ଭଞ୍ଜନଗର,୨୯।୬(ଡି.ଏନ.ଏ)-ଗଞ୍ଜାମ ଜିଲା ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ମୁଜାଗଡ଼ ରେଞ୍ଜରେ ପୁଣି ବାଘ ଆତଙ୍କ ଦେଖାଦେଇଛି । ରେଞ୍ଜ ଅନ୍ତର୍ଗତ ବାଇବାଲି ଗ୍ରାମରୁ ଗତ ଶୁକ୍ରବାର ରାତିରେ ବାଘ ଏକ ବାଛୁରୀକୁ ଘୋଷାଡ଼ି ନେଇ ମାରି ଦେଇଛି। ବାଛୁରୀ ରଡ଼ି ଶୁଣି ଲୋକେ ଉଠି ହୋହଲ୍ଲା କରିବାରେ ବାଘ ଛାଡି ପଳାଇଥିବା ଗ୍ରାମର କେତେଜଣ କହିଛନ୍ତି। ଖବରପାଇ ବନ ବିଭାଗ ଅଧିକାରୀ ଘଟଣାସ୍ଥଳ ପରିଦର୍ଶନ କରି ବାଘ ପାଦ ଚିହ୍ନକୁ ପ୍ଲାଷ୍ଟର ପ୍ୟାରିସ୍ରେ ସଂଗ୍ରହ କରି ପରୀକ୍ଷା ପାଇଁ ପଠାଇଛନ୍ତି । ଏ ନେଇ ବିଭାଗ ପାଖରେ ଖବର ଥିବା ଡିଏଫ୍ଓ ଅଭୟ କୁମାର ଦଳେଇ କହିଛନ୍ତି। ଏସିଏଫ୍ ସୁଦର୍ଶନ ବାଦୀ ଘଟଣାସ୍ଥଳକୁ ତଦନ୍ତ କରିଛନ୍ତି। ପ୍ଲାଷ୍ଟର ପ୍ୟାରିସ୍ ରିପୋର୍ଟ ଆସିବା ପରେ ତାହା ବାଘ କି ନାହିଁ ଜଣାପଡ଼ିବ। ସୂଚନାଯୋଗ୍ୟ, ଏହା ପୂର୍ବରୁ ରମ୍ଭା ସେକ୍ସନର ଉଲିଙ୍କିଆରେ ମଧ୍ୟ ଜଣଙ୍କ ଗାଈ ବାଛୁରୀକୁ ବାଘ ମାରିଥିବା ଅଭିଯୋଗ ହୋଇଥିଲା। ବନ ବିଭାଗ ବିଳମ୍ବରେ ଏହି ଘଟଣା ଜାଣିଥିବାରୁ ପାଦ ଚିହ୍ନ ସଂଗ୍ରହ କରାଯାଇ ପାରି ନ ଥିଲା।
