ଚେନ୍ନାଇ,୭।୫(ପି.ଟି.): ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ଜଣେ ସଫଳ କ୍ରିକେଟର ହୋଇଥିଲେ ମଧ୍ୟ ଅନ୍ୟମାନଙ୍କ ଭଳି ସେ ଚାପର ବଶବର୍ତ୍ତୀ ହୋଇଥାନ୍ତି ଓ ଭୟ ମଧ୍ୟ କରିଥାନ୍ତି। ମେଣ୍ଟାଲ ହେଲ୍ଥ ବା ମାନସିକ ସ୍ବାସ୍ଥ୍ୟକୁ ନେଇ ଏକ ଆଲୋଚନାରେ ଭାଗନେବା ଅବସରରେ ଧୋନୀ ଏହି କଥା କହିଛନ୍ତି। ମାନସିକ ଦୃଷ୍ଟିକୋଣରୁ ଦେଖିବାକୁ ଗଲେ ଜଣେ କ୍ରିକେଟରଙ୍କୁ ବହୁତ କିଛି ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡିଥାଏ। ଯେତେବେଳେ ପ୍ରଥମେ ବ୍ୟାଟିଂ କରିବାକୁ ଯାଇଥାଏ ପ୍ରଥମ ୫ରୁ ୧୦ଟି ବଲ୍ ଖେଳିବା ଏକ ବଡ଼ ଚ୍ୟାଲେଞ୍ଜ୍ ହୋଇଥାଏ। ଏତିକି ବେଳେ ହୃଦ୍ସ୍ପନ୍ଦନ ବଢିଯାଇଥାଏ। ଚାପ ଅନୁଭବ କରିବା ସହ ମନ ଭିତରେ ଡର ରହିଥାଏ ବୋଲି ଧୋନୀ କହିଛନ୍ତି।
କ୍ରିକେଟରେ ମାନସିକ ଅବସ୍ଥାର ଭୂମିକା ସବୁଠାରୁ ଗୁରୁତ୍ୱପୂର୍ଣ୍ଣ। ଚାପ୍କୁ ସମ୍ମୁଖୀନ ହେବାରେ ମେଣ୍ଟାଲ କଣ୍ଡିସନିଂ କୋଚ୍ ସାହାଯ୍ୟ କରିଥାନ୍ତି। କ୍ରୀଡ଼ାର କେଉଁ ବିଭାଗରେ ସୁଧାର ଆବଶ୍ୟକ ଏ ନେଇ ସେ ପରାମର୍ଶ ଦେଇଥାନ୍ତି। ଭାରତୀୟ ଅଧିନାୟକ ବିରାଟ କୋହଲି ମଧ୍ୟ ମେଣ୍ଟାଲ କ୍ଲାରିଟିକୁ ନେଇ ମତ ରଖିଥିଲେ। ଖେଳ ସହିତ ଜୀବନରେ ମେଣ୍ଟାଲ କ୍ଲାରିଟିର ଯଥେଷ୍ଟ ଗୁରୁତ୍ୱ ରହିଛି ବୋଲି ସେ କହିଛନ୍ତି। କ୍ରୀଡ଼ାରେ ସଫଳତା ହାସଲ କରିବାକୁ ‘ଏମ୍ଫୋର’ ନାମକ ଏକ ସଂସ୍ଥା ମାଇଣ୍ଡ କଣ୍ଡିସନିଂ ପ୍ରୋଗ୍ରାମ ଆରମ୍ଭ କରିଛି। ଧୋନୀ ମଧ୍ୟ ‘ଏମ୍ଫୋର’କୁ ସମର୍ଥନ ଜଣାଇଛନ୍ତି। ମାନସିକ ଦୃଷ୍ଟିକୋଣରୁ ଦେଖିଲେ ଜଣେ କ୍ରିକେଟରଙ୍କର ଏକାଧିକ ଦୁର୍ବଳତା ରହିଥାଏ। ତେବେ ଏହାକୁ ସ୍ବୀକାର କଲେ ଆମ ଦେଶର ଲୋକେ ଏହାକୁ ସହଜରେ ଗ୍ରହଣ କରି ନ ଥାନ୍ତି ବୋଲି ଏମ୍ଫୋରର କାର୍ଯ୍ୟକ୍ରମକୁ ସମର୍ଥନ କରି ଧୋନୀ କହିଛନ୍ତି। ଉଲ୍ଲେଖଥାଉ କି, ପୂର୍ବତନ ଭାରତୀୟ କ୍ରିକେଟର ସୁବ୍ରମନ୍ୟମ ବଦ୍ରିନାଥ ଓ ଶ୍ରବଣ କୁମାର ଏମ୍ଫେର ସ୍ଥାପନ କରିଥିଲେ।
