ଭୁବନେଶ୍ୱର,୧।୫(ବ୍ୟୁରୋ): ଦୋକାନ ଖୋଲିବା ନେଇ ବାରମ୍ବାର ଗାଇଡ୍ଲାଇନ୍ ଓ କଟକଣା ଲାଗୁ କରାଯାଉଥିବାରୁ ବ୍ୟବସାୟୀମାନେ ଦ୍ୱନ୍ଦ୍ୱରେ ପଡୁଛନ୍ତି। ଗୁରୁବାର ଭୁବନେଶ୍ୱର ମହାନଗର ନିଗମ (ବିଏମ୍ସି) କମିଶନର ପ୍ରେମଚନ୍ଦ୍ର ଚୌଧାରୀ ଏହି ଦ୍ୱନ୍ଦ୍ୱକୁ ଦୂର କରି କହିଛନ୍ତି, ଭୁବନେଶ୍ୱରରେ ସମସ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିବ। ସପିଙ୍ଗ୍ ମଲ୍ ଓ ମାର୍କେଟ କମ୍ପ୍ଲେକ୍ସ ଖୋଲିବ ନାହିଁ। ଯେଉଁଠି ଗୋଟିଏ ବିଲ୍ଡିଂରେ ୫ରୁ ଅଧିକ ଦୋକାନ ଥିବ ତାହାକୁ ମାର୍କେଟ କମ୍ପ୍ଲେକ୍ସ ବୋଲି ଧରାଯିବ ଓ ସେଠାରେ ଦୋକାନ ଖୋଲିବାକୁ ଅନୁମତି ଦିଆଯିବ ନାହିଁ। ମାର୍କେଟ କମ୍ପ୍ଲେକ୍ସରେ ନ ଥିବା ଲୁଗା ଦୋକାନ ଖୋଲି ପାରିବ। ଚା, ପାନ, ଗୁଟ୍ଖା, ସେଲୁନ, ସ୍ପା, ଜିମ୍ ଓ ମସାଜ ସେଣ୍ଟର ଖୋଲିପାରିବ ନାହିଁ। ରେଷ୍ଟୁରାଣ୍ଟ ଖୋଲିବ, କିନ୍ତୁ ସେଠାରେ ବସି ଖାଇ ହେବନି। ରେଷ୍ଟୁରାଣ୍ଟରୁ କେବଳ ଖାଦ୍ୟ ହୋମ୍ ଡେଲିଭରି କରିହେବ। ପରବର୍ତ୍ତୀ ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ସ୍ଥାନାନ୍ତରିତ ହାଟ ବ୍ୟବସାୟୀ ପୁରୁଣା ସ୍ଥାନକୁ ଫେରିବେ ନାହିଁ। ସେହିପରି ନିର୍ମାଣ ସାମଗ୍ରୀ ଦୋକାନ ଖୋଲାଯାଇଛି, ସାମଗ୍ରୀ ସ୍ଥାନାନ୍ତରଣ ରାତିରେ କରିବାକୁ ସେ ପରାମର୍ଶ ଦେଇଛନ୍ତି। ନିର୍ମାଣ ସ୍ଥାନରେ ଶ୍ରମିକ ରହୁଥିଲେ, କାମ କରିହେବ। ବାହାରୁ କୌଣସି ଶ୍ରମିକ ଆଣି ନିର୍ମାଣ କାର୍ଯ୍ୟ କରିବାକୁ ଅନୁମତି ନାହିଁ। ଅନୁରୂପ ଭାବେ ଗୋଟିଏ ଦୋକାନରେ ଏକ ସମୟରେ ୫ ଗ୍ରାହକ ଏକାଠି ହେବାକୁ ବାରଣ କରାଯାଇଥିବା କମିଶନର ଚୌଧାରୀ କହିଛନ୍ତି।
ଏଥିସହ ଖୋଲିବାକୁ ଥିବା ବଜାର ଓ ଭିଡକୁ ଲକ୍ଷ୍ୟ କରି ଦୋକାନୀମାନଙ୍କୁ ଗ୍ରାହକଙ୍କ ମଧ୍ୟରେ ସାମାଜିକ ଦୂରତ୍ୱ ବଜାୟ ରଖିବା ପାଇଁ କମିଶନର ପରାମର୍ଶ ଦେଇଛନ୍ତି। ଦୋକାନରେ କାମ କରୁଥିବା କର୍ମଚାରୀଙ୍କର ଥଣ୍ଡା, ଜ୍ୱର, କାଶ କିମ୍ବା ଛିଙ୍କ ହେଉଥିଲେ ତାଙ୍କ ବାରଣ କରାଯିବା ସହ ଏ ସଂକ୍ରାନ୍ତରେ ସ୍ବାସ୍ଥ୍ୟ ବିଭାଗ କିମ୍ବା ବିଏମ୍ସିକୁ ସୂଚନା ଦେବା ପାଇଁ ସେ କହିଛନ୍ତି। ସକାଳ ୮ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ସର୍ତ୍ତମୂଳକ ଭାବେ ଖୋଲୁଥିବା ଦୋକାନଗୁଡ଼ିକରେ ୫୦% କର୍ମଚାରୀ ରହିବେ। କୌଣସି ଶିଳ୍ପ ସଂସ୍ଥା ଚାହିଁଲେ ଅନୁମତି ମିଳିବ। କିନ୍ତୁ ୩୦% କର୍ମଚାରୀଙ୍କୁ ନେଇ ସମ୍ପୃକ୍ତ ସଂସ୍ଥା କାର୍ଯ୍ୟ କରିବ ଓ କର୍ତ୍ତୃପକ୍ଷ କର୍ମଚାରୀଙ୍କ ସବିଶେଷ ତଥ୍ୟ ପ୍ରଦାନ କରିବେ। ଭୁବନେଶ୍ୱରରେ ବ୍ୟବସାୟୀମାନେ ନିଜ ଟ୍ରେଡ୍ ଲାଇସେନ୍ସକୁ ପାସ୍ ଭାବେ ବ୍ୟବହାର କରିପାରିବେ। ଲକଡାଉନ୍ ଥିବାରୁ ଓ ଭୁବନେଶ୍ୱର ରେଡ୍ ଜୋନ୍ରେ ଥିବାରୁ ଏଠାରେ କଟକଣା ରହିବ ବୋଲି କମିଶନର କହିଛନ୍ତି।
