ନୂଆଦିଲ୍ଲୀ,୧୬।୬: ବିଶ୍ୱ ପାଇଁ ଏବେବି ଚିନ୍ତାର କାରଣ ପାଲଟିଛି କରୋନା ସଂକ୍ରମଣ। ଦେଶରେ ୨୪ ଘଣ୍ଟାରେ ୧୦ ହଜାରୁ ଅଧିକ କରୋନା ସଂକ୍ରମିତଙ୍କୁ ଚିହ୍ନଟ କରାଯିବା ମଧ୍ୟ ଚିନ୍ତାର ବିଷୟ। ଏହାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ୨୧ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟମାନଙ୍କ ସହ କଥା ହୋଇଛନ୍ତି। ଏହି ଅବସରରେ ମୋଦି କହିଛନ୍ତି ଅନ୍ଲକ୍-୧ରୁ ଆମକୁ ବହୁତ କିଛି ଶିଖିବାକୁ ମିଳିଛି। ତେବେ କରୋନାରେ ଜଣଙ୍କର ବି ମୃତ୍ୟୁ ଦୁଃଖଦାୟକ। ସାମିଜିକ ଦୂରତା ଓ ସାନିଟାଇଜେଶନକୁ ଗୁରୁତ୍ୱ ଦେଇଛନ୍ତି ମୋଦି। ମାସ୍କର ବ୍ୟବହାର ଜରୁରୀ। ଭାରତରେ ଏବେ ପର୍ଯ୍ୟନ୍ତ କରୋନାରେ ସୁସ୍ଥହାର ୫୦ ପ୍ରତିଶତରୁ ଅଧିକ ଥିବା ବେଳେ ମୃତ୍ୟୁହାର ଅନ୍ୟ ଦେଶ ତୁଳନାରେ କମ୍ ରହିଥିବା ମୋଦି କହିଛନ୍ତି। ତେବେ କରୋନାର ପ୍ରଭାବ ଭାରତରେ ବିନାଶକାରୀ ନୁହେଁ ବୋଲି ମଧ୍ୟ ସେ କହିଛନ୍ତି। କରୋନା ସଂକ୍ରମଣ ଯେତେ କମ୍ ହେବ ଅର୍ଥବ୍ୟବସ୍ଥା ସେତେ ବୃଦ୍ଧି ହେବ। ଭବିଷ୍ୟତରେ ଯେତେବେଳେ କରୋନା ମାହାମାରୀ କଥା ଆଲୋଚନା ହେବ ସେତେବେଳେ ଆମେ କେମିତି ଏକାଠି ଲଢୁଥିଲେ ଯାହା ଅନ୍ୟମାନଙ୍କ ପାଇଁ ଉଦାହାରଣ ପାଲଟିଥିଲା। ତେବେ ଠିକ୍ ସମୟରେ ଠିକ୍ ନିଷ୍ପତ୍ତି କରୋନାକୁ ଦୂରେଇ ଦେବ ବୋଲି ସେ କହିଛନ୍ତି। ସୂଚନାଯୋଗ୍ୟ, ବୁଧବାର ସେ ଆଉ ୧୫ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟମାନଙ୍କ ସହ କଥା ହେବେ।
