କଟକ ଅଫିସ୍,୧।୫: ଜଣେ ମୁସଲମାନ୍ ବ୍ୟକ୍ତିଙ୍କର ଏକ ଘରୋଇ ନର୍ସିଂହୋମ୍ରେ ଡାଏଲିସିସ୍ ନ ହୋଇ ପାରିବାରୁ ତାଙ୍କର ମୃତ୍ୟୁ ଘଟିଥିଲା। ଏ ନେଇ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା। ମାମଲାରେ ରାଜ୍ୟ ସରକାର ଗୁରୁବାର ହାଇକୋର୍ଟରେ ଜବାବ ଦାଖଲ କରିଛନ୍ତି। ସରକାରୀ କିମ୍ବା ଘରୋଇ ହସ୍ପିଟାଲ ହେଉ ଚିକିତ୍ସାରେ ଜାତି, ଧର୍ମର ଯେପରି କୌଣସି ପାତରଅନ୍ତର ନ ହୁଏ, ରାଜ୍ୟ ସରକାର ତାହାକୁ ସୁନିଶ୍ଚିତ କରୁଛନ୍ତି। ରାଜ୍ୟ ସରକାରଙ୍କ ତରଫରୁ ଆଡଭୋକେଟ୍ ଜେନେରାଲ୍ ହାଇକୋର୍ଟରେ ଉପରୋକ୍ତ ଜବାବ ଦାଖଲ କରିଛନ୍ତି। ଏହାପରେ ବିଚାରପତି ଶତ୍ରୁଘନ ପୂଜାହାରୀ ଏବଂ କେ.ଆର୍. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଘଟଣାର ତଦନ୍ତ ପାଇଁ କଟକ ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ତଦନ୍ତପରେ ରାଜ୍ୟ ସରକାରଙ୍କ ନିକଟରେ ରିପୋର୍ଟ ଦାଖଲ ପାଇଁ କୁହାଯାଇଛି।
ଏଥିସହ କୌଣସି ରୋଗୀଙ୍କୁ ସରକାରୀ କିମ୍ବା ଘରୋଇ ହସ୍ପିିଟାଲ୍ରେ ଯେମିତି ଚିକିତ୍ସା ପାଇଁ ମନା ନ କରାଯାଏ, ତାହା ରାଜ୍ୟ ସରକାର ନିଶ୍ଚିତ କରନ୍ତୁ । ଯଦି ଉକ୍ତ ହସ୍ପିିଟାଲ୍ରେ ଚିକିତ୍ସା ସୁବିଧା ନ ଥିବ, ତେବେ ଯେଉଁଠାରେ ସୁବିଧା ଥିବ, ସେଠାକୁ ସ୍ଥାନାନ୍ତର କରାଯାଉ ବୋଲି ସରକାରଙ୍କୁ ନିର୍ଦ୍ଦେଶ ଦିଆଯାଇଛି। ଏଥିସହ ମାମଲାର ଅନ୍ତ ଘଟିଛି। କଟକ ଅଜରା ଜମାଲ୍ ଏହି ଜନସ୍ବାର୍ଥ ମାମଲାର ଆବେଦନ କରିଥିବା ବେଳେ ଆଇନଜୀବୀ କିଶୋର କୁମାର ରାଉତ ଏହାକୁ ପରିଚାଳନା କରିଥିଲେ ।
ପ୍ରକାଶଯେ, ସାଲେପୁରର ସୟଦ୍ ଅବଦୁଲ୍ ହସନ କିଡ୍ନୀ ରୋଗରେ ଆକ୍ରାନ୍ତ ଥିଲେ। କଟକ ମଙ୍ଗଳାବାଗର ଏକ ଘରୋଇ ହସ୍ପିଟାଲ୍ରେ ତାଙ୍କର ନିୟମିତ ଡାଏଲିସିସ୍ ହେଉଥିଲା। ଗତ ୧୦ ତାରିଖରେ ସେ ଡାଏଲିସିସ୍ ପାଇଁ ଯାଇଥିବା ବେଳେ ହସ୍ପିଟାଲ୍ ଟେକ୍ନିସିଆନ୍ ତାଙ୍କୁ ମନାକରି ଦେଇଥିଲେ। ତବଲିଘି ଜମାତ୍ ଯୋଗୁ ବହୁ ସଂଖ୍ୟାରେ ମୁସଲମାନ୍ କରୋନାରେ ଆକ୍ରାନ୍ତ ହୋଇଛନ୍ତି। ଏଣୁ ଅବଦୁଲ୍ ଜଣେ ମୁସଲମାନ୍ ହୋଇଥିବାରୁ ସେ ପ୍ରଥମେ କରୋନା ପରୀକ୍ଷା କରିବାକୁ ଟେକ୍ନିସିଆନ୍ କହିଥିଲେ। ସେଠାରୁ ଅବଦୁଲ୍ ଘରକୁ ଫେରିବା ପରେ ତାଙ୍କର ମୃତ୍ୟୁ ହୋଇଥିଲା।
ଏ ନେଇ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା। ଘଟଣାର ଉପଯୁକ୍ତ ତଦନ୍ତ ସହ ଘରୋଇ ହସ୍ପିଟାଲ୍ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ରାଜ୍ୟ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ, ମୁଖ୍ୟ ଶାସନ ସଚିବ ଏବଂ ଓଡ଼ିଶା କାଉନ୍ସିଲ୍ ଅଫ୍ ମେଡ଼ିକାଲ୍ ରେଜିଷ୍ଟ୍ରେଶନ୍କୁ ନିର୍ଦ୍ଦେଶ ଦିଆଯାଇଥିଲା।
