ଉଲୁଣ୍ଡା, ୩।୩ (ଡି.ଏନ୍.ଏ.)-
ବଏସର ଶେଷ ମୁଡ଼ସାରେ ନିଜର ପରିବାର ଲୁକ୍କୁ ହରାଲା ଉତାରୁ ଭାତ ମୁଠେ ଆର ମୁଡ଼ ଗୁଁଜ୍ବାକେ ଜାଗା ଖଁଡ଼େ ଲାଗି ବାରଗୁଲ୍ଗୁଲା ହେଉଛନ୍ ଝନେ ୮୦ ବଛ୍ରିଆ ବୁରୁଧ୍। ସତେ ଯେନ୍ତା ମାଲମାଲ ସରକାରୀ ଯୋଜନା ତାକର ଲାଗି ବାଟ୍ବନା ହେଇଛେ। ଏନ୍ତା ଗୁଟେ ଦୁଖଦ୍ ଘଟନା ଦେଖ୍ବାକେ ମିଲିଛେ ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ପଞ୍ଚମହଲା ଗଁାରେ।
ସୂଚନା ଅନ୍ସାରେ ପଞ୍ଚମହଲା ଗଁାର କ୍ଷୀର ଘିବିଲା(୮୧)। ଆପ୍ନେ ଛବିଲ ଘିବିଲା ଆରପାରକେ ଚାଲିଗଲା ଉତାରୁ ସେ ୧୫ ବଛର ହେଲା ନିଜର ବାପ୍ ଘର ମନମୁଣ୍ଡା ପାସର ଦମାମୁଣ୍ଡାରେ ଭାଇ ଆର ଭନ୍ଜା ଘରେ ରହି ଆସୁଥିଲେ। ହେଲେ ସେମାନକର ମୁର୍ତୁ ହେଲାରୁ କ୍ଷୀର ଉପେ ଶୂଇନ୍ ହେଇ ନିଜର ଗଁା ପଞ୍ଚମହଲାକେ ଫିରିଆଏଲେ। ସେଦିନ୍ଠାନୁ ଗଁାରେ ତାକର କେତେ ଲାଗେଲେସର କ୍ଷୀରକଁର ସେବାଯତନ କରବାର ସଂଗେ ଆଶ୍ରେ ଦେଇଥିଲେ। ହେଲେ ପାଖାପାଖି ମାସେ ହେଲା କ୍ଷୀର ନିଅଁାସି ହେଇ ଇତାର ପିଁଢ଼ା ତାର ପିଁଢ଼ାରେ ଆଶ୍ରେ ନେବାକେ ଖୁଜି ବୁଲୁଛନ୍। ଏନ୍ତା କି ସେ ପଁଚେତ୍ର ରାଜୀବ ଭବନର ବାରନ୍ଡାରେ ଦିନାକେତେ ଆଶ୍ରେ ନେଇଥିଲେ। ହେଲେ ସେଠାନା ଲୋକ୍ ମନା କଲାରୁ ସେଦିନ୍ଠାନୁ ଆଶ୍ରେଥଲ ଆଶ୍ରେ ଘୂରି ବୁଲୁଛେଁ ବଲି ସେ କହିଛନ୍। ଫିଦିନ ପରହର ଘରୁ ମୁଠେ ଖାଏବାରଟା ମିଲିଯାଉଛେ ସତ୍। ହେଲେ ବଏସର ଶେଷ୍ ମୁଡ଼ସାରେ ମୁଡ଼ ଗୁଁଜ୍ବାର ଲାଗି ସେ ଶୀତ୍ କାକରରେ ଗୁଲ୍ଗୁଲା ହେଇ ବାରଦୁଆର ହେଉଛନ୍। ଏନ୍ତା ବୁଢ଼ାବୁଢ଼ୀମାନକୁ ଥଇଥାନ କରବାର ଲାଗି ସରକାରୀସ୍ତରରେ ଅନେକ ଯୋଜନା ରହିଛେ। ହେଲେ ବୁରୁଧ୍ କ୍ଷୀରକଁର ବାବ୍ଦେ ଥାନୀଅ ଜନପରତିନିଧି, ଅଙ୍ଗନଓ୍ବାଡି କରମୀ କି ବ୍ଲକ ପରଶାସନ ପାସେ ବି ସୂଚନା ନଁାଇଁନ। କ୍ଷୀର ବୁଢ଼ାବୁଢ଼ୀ ଭତା ୭ଶହ ଟଁକା ପାଉଛନ୍, ସେଟା ନ ତାକର ସଁପତି। ୬୫୪୬୨୭ ନମ୍ବରେ ତାକର ନଁାରେ ଗୁଟେ ବିପିଏଲ୍ କାର୍ଡ ଥିଲା। ହେଲେ ସେଟା ପରଶାସନ ତରଫୁ କାଟି ଦିଆଯାଇଛେ। ଯେନ୍ଥିରଲାଗି କ୍ଷୀର ୮୦ ବଛର ବଏସ୍ରେ ବି ଜାତୀୟ ଖାଏଦ୍ ସୁରକ୍ଷା ଯୋଜନାରୁ ବାଦ୍ ପଡ଼ିଛନ୍। ଭିନେ ଭିନେ ସମିଆରେ ଭିନେ ଭିନେ ଲୁକ୍କୁ ଆବାସ ଯୋଜନାରେ ଘରଖଁଡ଼େ ଲାଗି ଗୁହାରି କରି କ୍ଷୀର ନିରାଶ ହେଇଥିବାର କହିଛନ୍। ଜିଲା ଆର ଥାନୀଅ ପରଶାସନ ବୁରୁଧ୍ କ୍ଷୀରକଁର ଉପରେ ଦୁରୁଷ୍ଟି ଦେଇ ତାହାକୁ ସବୁପରକାର ସରକାରୀ ସାହାଯ୍ ସଂଗେ ଥଇଥାନ କରବାକେ ଗଁାବାସୀ ଦାବି କରିଛନ୍।
