ସୋନପୁର,୨୦।୧୧(ନି.ପ୍ର.)-ରାସ୍ତା ପ୍ରଶସ୍ତିକରଣ ନାଁରେ ରୟାଲ ପଡିଆକୁ ସଙ୍କୁଚିତ ପାଇଁ ଷଡଯନ୍ତ୍ର ଚାଲିଥିଲା। ପଡିଆ ସମ୍ମୁଖ ପଟୁ ୧୦.୭ ମିଟର ଓସାରର ପ୍ରାୟ ୨ଏକର ଜମି ପ୍ରଶାସନ ନିଜ ଅକ୍ତିଆରକୁ ନେଉଥିଲା। କିଛି ମାସ ପରେ ଦର୍ଶକ ଗ୍ୟାଲେରି ପାଇଁ ଆଉ ୩୦ ଫୁଟ୍ ଓସାରର ଜମି ଅଧିଗ୍ରହଣ ହୋଇଥାନ୍ତା। ପଡିଆ ଭିତରେ ବିଦ୍ୟୁତ୍ ଖୁଣ୍ଟ ପୋତାଯାଇ ତାର ଟଣା ଯାଇଥିଲା। ଏ ସମ୍ପର୍କରେ ଗତ ଅକ୍ଟୋବର ୨୫ତାରିଖ ଧରିତ୍ରୀରେ ବଡ ବଡିଆଙ୍କୁ ଫାଇଦା ପାଇଁ ମସୁଧା, ସଙ୍କୁଚିତ ହେବ ରୟାଲ ପଡିଆ ଶୀର୍ଷକ ତଥ୍ୟଭିତ୍ତିକ ଖବର ପ୍ରକାଶ ପାଇଥିଲା। ଘଟଣାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ସହରର ବୁଦ୍ଧିଜୀବୀ ଓ କ୍ରୀଡାବିତ୍ ପଡିଆର ସୁରକ୍ଷା ପାଇଁ ଦୁଇଟି ପର୍ଯ୍ୟାୟରେ ଜିଲାପାଳ ମୋନିଷା ବାନାର୍ଜୀଙ୍କୁ ଭେଟି ଦରଖାସ୍ତ ପ୍ରଦାନ କରିଥିଲେ। ମଙ୍ଗଳବାର ଜିଲାପାଳ ବାନାର୍ଜୀ ପୂର୍ତ୍ତ ବିଭାଗ ପକ୍ଷରୁ ନିର୍ମାଣ ହେବାକୁ ଥିବା ମହାନଦୀ ବ୍ରିଜ୍ରୁ କୁଞ୍ଜ ଛକ ପର୍ଯ୍ୟନ୍ତ ୩.୨୬୦କିମି. ୪ ଥାକିଆ ରାସ୍ତା ଓ ରୟାଲ ପଡିଆର କ୍ଷେତ୍ରୀୟ ତଦନ୍ତ କରିଥିଲେ। ଜିଲାପାଳଙ୍କ ସହିତ ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା, ପୂର୍ତ୍ତ ବିଭାଗର ନିର୍ବାହୀ ଯନ୍ତ୍ରୀ ଇଂ ଅସିତ କୁମାର ବଡପଣ୍ଡା ଓ ମ୍ୟୁନିସିପାଲିଟି ନିର୍ବାହୀ ଅଧିକାରୀ ଜଗଦୀଶ ଚନ୍ଦ୍ର ମହାନନ୍ଦ ମଧ୍ୟ ଉପସ୍ଥିତ ଥିଲେ । ଅନୁଧ୍ୟାନ ପରେ ଜିଲାପାଳ କହିଥିଲେ ରୟାଲ ପଡିଆକୁ ସଙ୍କୁଚିତ କରାଯିବନି। ଅପରପାର୍ଶ୍ୱରେ ଥିବା ସରକାରୀ ଜମିରୁ ଜବରଦଖଲ ହଟା ଯାଇ ରାସ୍ତା ନିର୍ମାଣ ହେବ । ଏଥିପାଇଁ ନୂତନ ସର୍ଭେ ହେବ। ରାସ୍ତା ପାଇଁ କ୍ଷତିଗ୍ରସ୍ତ ହେଉଥିବା ବିଦ୍ୟାଳୟ, ମାର୍କେଟ କମ୍ପ୍ଲେକ୍ସ, ଜିଲାପାଳଙ୍କ କାର୍ଯ୍ୟାଳୟ ଓ କୃଷି ବିଭାଗ କାର୍ଯ୍ୟାଳୟର ପ୍ରାଚୀର ନିର୍ମାଣ ପାଇଁ ପୂର୍ତ୍ତ ବିଭାଗ ଆବଶ୍ୟକ ଅର୍ଥ ପ୍ରଦାନ କରିବ। ନିୟମ ଅନୁଯାୟୀ ସରକାରୀ, ବେସରକାରୀ ଓ ଦେବୋତ୍ତର ଜମି ଅଧିଗ୍ରହଣ କରାଯିବ ବୋଲି ସୂଚନା ଦେଇଥିଲେ। ଆବଶ୍ୟକସ୍ଥଳେ ପଡିଆ ଭିତରୁ ବିଦ୍ୟୁତ୍ ଖୁଣ୍ଟ ହଟିବ।
