ବେତନଟୀ,୩ା୮(ଡି.ଏନ୍.ଏ.)- ସଂସଦ ଅଧିବେଶନରେ ଉଭୟ ଲୋକସଭା ଓ ରାଜ୍ୟସଭାରେ ପାରିତ ହୋଇଥିବା ୨୦୧୯ ସୂଚନା ଅଧିକାର ଆଇନ୍ ସଂଶୋଧନ ଚିଠା ବିଲ୍କୁ ରାଷ୍ଟ୍ରପତି ଅନୁମୋଦନ ନ କରିବାକୁ ଅନୁରୋଧ କରାଯାଇଛି। ବେତନଟୀ ସିଭିଲ୍ ସୋସାଇଟି ପକ୍ଷରୁ ଏହି ମର୍ମରେ ଏକ ସ୍ମାରକପତ୍ର ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଶୁକ୍ରବାର ବେତନଟୀ ବିଡିଓଙ୍କୁ ପ୍ରଦାନ କରାଯାଇଛି। ସ୍ମାରକପତ୍ର ପ୍ରଦାନ ସମୟରେ ସୋସାଇଟିର ସଭାପତି ଚୂଡାମଣି ମହାପାତ୍ର, ସମ୍ପାଦକ ସଚ୍ଚିଦାନନ୍ଦ ମହାନ୍ତି, ଭବାନୀ ଶଙ୍କର ପରିଡା, ହରିଶ୍ ଚନ୍ଦ୍ର ନନ୍ଦଗୋସ୍ବାମୀ, ବିଜୟ କୁମାର ଦ୍ୱିବେଦୀ, ହରେନ୍ଦ୍ରନାଥ ବାରିକ, ରବିନ୍ଦ୍ର ଖଟୁଆ, ସହଦେବ ଗିରି, ବିରଞ୍ଚି ଦଣ୍ଡପାଟ ପ୍ରମୁଖ ଉପସ୍ଥିତ ଥିଲେ। ଏହି ବିଲ୍ ସଂଶୋଧନ ଦ୍ୱାରା କେନ୍ଦ୍ର ଓ ରାଜ୍ୟ କିମିଶନର୍ଙ୍କ କାର୍ଯ୍ୟକାଳ, ଦରମା ଆଦିକୁ କେନ୍ଦ୍ର ସରକାର ନିଜ ନିୟନ୍ତ୍ରଣକୁ ନେଇ ନିଜ ଇଚ୍ଛାରେ ପରିଚାଳିତ କରିପାରିବେ। ୨୦୦୫ ମସିହାରୁ ପ୍ରଚଳିତ ଥିବା ସୂଚନା ଅଧିକାର ଆଇନ୍ ବଳରେ ସାଧାରଣ ନାଗରିକ ସ୍ବାଧୀନ ଭାବେ ତଥ୍ୟ ପାଇ ପାରୁଥିଲେ। ମାତ୍ର ସଂଶୋଧିତ ଚିଠା ବିଲ୍ ରାଷ୍ଟ୍ରପତିଙ୍କ ଅନୁମୋଦନ ପାଇବା ପରେ ଏହି ବିଭାଗକୁ ସରକାର ନିୟନ୍ତ୍ରଣରେ ରଖୁଥିବାରୁ ସାଧାରଣ ନାଗରିକମାନଙ୍କୁ ତଥ୍ୟ ଦେବାରେ କଟକଣା କରାଯିବ। ଜନସାଧାରଣଙ୍କଠାରୁ ମତାମତ ସଂଗ୍ରହ କରା ନ ଯାଇ ଏଭଳି ସଂଶୋଧନ କେବଳ ସରକାର ଓ ସରକାରୀକଳର ସ୍ବାର୍ଥରକ୍ଷା ପାଇଁ ଉଦ୍ଦିଷ୍ଟ ବୋଲି ସିଭିଲ୍ ସୋସାଇଟି ପକ୍ଷରୁ କୁହାଯାଇଛି।
