ଢେଙ୍କାନାଳ ଅଫିସ,୩ା୧୨
ଲାଇସେନ୍ସ, ଗାଡ଼ି କାଗଜପତ୍ର କରାଇବାକୁ ସୋମବାର ଢେଙ୍କାନାଳ ଆଞ୍ଚଳିକ ପରିବହନ କାର୍ଯ୍ୟାଳୟକୁ ଆସିଥିବା ଲୋକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଛି। ସକାଳ ୧୦ଟାରୁ ଇଣ୍ଟରନେଟ୍ ଲିଙ୍କ୍ ଫେଲ୍ ହୋଇଯିବାରୁ ନୂତନ ଲାଇସେନ୍ସ, ଫିଟନେସ ଯାଞ୍ଚ, ଗାଡି ପଞ୍ଜୀକରଣ ଆଦି ସମସ୍ତ କାର୍ଯ୍ୟ ଠପ୍ ହୋଇଯାଇଥିଲା। ଫଳରେ ସକାଳୁ ଜିଲାର ବିଭିନ୍ନ ଅଞ୍ଚଳରୁ ଆସି ଲମ୍ବାଲାଇନ ଲଗାଇଥିବା ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଅପରାହ୍ନ ୨ଟାରେ କର୍ମଚାରୀମାନେ କାଉଣ୍ଟର ବନ୍ଦ କରିଦେବାରୁ ଧାଡିରେ ଛିଡା ହୋଇଥିବା ଲୋକଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା। ପରେ ବହୁ ସଂଖ୍ୟାରେ ଲୋକେ କାର୍ଯ୍ୟାଳୟ ସମ୍ମୁଖ ସହରର ପ୍ରମୁଖ ରାସ୍ତା ଅବରୋଧ କରି ଆନ୍ଦୋଳନ କରିଥିଲେ। ଏଥିଯୋଗୁ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଖବରପାଇ ଏସ୍ଆଇ ଚନ୍ଦ୍ରକାନ୍ତ ସେଠୀଙ୍କ ନେତୃତ୍ୱରେ ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ବୁଝାଶୁଝା କରିଥିଲେ। ପରେ ପୋଲିସ ଉପସ୍ଥିତିରେ କେତେଜଣ ଲୋକ ନୂତନ ଭାବେ ଯୋଗ ଦେଇଥିବା ଆଞ୍ଚଳିକ ପରିବହନ ଅଧିକାରୀ ବସନ୍ତ କୁମାର ମାଝିଙ୍କୁ ସେମାନଙ୍କ ଅଭିଯୋଗ ଜଣାଇଥିଲେ ା ଲିଙ୍କ୍ ଫେଲ ଯୋଗୁ କାର୍ଯ୍ୟ ହୋଇ ନ ଥିବା ଲୋକମାନଙ୍କୁ ଆସନ୍ତା ରବିବାର ସକାଳ ୧୦ଟାରୁ କାର୍ଯ୍ୟ ଶେଷ ହେବା ପର୍ଯ୍ୟନ୍ତ ପୁଣିଥରେ ସମୟ ଦିଆଗଲା ବୋଲି ଆରଟିଓଙ୍କ ପକ୍ଷରୁ ଏକ ନୋଟିସ ଜାରି କରାଯିବା ପରେ ଉତ୍ତେଜନା ଥମିଥିଲା ା ଏ ସମ୍ପର୍କରେ ଆରଟିଓ ଅଧିକାରୀ ମାଝି କୁହନ୍ତି, ସକାଳ ୧୦ଟାରୁ ଲିଙ୍କ୍ ଫେଲ ହେବା ଯୋଗୁ ଏଭଳି ପରିସ୍ଥିତି ଉପୁଜିଥିଲା। ଯେଉଁମାନଙ୍କର କାର୍ଯ୍ୟ ହୋଇପାରିନାହିଁ, ସେମାନଙ୍କ ପାଇଁ ଆସନ୍ତା ରବିବାର ଦିନ ଧାର୍ଯ୍ୟ କରାଯାଇଛି। ଆଗାମୀ ଦିନରେ କାମାକ୍ଷାନଗରଠାରେ ଏକ ଶିବିର କରାଯାଇ ଉକ୍ତ ଉପଖଣ୍ଡ ଅଞ୍ଚଳ ନିମନ୍ତେ ଲୋକଙ୍କ ସୁବିଧା ପାଇଁ ଯାନବାହନ ସମ୍ପର୍କିତ କାଗଜପତ୍ର କାର୍ଯ୍ୟ କରାଯିବ ବୋଲି ଆରଟିଓ ସୂଚନା ଦେଇଥିଲେ ା
