ପୁରୀ ଅଫିସ, ୧୭ା୯ : ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିବସକୁ ମଙ୍ଗଳବାର ପୁରୀରେ ମୋଦିଙ୍କ ଫ୍ୟାନ ଭାବେ ପରିଚିତ ଅକ୍ଷୟ ଜୟସିଂ ନିଆର ଢ଼ଙ୍ଗରେ ପାଳନ କରିଛନ୍ତି। ଅକ୍ଷୟ ପରିବେଶ ଓ ପକ୍ଷୀ ସୁରକ୍ଷା, ପ୍ଲାଷ୍ଟିକ, ପଲିଥିନ ଓ ନିଶା ମୁକ୍ତ ଭାରତ ଏବଂ ଶ୍ରୀକ୍ଷେତ୍ରର ସ୍ବଚ୍ଛତା ଉପରେ ଗୁରୁତ୍ୱରୋପ କରିଛନ୍ତି।
ସକାଳ ସମୟରେ ପୌର ସଦନ ଛକ ସ୍ଥିତ ଜୟସିଂ ଚାହା ଦୋକାନରେ ଆୟୋଜିତ ଉତ୍ସବରେ ମୁଖ୍ୟଅତିଥି ଭାବେ ବିଧାୟକ ଜୟନ୍ତ କୁମାର ଷଡ଼ଙ୍ଗୀ ଯୋଗଦେଇ କେକ କାଟି ମୋଦିଙ୍କୁ ଜନ୍ମଦିନର ଶୁଭେଚ୍ଛା ଜଣାଇଥିଲେ। ଏହି ଅବସରରେ ବିଭିନ୍ନ କିସମର ଚାରା ରୋପଣ କରି ପରିବେଶ ସୁରକ୍ଷାର ବାର୍ତା ଦେଇଥିଲେ। ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ଅକ୍ଷୟ ୫ହଜାରରୁ ଊର୍ଦ୍ଧ୍ୱ ଲୋକଙ୍କ ମାଟିପାତ୍ର ରେ ଚାହା ଏବଂ ରସଗୋଲା ବଣ୍ଟନ କରିଥିଲେ। ସେ କହିଲେ ଯେ, ଶ୍ରୀକ୍ଷେତ୍ରର ସ୍ବଚ୍ଛତା ଲାଗି ସମସ୍ତଙ୍କ ସହଯୋଗ ଆବଶ୍ୟକ। ବାହାରରେ କୌଣସି ସ୍ଥାନରେ ଅଳିଆ ପକାଇବା ପରିବର୍ତ୍ତେ ପୌର ପ୍ରଶାସନ ପକ୍ଷରୁ ଦିଆଯାଇଥିବା ଡଷ୍ଟବିନର ବ୍ୟବହାର ଏବଂ ନିଜ ଅଞ୍ଚଳରେ ସ୍ବଚ୍ଛତା ପ୍ରତି ଗୁରୁତ୍ୱ ଦେଇ ପ୍ରଧାନମନ୍ତ୍ରୀଙ୍କ ସ୍ବପ୍ନକୁ ସାକାର କରିବା ଲାଗି ଆହ୍ବାନ ଦେଇଛନ୍ତି। ସପ୍ତାହ ବ୍ୟାପୀ ଚାରାରୋପଣ, ସ୍ବଚ୍ଛତା କାର୍ଯ୍ୟକ୍ରମ ଆୟୋଜନ କରାଯିବ ବୋଲି କହିଛନ୍ତି। ଅନ୍ୟମାନଙ୍କ ମଧ୍ୟରେ ଅକ୍ଷୟଙ୍କ ଝିଅ ଆର୍ଯ୍ୟା ଜୟସିଂ, ଭାଜପା ଜିଲା ସଭାପତି ପ୍ରଭଞ୍ଜନ ମହାପାତ୍ର, ଯୁବମୋର୍ଚ୍ଚା ସଭାପତି ଜୟନ୍ତ ଦାଶ, ଉପସଭାପତି ଦିଗଦର୍ଶନ ପଟ୍ଟନାୟକ, ରବି ନାରାୟଣ ଦାଶ, ବ୍ରଜବନ୍ଧୁ ମହାରଣା, ଚନ୍ଦ୍ରଶେଖର ମିଶ୍ର, ଜଗନ୍ନାଥ ପ୍ରତିହାରୀ, ସୌମ୍ୟରଞ୍ଜନ ପାତ୍ର, ବଦ୍ରୀ ମିଶ୍ର ପ୍ରମୁଖ ଉପସ୍ଥିତ ଥିଲେ। ସେହିପରି ଏମ.କେ ଜୁଡୋ ଗ୍ରୁପ ପକ୍ଷରୁ ଗାନ୍ଧୀ ପାର୍କ ଠାରେ ମୋଦିଙ୍କ ଜନ୍ମଦିବସ ପାଳନ କରି ତାଙ୍କ ଆରୋଗ୍ୟ କାମନା କରିଥିଲେ। ଏହି ଅବସରରେ ପୁରୀରେ ଏକ ଉନ୍ନତମାନର ଷ୍ଟ୍ରାଡିୟମ ନିର୍ମାଣ ଲାଗି ଦାବି କରିଥିଲେ। ଅନୁଷ୍ଠାନର ଆବାହକ ମନୋଜ କୁମାର ସାହୁ, ଅଭିରାମ ବିଶ୍ୱକର୍ମା, ସୁନିଲ କୁମାର ମହାପାତ୍ର, ବିନୟ, ଅଶ୍ୱିନୀ ପଟ୍ଟନାୟକ ପ୍ରମୁଖ ସାମିଲ ହୋଇଥିଲେ।
