବର ତ୍ରୈମାସରେ ଜିଡ଼ିପି ଅଭିବୃଦ୍ଧି ୪.୫%କୁ ଖସିଛି। ଏହା ୬ ବର୍ଷର ସର୍ବନିମ୍ନ ସ୍ତର। ରପ୍ତାନି, ହ୍ରାସ ଆମଦାନୀ ଏବଂ ସରକାରଙ୍କ ରାଜସ୍ବ ହ୍ରାସ ଭଳି ପ୍ରସଙ୍ଗକୁ ଦେଖିଲେ ଅର୍ଥ ବ୍ୟବସ୍ଥା ସଙ୍କଟରେ ଥିବା ସେ ମତ ଦେଇଛନ୍ତି।
