ଭୁବନେଶ୍ୱର,୨୯ା୧(ବ୍ୟୁରୋ): ଓଡ଼ିଶାରେ ଚାଲିଥିବା ବ୍ରାଉନସୁଗାର ର଼୍ୟାକେଟର ଚେର ବାଂଲାଦେଶକୁ ଲମ୍ବିଛି। କେତେବେଳେ ଭାୟା କଲିକତା ଦେଇ ତ ପୁଣି କେତେବେଳେ ବଙ୍ଗୋପସାଗର ଦେଇ ଓଡ଼ିଶାକୁ ପଶୁଛି ବ୍ରାଉନସୁଗାର। ମାଛ, ସୁଜି, ବିଲାତି ଭିତରେ ଚାଲାଣ ହେଉଛି ଏହି ନିଶାଦ୍ରବ୍ୟ। ତେବେ ବିଗତ କିଛି ମାସ ହେବ କ୍ରାଇମବ୍ରାଞ୍ଚ ଏସ୍ଟିଏଫ୍ ଓ ପୋଲିସର ଘନଘନ ଚଢ଼ାଉ ପରେ ନିଶା ମାଫିଆମାନେ ବ୍ରାଉନସୁଗାର ଚାଲାଣର ଏପରି ଭିନ୍ନ ତରିକା ଆପଣାଇଛନ୍ତି। ବ୍ରାଉନସୁଗାର କାରବାରର ଗଡ଼ କୁହାଯାଉଥିବାରୁ ବାଲେଶ୍ୱରରୁ ଏସ୍ଟିଏଫ୍ ଆଉ ଦୁଇଜଣ ଡିଲରଙ୍କୁ ଗିରଫ କରି ପଚରାଉଚରା କରିବା ପରେ ଏଭଳି ତଥ୍ୟ ପାଇଛି। ସେମାନଙ୍କ ନିକଟରୁ ୩୦୧ ଗ୍ରାମର ବ୍ରାଉନସୁଗାର, ୨ଲକ୍ଷ ୨୨ହଜାର ୨୩୦ ଟଙ୍କା ଏବଂ ଗୋଟିଏ ବୁଲେଟ ଜବତ କରିଛି। ଗିରଫ ଦୁଇ ଡିଲର ହେଲେ ସହଦେବଖୁଣ୍ଟା ଅରଦା ବଜାରର ସେକ୍ ହାଇଦର ଓ ସହଦେବଖୁଣ୍ଟା ଥାନା ପୋଲିସ ଲେନ୍ର ତନ୍ମୟ ଭୂୟଁା ଓରଫ ତନୁ। ସେମାନଙ୍କ ବିରୋଧରେ ଏସ୍ଟିଏଫ କେସ୍ ନଂ.୯/୨୦ ଦଫା ୨୧(ସି) ଏନ୍ଡିପିଏସ୍ ଆକ୍ଟ ଲଗାଇ ବାଲେଶ୍ୱର ଜିଲା ଦୌରାଜଜ୍ କୋର୍ଟକୁ ଚାଲାଣ କରିଥିବା ଏସ୍ଟିଏଫ୍ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ କ୍ରାଇମ୍ବ୍ରାଞ୍ଚ ଏଡିଜି ସୌମେନ୍ଦ୍ର ପ୍ରିୟଦର୍ଶୀ ସୂଚନା ଦେଇଛନ୍ତି।
ସେ କହିଛନ୍ତି, ହାଇଦର ଓ ତନ୍ମୟ ବାଂଲାଦେଶରୁ ଭାୟା କୋଲକାତା ଦେଇ ବାଲେଶ୍ୱରକୁ ବ୍ରାଉନସୁଗାର ଆଣନ୍ତି। ସୀମା ଓ ଜଳପଥରେ ଯାଞ୍ଚ କଡ଼ାକଡ଼ି ହେବା ସମୟରେ ସେମାନେ ବାଂଲାଦେଶ ନ ଯାଇ କୋଲକାତାରେ ଥିବା ଜଣେ ହୋଲ୍ସେଲରଙ୍କଠାରୁ ଆଣି ଓଡ଼ିଶାର ବେପାରିଙ୍କୁ ଯୋଗାଇଥାନ୍ତି। ଅନେକ ସମୟରେ ସେମାନେ ଜଳପଥରେ ମାଛ ଓ ଅନ୍ୟ ସାମଗ୍ରୀ ଭିତରେ ବ୍ରାଉନ ସୁଗାର ଆଣୁଥିଲେ। କିଛିଦିନ ପୂର୍ବରୁ ହାଇଦର ଗ୍ୟାଙ୍ଗ ଜଳପଥରେ ମାଛ ଭିତରେ ବ୍ରାଉନସୁଗାର ପୂରାଇ ଆଣୁଥିବା ସମୟରେ ପୋଲିସ ହାତରେ ଧରାପଡିଥିଲା। ଏହାପରେ ହାଇଦର ଓ ତନ୍ମୟ ସେମାନଙ୍କ ବେପାର କମାଇ ଦେଇଥିଲେ। ଉଭୟ ସୋମବାର ବାଲେଶ୍ୱର ଦେଇଯାଇଥିବା ଜାତୀୟ ରାଜପଥ-୧୬ର ହରି ପ୍ଲାଜା ହୋଟେଲ ନିକଟରେ ବ୍ରାଉନସୁଗାର ଧରି ଛୋଟ ଡିଲର ଓ ବେପାରିଙ୍କୁ ଅପେକ୍ଷା କରିଥିଲେ। ଖବର ପାଇ ଏସ୍ଟିଏଫ୍ ଟିମ୍ ସେଠାରେ ଚଢାଉ କରି ସେମାନଙ୍କୁ ଧରିଥିଲା। ସେମାନଙ୍କ ପଛରେ ବାଂଲାଦେଶ ଓ କୋଲକାତାର ବଡ ବଡ ବେପାରୀଙ୍କ ଲିଙ୍କ୍ ରହିଛି। ଉଭୟଙ୍କୁ ରିମାଣ୍ଡରେ ଆଣି ପଚରାଉଚରା କରିବା ପାଇଁ ଏସ୍ଟିଏଫ୍ ଯୋଜନା ରଖିଛି। ଏଥିପାଇଁ ଖୁବ୍ଶୀଘ୍ର କୋର୍ଟରେ ଆବେଦନ ହେବ। ଗିରଫ ଦୁଇ ଡିଲରଙ୍କ ଲିଙ୍କ୍ରେ ଥିବା ଆନ୍ତଃଦେଶୀୟ ବେପାରୀଙ୍କୁ ଗିରଫ କରିବା ପାଇଁ ଚଢାଉ କରାଯିବ। ଏସ୍ଟିଏଫ୍ ୨୦ ଦିନରେ ୮୧୮ ଗ୍ରାମ ବ୍ରାଉନସୁଗାର, ୩୨୬.୪୫ ଅଫିମ ଜବତ କରିବା ସହ ୮ ମାମଲା ରୁଜୁ କରି ୧୯ଙ୍କୁ ଗିରଫ କଲାଣି। ଏହାସହ ୧୩ ଲକ୍ଷ୨୦ ହଜାର ଟଙ୍କା, ଗୋଟିଏ କାର, ୮ ବାଇକ ଏବଂ ବ୍ୟାଙ୍କ୍ ଆକାଉଣ୍ଟ ଜବତ କରିଛି।
