ପୁରୁଷୋତ୍ତମପୁର,୨୫।୨(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ରଣଝାଲି ଗ୍ରାମର ୪ ଓ ୫ ନଂ ୱାର୍ଡରେ ପାନୀୟଜଳର ଘୋର ଅଭାବ ଦେଖାଦେଇଛି। ଏ ନେଇ ଦୀର୍ଘଦିନ ଧରି ଲୋକେ ବ୍ଲକ ଓ ଜିଲା ପ୍ରଶାସନଠାରେ ବାରମ୍ବାର ଅଭିଯୋଗ କରୁଥିଲେ ମଧ୍ୟ କେହିହେଲେ ଗୁରୁତ୍ୱ ଦେଉନାହାନ୍ତି। ଏହାର ପ୍ରତିବାଦରେ ମଙ୍ଗଳବାର ଗ୍ରାମର ମହିଳାମାନେ ଏକତ୍ରିତ ହୋଇ ଗ୍ରାମଠାରୁ ଏକ ଶୋଭାଯାତ୍ରାରେ ହାଣ୍ଡି ମାଠିଆ ଧରି ବସୁଧା ଯୋଜନା ଓ ଜଳଯୋଗାଣ ମିଶନ କାହା ପାଇଁ। ସରକାର ଆମକୁ ପିଇବାକୁ ପାଣିଦିଅର ନାରାଦେଇ ଦୀର୍ଘ ଚାରି କିଲୋମିଟର ରାସ୍ତା ଚାଲି ପୁରୁଷୋତ୍ତମପୁର ଆସି ବ୍ଲକ କାର୍ଯ୍ୟାଳୟକୁ ଘେରାଉ କରିବା ସହ ବିଡିଓଙ୍କ ପ୍ରକୋଷ୍ଠ ଆଗରେ ଧାରଣାରେ ବସି ରହିଥିଲେ। ଏହି ଆନ୍ଦୋଳନ ଯୋଗୁ ବ୍ଲକ କାର୍ଯ୍ୟରେ ସମସ୍ୟା ଉପୁଜି ଥିଲା। ଏହାକୁ ନେଇ ବିଡିଓ ସୀମାଞ୍ଚଳ ମହାନ୍ତି ଆନ୍ଦୋଳନକାରୀଙ୍କ ନିକଟକୁ ବୁଝାଶୁଝା କରିବା ସହ ଗ୍ରାମ୍ୟ ଜଳଯୋଗାଣ କନିଷ୍ଠ ଯନ୍ତ୍ରୀ ସରୋଜ କୁମାର ପାଢୀଙ୍କୁ ଡକାଇ ଗ୍ରାମରେ ଖୋଳା ଯାଇଥିବା ନୂତନ ବୋରୱେଲରେ ମୋଟର ଲଗାଇ ତାହାର କାର୍ଯ୍ୟ କ୍ଷମତା କରାଯିବ। ଏଥିସହ ଦଶ ଦିନ ମଧ୍ୟରେ ପାଣି ଯୋଗାଇବାର ପ୍ରତିଶ୍ରୁତି ଦେବା ପରେ ଆନ୍ଦୋଳନ ହଟିଥିଲା। ଏହାସହ ବିଡିଓ ଗ୍ରାମକୁ ଯାଇ ସମସ୍ୟାକୁ ବୁଲି ଦେଖିଥିଲେ।
ସୂଚନାଯୋଗ୍ୟ, ରଣଝାଲି ଗ୍ରାମରେ ୭ ଗୋଟି ଓ୍ବାର୍ଡରେ ବସବାସ କରୁଥିବା ପ୍ରାୟ ୪ ହଜାରରୁ ଊର୍ଦ୍ଧ୍ୱ ଜନସାଧାରଣଙ୍କ ଲାଗି ୧ଲକ୍ଷ ୬୦ ହଜାର କ୍ଷମତା ସମ୍ପୂର୍ଣ୍ଣ ଓଭରହେଡ ପାଣି ଟାଙ୍କି ନିର୍ମାଣ କରାଯାଇ ଗୋଟିଏ ବୋର୍ୱେଲ ନିର୍ମାଣ କରାଯାଇଥିଲା । ମାତ୍ର ଏହି ବୋରୱେଲଟି ଆବଶ୍ୟକ ପରିମାଣର ପାଣି ଯୋଗାଇ ପାରୁ ନ ଥିବା ହେତୁ ଗ୍ରାମର ଅଧା ଅଞ୍ଚଳକୁ ପାଣି ଯୋଗାଣ ହୋଇ ନ ପାରିବାରୁ ଗ୍ରାମବାସୀଙ୍କ ଅଭିଯୋଗକୁ ନେଇ ଗ୍ରାମ ନିକଟରେ ଏକ ନୂତନ ବୋରୱେଲ ଦୁଇବର୍ଷ ତଳେ ଖୋଳା ଯାଇଥିଲା। ମାତ୍ର ଏହାକୁ କାର୍ଯ୍ୟକ୍ଷମ କରାଯାଉ ନ ଥିବା ହେତୁ ଲୋକଙ୍କୁ ପାନୀୟଜଳ ଟୋପାଏ ମିଳି ପାରୁନାହିଁ। ଏହାକୁ ନେଇ ଜନସାଧାରଣ ପ୍ରଶାସନଠାରେ ବାରମ୍ବାର ଅଭିଯୋଗ କରିଥିଲେ ମଧ୍ୟ କେହି ଗୁରୁତ୍ୱ ଦେଉନାହାନ୍ତି ।
