ବରଗଡ଼,୧୪।୪(ପ୍ରେମାନନ୍ଦ ଖମାରୀ): ମା’ ଶ୍ୟାମାକାଳୀ ମନ୍ଦିର ପ୍ରାଙ୍ଗଣରେ ହନୁମାନ ଜୟନ୍ତୀ ଅବସରରେ ଏକ ଭବ୍ୟ ଓ ଆଧ୍ୟାତ୍ମିକ ମହାସମାରୋହର ଆୟୋଜନ କରାଯାଇଥିଲା। ଜୟ ଶ୍ରୀରାମ ଧ୍ୱନିରେ ପରିପୂର୍ଣ୍ଣ ହୋଇଯାଇଥିଲା ସମଗ୍ର ପରିବେଶ। ଭକ୍ତମାନଙ୍କ ଭିଡ଼, ଶ୍ରଦ୍ଧା ଓ ଭକ୍ତିର ମହଳରେ ସମଗ୍ର ମନ୍ଦିର ପରିସର ଧନ୍ୟ ହୋଇଯାଇଥିଲା। ସକାଳୁ ଆରମ୍ଭ ହୋଇଥିବା ଏହି ପବିତ୍ର ଉତ୍ସବରେ ଭକ୍ତମାନେ ପ୍ରଥମେ ଶ୍ରୀ ହନୁମାନଙ୍କୁ ପୂଜା ଅର୍ପଣ କରିଥିଲେ। ପରେ ହୋମ, ଯଜ୍ଞ ଓ ବିଶେଷ ପୂଜା ସହିତ ହନୁମାନ ଚାଳିସା ପାଠ ହୋଇଥିଲା, ଯାହା ଭକ୍ତିମୟ ପରିବେଶକୁ ଆହୁରି ଗଭୀର କରିଥିଲା । ଭକ୍ତମାନେ ପୁଷ୍ପ, ଫଳ ଓ ପ୍ରସାଦ ନେଇ ମନ୍ଦିରକୁ ପହଞ୍ଚି ଶ୍ରୀ ହନୁମାନଙ୍କ ନିକଟରେ ଶାନ୍ତି, ସମୃଦ୍ଧି ଓ ସୁସ୍ଥ ଜୀବନ ପାଇଁ ପ୍ରାର୍ଥନା କରିଥିଲେ। ମନ୍ଦିର ପ୍ରାଙ୍ଗଣ ଭକ୍ତମାନଙ୍କ ଭିଡ଼ରେ ଭରିଯାଇଥିବାବେଳେ, ଧାର୍ମିକ ଉତ୍ସାହ ଓ ଭକ୍ତିର ଅନନ୍ୟ ଦୃଶ୍ୟ ଦେଖିବାକୁ ମିଳିଥିଲା।
ଏହି ଅବସରରେ ପଣ୍ଡିତ ନରସିଂହ ଶତପଥୀ, ପଣ୍ଡିତ ହରିରାମ ପଣ୍ଡା, ପଣ୍ଡିତ ସତ୍ୟାନନ୍ଦ ଶତପଥୀ, ପଣ୍ଡିତ ଅନନ୍ତ ଶତପଥୀ, ପଣ୍ଡିତ ଆନନ୍ଦ ଷଡ଼ଙ୍ଗୀ ଓ ପଣ୍ଡିତ ସୁମନ୍ତ ଷଡ଼ଙ୍ଗୀ ମନ୍ତ୍ରୋଚ୍ଚାରଣ ସହିତ ପୂଜା କାର୍ଯ୍ୟ ସମ୍ପାଦନ କରିଥିଲେ। କାର୍ଯ୍ୟକ୍ରମର କର୍ତ୍ତା ଭାବରେ କାନ୍ତା ପ୍ରସାଦ ସାହୁ ସସ୍ତ୍ରୀକ ଉପସ୍ଥିତ ଥିଲେ। ଉତ୍ସବର ଆରମ୍ଭରୁ ମନ୍ଦିର କମିଟି ପକ୍ଷରୁ ଭକ୍ତମାନଙ୍କ ମଧ୍ୟରେ ପଣା ଓ ପ୍ରସାଦ ବଣ୍ଟନ କରାଯାଇଥିଲା। ଏହି ପବିତ୍ର ଦିନ ଭକ୍ତମାନଙ୍କ ପାଇଁ ଏକ ଆଧ୍ୟାତ୍ମିକ ଅନୁଭବ ହେବା ସହିତ ସମାଜରେ ଧାର୍ମିକ ଏକତା ଓ ଶାନ୍ତିର ସନ୍ଦେଶ ଦେଇଯାଇଛି।
Dharitri – Odisha’s No.1 Odia Daily
