ରାଇରଙ୍ଗପୁର,୧୨।୩(ଡି.ଏନ୍.ଏ.): ମୟୂରଭଞ୍ଜ ଜିଲା ବହଳଦା ଥାନା ଅନ୍ତର୍ଗତ ଦଲଡ଼ିହା ଗ୍ରାମରେ ବୁଧବାର ରାତିରେ ଏକ ଅଭାବନୀୟ ଘଟଣା ଘଟିଛି। ଉକ୍ତ ଗ୍ରାମରେ ଥିବା ନିଜ ମାମୁ ଘରକୁ ବୁଲିବାକୁ ଆସିଥିବା ଉକ୍ତ ଥାନା ଅନ୍ତର୍ଗତ ଅସଦା ନିକଟ ଚହଲାପଦା ଗ୍ରାମର କାନ୍ଦରା ନାୟକ(୩୫)ଙ୍କ କୁରାଢ଼ି ଆକ୍ରମଣରେ ଜାଉନୀ ନାୟକ(୫୦)ଙ୍କ ମୃତ୍ୟୁ ଘଟିଛି। କାନ୍ଦରା ବେକକୁ ହାଣିବା ପରେ ଅତି ନିର୍ଦ୍ଦୟ ଭାବେ ପଥରରେ ମୁହଁକୁ ଛେଚି ଦେଇଥିଲେ। ଜାଉନୀ ସମ୍ପର୍କରେ କାନ୍ଦରାଙ୍କ ମାଉସୀ। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା।
ସୂଚନାନୁଯାୟୀ, ବୁଧବାର ରାତିରେ ଖାଇ ସାରିବା ପରେ ସମସ୍ତେ ଶୋଇପଡ଼ିଥିଲେ। ଏହି ସମୟରେ କାନ୍ଦରା ଜାଉନୀଙ୍କ ହତ୍ୟା କରିଥିଲେ। ତେବେ ପରିବାରଲୋକେ ଗୁରୁବାର ସକାଳେ ହତ୍ୟାକାଣ୍ଡ ନେଇ ଜାଣିବାକୁ ପାଇଥିଲେ। ଏପରିକି ପଡ଼ୋଶୀ ଲୋକ ଘର ନିକଟରେ ଜମା ହୋଇଥିଲେ। କାନ୍ଦରା ସେମାନଙ୍କୁ ମଧ୍ୟ ମାରିବାକୁ ଗୋଡ଼ାଇଥିଲେ। ଖବର ପାଇ ରାଇରଙ୍ଗପୁର ସର୍କଲ ଏସ୍ଡିପିଓ ସେନାଶିଷ ସାହୁ ଏବଂ ବହଳଦା ଥାନାଧିକାରୀ ଇନ୍ସପେକ୍ଟର ଯୋଗେନ୍ଦ୍ର କୁମାର ମଲ୍ଲିକ ସଦଳବଳେ ପହଞ୍ଚି ମୃତଦେହ ଜବତ କରିବା ସହ ସାଇଣ୍ଟିଫିକ୍ ଟିମ୍ ଏବଂ ସନ୍ଧାନୀ କୁକୁର ସହାୟତାରେ ତଦନ୍ତ କରିଛନ୍ତି। ଏଥିସହ ପୋଲିସ ଅଭିଯୁକ୍ତ କାନ୍ଦରାଙ୍କୁ କାବୁ କରି ନେଇଛି। ହତ୍ୟାକାଣ୍ଡର କାରଣ ଜଣାପଡ଼ ନ ଥିଲେ ହେଁ ପ୍ରାଥମିକ ତଦନ୍ତରୁ ମସ୍ତିଷ୍କ ବିକୃତ ଥିବାରୁ ଏହି ହତ୍ୟାକାଣ୍ଡ ଘଟାଇଥିବା ପୋଲିସ ଜାଣିବାକୁ ପାଇଛି। ରାଇରଙ୍ଗପୁର ହସ୍ପିଟାଲରେ ମୃତଦେହ ଜବତ କରାଯାଇଛି। ଏ ନେଇ ମାମଲା ନଂ(୨୦/୨୦) ରୁଜୁ ହୋଇଛି।
