ଢେଙ୍କାନାଳ ଅଫିସ, ୨୦।୪- ସାଧାରଣ ନିର୍ବାଚନକୁ ନେଇ ଚଳଚଞ୍ଚଳ ଢେଙ୍କାନାଳ ଲୋକସଭା କ୍ଷେତ୍ର। ହାଟ୍ରିକ୍ ବିଜୟ ସହ ମୋଟ ୪ ଥର ଏମ୍ପି ରହିଆସିଥିବା ବରିଷ୍ଠ ବିଜେଡି ନେତା ତଥାଗତ ସତପଥୀ ନିର୍ବାଚନରୁ ନିଜକୁ ଦୂରେଇ ରଖିବା ପରେ ଶାସକ ଦଳକୁ ଏବେ ଘାରିଛି ଗଡ଼ରକ୍ଷା ଚିନ୍ତା। ଶେଷମୁହୂର୍ତ୍ତରେ ପାଲଲହଡ଼ା ବିଧାୟକ ମହେଶ ସାହୁଙ୍କୁ ଟିକେଟ ଦେଇ ଟ୍ରମ୍ପକାର୍ଡ ଭାବେ ବ୍ୟବହାର କରିଛି ଦଳ। ମହେଶଙ୍କୁ ଜିତାଇବା ସମ୍ମାନର ପ୍ରଶ୍ନ ହୋଇଥିବାବେଳେ ଏଥିରେ ଶାସକ ଦଳ ସମସ୍ତ ବଳ ଖଟାଇବ ବୋଲି ଚର୍ଚ୍ଚା ହେଉଛି। ସେହିପରି ନିର୍ବାଚନରେ ୬ଥର ପ୍ରତିଦ୍ୱନ୍ଦ୍ୱିତା କରିଥିବା ଭାଜପା ପ୍ରାର୍ଥୀ ରୁଦ୍ରନାରାୟଣ ପାଣି ଏଯାଏ ବିଜୟ ସ୍ବାଦ ଚାଖିନାହାନ୍ତି। ତେଣୁ ନିଜର ତଥା ଦଳର ମର୍ଯ୍ୟାଦା ରକ୍ଷା ଲାଗି ସେ ଶାସକ ଦଳ ସହ ତୀବ୍ର ପ୍ରତିଦ୍ୱନ୍ଦ୍ୱିତା କରୁଛନ୍ତି। ଅନ୍ୟପଟେ ଦୀର୍ଘ ୧୫ ବର୍ଷ ପରେ ପ୍ରତ୍ୟକ୍ଷ ରାଜନୀତିକୁ ବାହୁଡ଼ିଥିବା ବରିଷ୍ଠ କଂଗ୍ରେସ ନେତା କାମାକ୍ଷା ପ୍ରସାଦ ସିଂଦେଓ (କେପି) ମଧ୍ୟ ସୁଯୋଗ ଅପେକ୍ଷାରେ ଥିବା ଆଲୋଚନା ହେଉଛି।
ନବଗଠିତ ଲୋକ ସଭା ନିର୍ବାଚନମଣ୍ଡଳୀ ମହେଶ ଏବଂ କେପିଙ୍କ ପାଇଁ ନୂଆ। ଶାସକ ଦଳର ବିଧାୟକମାନେ ମହେଶଙ୍କ ପାଇଁ ସମସ୍ତ ବଳ ଖଟାଉଛନ୍ତି। ନିଜ ନିଜର ନିର୍ବାଚନମଣ୍ଡଳୀରେ ଘର ଘର ବୁଲି ସେମାନେ ଶଙ୍ଖଚିହ୍ନରେ ଭୋଟ ଦେବାକୁ ନିବେଦନ କରୁଛନ୍ତି। ମହେଶ ଏବଂ ଦଳୀୟ ବିଧାୟକ ପ୍ରାର୍ଥୀଙ୍କ ପାଇଁ ବିଜେଡି ମୁଖିଆ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାରାଥନ ପ୍ରଚାର କରିଛନ୍ତି। ସେହିପରି ଢେଙ୍କାନାଳ ଲୋକ ସଭା ନିର୍ବାଚନ ମଣ୍ଡଳୀରେ ପଦ୍ମ ଫୁଟାଇବାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଘନଘନ ନିର୍ବାଚନୀ ସଭା କରି ପ୍ରଚାର ଚଳାଇଛନ୍ତି। ଏ କ୍ଷେତ୍ରରେ କଂଗ୍ରେସ ସାମାନ୍ୟ ପଛରେ ପଡ଼ିଯାଇଥିବା ଚର୍ଚ୍ଚା ହେଉଛି। ଉଭୟ ଜିଲାରେ କଂଗ୍ରେସ ପୁରୁଣା ପତିଆରା ହରାଇଥିବାବେଳେ କେପି ନିଜ ସମର୍ଥକ, ପୁରୁଣା ସଙ୍ଗଠକଙ୍କୁ ନେଇ ଗଁା ଗଁାରେ ବୁଲି ଭୋଟ ଭିକ୍ଷା କରୁଛନ୍ତି।
ସେପଟେ ନିର୍ବାଚନକୁ ମଝିରେ ମାତ୍ର ୩ଦିନ ବାକିଥିବାବେଳେ ସବୁ ଦଳ ମାରାଥନ ପ୍ରଚାର ଆହୁରି ତୀବ୍ର କରିଛନ୍ତି। ରାଜ୍ୟ ବିକାଶର ଗୋଲାପୀ ଚିତ୍ରକୁ ଭୋଟରଙ୍କ ଆଗରେ ଉପସ୍ଥାପନ କରି ଭୋଟରକୁ ନିଜ ସପକ୍ଷକୁ ଆଣିବାକୁ ମହେଶ ନିରନ୍ତର ଉଦ୍ୟମ ଜାରି ରଖିଛନ୍ତି। ସେହିପରି ମୋଦିଙ୍କ ବିକାଶମୂଳକ କାର୍ଯ୍ୟ, ଦେଶ ସୁରକ୍ଷା ପ୍ରସଙ୍ଗ, ରାଜ୍ୟ ସରକାରଙ୍କ ଦୁର୍ନୀତିର ଚିଠା ପଢ଼ାଇ ଜନସାଧାରଣଙ୍କ ନିକଟତର ହେବାକୁ ଚେଷ୍ଟା କରୁଛନ୍ତି ରୁଦ୍ରନାରାୟଣ। ସେହିପରି ଭାଜପା ଏବଂ ବିଜେଡି ଲୋକଙ୍କୁ ଭୁଅଁା ବୁଲାଉଥିବା କହି ଭୋଟରଙ୍କୁ ପ୍ରଭାବିତ କରିବାରେ ଲାଗିପଡ଼ିଛନ୍ତି କେପି। ଆସନ୍ତା ୨୩ ତାରିଖରେ ମତଦାନ ହେବାକୁ ଥିବାବେଳେ ଜନତା କାହାକୁ କ୍ଷମତା ମୁକୁଟ ପିନ୍ଧାଇବେ ତାହା ଫଳାଫଳରୁ ଜଣାପଡ଼ିବ ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି।
ସୂଚନାଯୋଗ୍ୟ, ଢେଙ୍କାନାଳ ଲୋକ ସଭା ଆସନରୁ ୯ଜଣ ପ୍ରାର୍ଥୀ ପ୍ରତିତ୍ୱନ୍ଦ୍ୱିତା କରୁଛନ୍ତି। ସେମାନଙ୍କ ମଧ୍ୟରେ ବହୁଜନ ସମାଜ ପାର୍ଟିରୁ ପ୍ରଦ୍ୟୁମ୍ନ କୁମାର ନାୟକ, ହିନ୍ଦୁସ୍ଥାନ ନିର୍ମାଣ ଦଳରୁ ପ୍ରିୟବ୍ରତ ଗଡନାୟକ, ଆମ୍ବେଦକର ପାର୍ଟି ଅଫ ଇଣ୍ଡିଆରୁ ବିଜୟ କୁମାର ବେହେରା, ସୋସିଆଲିଷ୍ଟ ୟୁନିଟି ସେଣ୍ଟର ଅଫ୍ ଇଣ୍ଡିଆରୁ ମାନସୀ ସ୍ବାଇଁ, ଭାରତୀୟ ମାନବାଧିକାର ଫେଡେରାଲ ପାର୍ଟିରୁ ରଞ୍ଜନ କୁମାର ସାହୁ, ସମତାକ୍ରାନ୍ତି ଦଳରୁ ସରୋଜ କୁମାର ଶତପଥୀ ଅଛନ୍ତି।
