ବ୍ରହ୍ମପୁର ଅଫିସ,୩ା୮-କେନ୍ଦ୍ର ସରକାରଙ୍କ ପ୍ରଚଳିତ ଶ୍ରମ ଆଇନ ସଂଶୋଧନ ପ୍ରତିବାଦରେ ସେଣ୍ଟର ଅଫ ଇଣ୍ଡିଆନ ଟ୍ରେଡ ୟୁନିୟନସ (ସିଟୁ) ଗଞ୍ଜାମ ଜିଲା କମିଟି ପକ୍ଷରୁ ଶୁକ୍ରବାର ବ୍ରହ୍ମପୁରସ୍ଥ ଇପିଏଫ ଅଫିସ ଆଗରେ ବିକ୍ଷୋଭ କରାଯାଇଥିଲା । ମାଲିକଙ୍କୁ ସୁହାଇଲା ଭଳି ହୋଇଥିବା ସଂଶୋଧନ ଅବିଳମ୍ବେ ପ୍ରତ୍ୟାହାର କରିବାକୁ ଦାବି ହୋଇଥିଲା। ଏହି ମର୍ମରେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଇପିଏଫ ଅଧିକାରୀଙ୍କୁ ସ୍ମାରକପତ୍ର ପ୍ରଦାନ କରାଯାଇଥିଲା। ସିଟୁ ଜିଲା ସମ୍ପାଦକ ଯୁଧିଷ୍ଠିର ବେହେରା ଆନ୍ଦୋଳନର ନେତୃତ୍ୱ ନେଇଥିଲେ ା ବହୁ ସଂଖ୍ୟକ ଶ୍ରମିକ ଏଥିରେ ସାମିଲ ହୋଇଥିଲେ ।
ସମ୍ପାଦକ ବେହେରା ସମାବେଶରେ କହିଥିଲେ, କେନ୍ଦ୍ର ସରକାର ୪୪ ଶ୍ରମ ଆଇନକୁ ସଂଶୋଧନ କରି ଲୋକ ସଭାରେ ଆଗତ କରିଛନ୍ତି । ତେବେ ମାତ୍ର ୪ ଆଇନକୁ ନେଇ ୱେଜ (ମଜୁରି) କୋଡ ପ୍ରସ୍ତୁତ କରାଯାଇଛି । ଏହା ସମ୍ପୂର୍ଣ୍ଣ ଶ୍ରମିକ ବିରୋଧୀ ହୋଇଥିବା କୁହାଯାଇଛି । ଫଳରେ ଶ୍ରମିକମାନେ ମାଲିକଙ୍କ ଗୋତି ଶ୍ରମିକ ସାଜିବେ । ସର୍ବନିମ୍ନ ମଜୁରି ନିର୍ଦ୍ଧାରଣ, ବୋନସ, ନିରାପତ୍ତା, ସ୍ବାସ୍ଥ୍ୟ ଏବଂ ଚାକିରି ସର୍ତ୍ତାବଳୀ ଆଦି ଆଇନଗୁଡ଼ିକ ସଂଶୋଧନ ଦ୍ୱାରା ଅକାମୀ ହୋଇଯିବାର ଅଭିଯୋଗ କରାଯାଇଛି ।
ଲୋକ ସଭାରେ ଆଗତ ୨୦୧୯ ଶ୍ରମ ଆଇନ ସଂଶୋଧନ ବିଲ ପ୍ରତ୍ୟାହାର କରି ପ୍ରଚଳିତ ଆଇନକୁ କଡ଼ାକଡ଼ି କାର୍ଯ୍ୟକାରୀ କରିବା, ଉଲ୍ଲଂଘନକାରୀଙ୍କ ବିରୋଧରେ ଦୃଷ୍ଟାନ୍ତମୂଳକ ଦଣ୍ଡବିଧାନ, ମାସିକ ସର୍ବନିମ୍ନ ଦରମା ୨୦ ହଜାର ଟଙ୍କା ଧାର୍ଯ୍ୟ କରିବା ପାଇଁ ସ୍ମାରକପତ୍ରରେ ଦର୍ଶାଯାଇଛି । ବିକ୍ଷୋଭ ସ୍ଥଳରେ ସିଟୁ ଜିଲା କମିଟି ସଭାପତି ଅଶ୍ୱିନୀ ଦାସଙ୍କ ସମେତ ପଞ୍ଚାନନ ଜେନା, ବି.ଏନ୍ ସାହୁ, ଅଶୋକ ଦାସ, ନୃସିଂହ ବ୍ରହ୍ମା, ଶିବ ପ୍ରସାଦ ମହାପାତ୍ର, ମାଧବ କୋଠିଆ, ପ୍ରଦୀପ ସିଂ, କେ.ସି.ମିଶ୍ର ଓ ହରି ନାହାକ ପ୍ରମୁଖ ଶ୍ରମିକ ନେତାମାନେ ଉପସ୍ଥିତ ଥିଲେ । ସଂଶୋଧନ ବିଲକୁ ପ୍ରତ୍ୟାହାର କରା ନ ଗଲେ ଶ୍ରମିକଙ୍କୁ ମେଳିକରି ଆନ୍ଦୋଳନକୁ ତୀବ୍ର କରାଯିବାର ଚେତାବନୀ ଦିଆଯାଇଥିଲା ।
