ପୁରୀ ଅଫିସ, ୧୬।୬: ଚଳିତ ବର୍ଷ କରୋନା ପାଇଁ ରଥଯାତ୍ରା ହେବ କି ନାହିଁ ସେ ନେଇ କିଛି ସ୍ପଷ୍ଟ ହୋଇ ନାହିଁ। ସମସ୍ତେ ମହାପ୍ରଭୁଙ୍କ ରଥଯାତ୍ରାକୁ ନେଇ ଦ୍ୱନ୍ଦ୍ୱରେ ରହିଛନ୍ତି। ରଥଯାତ୍ରାକୁ ନେଇ ଏଭଳି ଆଶା ଆଶଙ୍କା ଲାଗି ରହିଥିବା ବେଳେ ମଙ୍ଗଳବାର ଏହି ପ୍ରସଙ୍ଗରେ ମନ୍ତବ୍ୟ ରଖିଛନ୍ତି ମହାପ୍ରଭୁ ଶ୍ରୀଜଗନ୍ନାଥଙ୍କ ମୁଖ୍ୟ ବାଡ଼ଗ୍ରାହୀ ଜଗନ୍ନାଥ ସ୍ବାଇଁ ମହାପାତ୍ର(ଜଗୁନି)। ଗଣମାଧ୍ୟମକୁ ସେ କହିଛନ୍ତି ଯେ, ଯଦି ଏଥର ରଥଯାତ୍ରା ବନ୍ଦ ହୋଇଯାଏ ତେବେ କଳଙ୍କମୟ ଇତିହାସ ସୃଷ୍ଟି ହେବ। ଆମେ ମଣିଷ ହୋଇ ରଥଯାତ୍ରା ବନ୍ଦ ହେଉ ବୋଲି କେବେ ଚାହିଁବା ନାହିଁ। ରାଜ୍ୟ ସରକାର ମଧ୍ୟ ରଥଯାତ୍ରା ପ୍ରସଙ୍ଗରେ କେବେ ପଛାଇବେ ନାହିଁ। ଯେଉଁଭଳି ସୁରୁଖୁରୁରେ ସ୍ନାନଯାତ୍ରା ସମ୍ପନ୍ନ କଲେ ସେଭଳି ରଥଯାତ୍ରା କରିବେ। ଯଦି ରଥ ଯାତ୍ରା ବନ୍ଦ ହେବ ତେବେ ଓଡ଼ିଶା ସରକାର ଓ ଭକ୍ତଙ୍କ ପାଇଁ ଅଶୁଭ ହେବ। ବର୍ତ୍ତମାନ କରୋନାକୁ ନେଇ ଯେଉଁ ଭୟ ଲାଗିରହିଛି ରଥଯାତ୍ରା ହେଲେ ତାହା ଦୂର ହୋଇଯିବ। ସେବାୟତ ଓ ପୋଲିସ ମିଶି ରଥ ଟାଣିପାରିବେ ବୋଲି ସେ କହିଛନ୍ତି।
