ବଲାଙ୍ଗୀର ଅଫିସ, ୨ା୬: ବଲାଙ୍ଗୀର ଜିଲା ଆଗଲପୁର ବ୍ଳକ ଲୁହୁରାମୁଣ୍ଡା ପଞ୍ଚାୟତର ଲୁହୁରାମୁଣ୍ଡା ଓ ସାନଫାସଡର ଚାଷୀମାନେ ରବିଧାନର ଟାର୍ଗେଟ ଅବ୍ୟବସ୍ଥାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ମଙ୍ଗଳବାର ସେମାନେ ଜିଲା ଯୋଗାଣ ଅଧିକାରୀଙ୍କ କାର୍ଯ୍ୟାଳୟକୁ ଆସି ଫେରାଦ ହୋଇଛନ୍ତି। ଏହି ଚାଷୀମାନଙ୍କ ଧାନ କିଣିବା ପାଇଁ ମଁା ଗୌରୀ ସ୍ବୟଂ ସହାୟକ ଦଳକୁ ଦାୟିତ୍ୱ ଦିଆଯାଇଛି । ହେଲେ ଏହି ଏସ୍ଏଚ୍ଜିଠାରୁ ଚାଷୀମାନେ ଜାଣିବାକୁ ପାଇଥିଲେ ଯେ, ଦ୍ୱିତୀୟ ପାଳିର ଧାନ କିଣିବା ପାଇଁ ୧୮୦୦କୁଇଣ୍ଟାଲ ଟାର୍ଗେଟ ଆସିଥିଲା। ଟିଟିଲାଗଡର ଦୁଇଟି ମିଲକୁ ୫ଶହ ଲେଖାଏ ଏଭଳି ୧୦୦୦ କୁଇଣ୍ଟାଲ ଓ ଅନ୍ୟ ଏକ ମିଲକୁ ୮ ଶହ କୁଇଣ୍ଟାଲ ଧାନ କିଣିବା ପାଇଁ ଅନୁମତି ମିଳିଥିଲା । ପରବର୍ତ୍ତୀ ସମୟରେ ଦିଆଯାଇଥିବା ୧୮ଶହ କୁଇଣ୍ଟାଲ ଟାର୍ଗେଟରୁ ୧ହଜାର କୁଇଣ୍ଟାଲ କାଟି ଦିଆଯାଇଥିଲା । ଗ୍ରାମପଞ୍ଚାୟତର ଚାଷୀଙ୍କ କେବଳ ଧାନ କିଣିବା ପାଇଁ ୫ ହଜାର କୁଇଣ୍ଟାଲର ଟାର୍ଗେଟ ଆବଶ୍ୟକତା ଥିବାବେଳେ ୧୮ଶହ କୁଇଣ୍ଟାଲ ଟାର୍ଗେଟ ଦେଇ ସେଥିରୁ ପୁଣି ୧ ହଜାର କୁଇଣ୍ଟାଲ କାଟି ଦେବାକୁ ନେଇ ଚାଷୀମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ । ଉଭୟ ଗଁାର ଚାଷୀମାନେ ବିଭାଗର ଏଭଳି ନିଷ୍ପତ୍ତି ପ୍ରତିବାଦରେ ଜିଲା ଯୋଗାଣ ଅଧିକାରୀଙ୍କୁ ଦାବିପତ୍ର ଦେଇଥିଲେ।
