ନିକଟରେ ରାଜ୍ୟ ଚଳଚ୍ଚିତ୍ର ପୁରସ୍କାରରେ ସ୍ବଚ୍ଛତାକୁ ନେଇ ପ୍ରଯୋଜକମାନେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ପ୍ରକୃତପକ୍ଷେ ବିଗତ ଦିନର ପୁରସ୍କାର ବେଳେ କଳାକାର, ଟେକ୍ନିସିଆନ, ପ୍ରଯୋଜକ, ନିର୍ଦ୍ଦେଶକମାନେ ନିଷ୍ପତ୍ତିକୁ ସ୍ବାଗତ କରୁଥିଲେ। ରାଜ୍ୟ ଚଳଚ୍ଚିତ୍ର ପୁରସ୍କାର ଜାତୀୟ ଚଳଚ୍ଚିତ୍ର ପୁରସ୍କାରର ପ୍ରାୟତଃ ନୀତିନିୟମକୁ ଆଧାରକରି ହୋଇଥାଏ। ରାଜ୍ୟ ଚଳଚ୍ଚିତ୍ର ପୁରସ୍କାର ୪ ବର୍ଷ ଅର୍ଥାତ୍ ୧୯୯୯ ମସିହାରୁ ୨୦୦୨ ମସିହା ପର୍ଯ୍ୟନ୍ତ ଦିଆଯାଇ ନ ଥିଲା। ରାଜ୍ୟ ଚଳଚ୍ଚିତ୍ର ପୁରସ୍କାରରେ ଜୁରିମାନଙ୍କର ନିଷ୍ପତ୍ତି ଗଠନମୂଳକ ହେବା ସହ ସେଥିରେ ସ୍ବଚ୍ଛତା ରହିବା ନିହାତି ଆବଶ୍ୟକ। ଜାତୀୟ ପୁରସ୍କାରରେ ଗୋଟିଏ ବର୍ଷ ଜୁରିରେ ଥିଲେ ପରବର୍ତ୍ତୀ ୩ ବର୍ଷ ଜୁରି ସଦସ୍ୟ କରାଯାଏ ନାହିଁ। ରାଜ୍ୟରେ ଏହାର ବ୍ୟତିକ୍ରମ ୩ ବର୍ଷ ହେବ ଉପଲବ୍ଧି ହେଉଛି। ମୌଳିକ କାହାଣୀ ଉପରେ ପର୍ଯ୍ୟବସିତ ଚଳଚ୍ଚିତ୍ରକୁ ଶ୍ରେଷ୍ଠତ୍ୱ କରିବା ପାଇଁ ଉଲ୍ଲେଖ ରହିଛି। ହେଲେ ଗତ କିଛି ବର୍ଷ ହେବ ଏହି ପୁରସ୍କାର ପାଇଁ ଚୟନରେ ସ୍ବଚ୍ଛତାକୁ ନେଇ ପ୍ରଶ୍ନ ଉଠିଛି। ସେଥିପାଇଁ ସ୍ବଚ୍ଛତା ଦିଗ ରେ ବରିଷ୍ଠ ଅଭିନେତ୍ରୀ ମହାଶ୍ୱେତା ରାୟ ବିଗତ ଦିନରେ ଏହାକୁ ପ୍ରତିବାଦ କରିବା ସହ ସଂସ୍କୃତି ବିଭାଗ ପୁରସ୍କାରରେ ପରିଷ୍କାର କରୁ ବୋଲି ତାଙ୍କ ମନ୍ତବ୍ୟ ପ୍ରଦାନ କରିଥିଲେ। ସାମଗ୍ରିକ କୃତି ପାଇଁ ବରିଷ୍ଠତା ଭିତ୍ତିରେ ମର୍ଯ୍ୟାଦାଜନକ ଜୟଦେବ ପୁରସ୍କାରରେ ପୁରସ୍କୃତ ପ୍ରତିଭାମାନଙ୍କୁ ମନୋନୀତ କରାଯାଏ। ଏ କ୍ଷେତ୍ରରେ ଟାଳଟୁଳ ନୀତି ଆଦୌ ଗ୍ରହଣୀୟ ନୁହେଁ।
ରାଜ୍ୟ ସରକାରଙ୍କ ସଂସ୍କୃତି ବିଭାଗ ପକ୍ଷରୁ ୧୯୭୩ ମସିହାରୁ ରାଜ୍ୟ ଚଳଚ୍ଚିତ୍ର ପୁରସ୍କାର ଦିଆହୋଇ ଆସୁଅଛି। ପୁରସ୍କାର ପାଇଥିବା ବ୍ୟକ୍ତିଙ୍କୁ ଯଦି ଠିକ୍ ନିର୍ଣ୍ଣୟ କରି ପୁରସ୍କୃତ କରାଯିବ ତାହା ପରିଷ୍କାର ଲାଗେ। ସୁପାରିସ ଜନିତ ପୁରସ୍କାର ଦୃଷ୍ଟିକଟୁ ହୋଇଥାଏ। ଜନସାଧାରଣ ଉପଲବ୍ଧି କରନ୍ତି ଯଦି ପୁରସ୍କାର ପରିଷ୍କାର ହୋଇଥିବ ତାଙ୍କ ପ୍ରତି ସ୍ବତଃସ୍ଫୂର୍ତ୍ତ ସମ୍ମାନବୋଧ ଆସେ। ଆମେ ଯଦି ଲବିକରି ପୁରସ୍କାର ନେଉଥିବା ତାହା ଗୌଣ ପରି ଲାଗେ। ରାଜ୍ୟ ଚଳଚ୍ଚିତ୍ର ପୁରସ୍କାରରେ ସଙ୍ଗୀତ କ୍ଷେତ୍ରରେ ସାମଗ୍ରିକ କୃତି ଥାଇ ଜୟଦେବ ପୁରସ୍କାର ଅତୀତରେ ବାଳକୃଷ୍ଣ ଦାଶ, ଅକ୍ଷୟ ମହାନ୍ତି, ପ୍ରଫୁଲ୍ଲ କର ପୁରସ୍କାର ପାଇଥିଲେ। ସଙ୍ଗୀତ ନିର୍ଦ୍ଦେଶକ ଶାନ୍ତନୁ ମହାପାତ୍ର, ବାସୁଦେବ ରଥ, ମୁସୀରଙ୍କ ଭଳି ଅଭିଜ୍ଞ ବ୍ୟକ୍ତି କେବେ ଏହି ସମ୍ମାନଜନକ ଜୟଦେବ ପୁରସ୍କାର ପାଉଛନ୍ତି ତାହା ଜାଣିବାକୁ ଆମକୁ କେବଳ ଅପେକ୍ଷା କରିବାକୁ ପଡ଼ିବ।