ସୋହେଲା/ଭଟଲି, ୨୪-୫(ଡି.ଏନ.ଏ):ବରଗଡ ଜିଲା ଭଟଲି ବିଧାନସଭା ନିର୍ବାଚନ ମଣ୍ଡଳୀରେ ଚଳିତ ନିର୍ବାଚନରେ ଶ୍ରମ ଓ ଶକ୍ତିମନ୍ତ୍ରୀ ସୁଶାନ୍ତ ସିଂ ତୃତୀୟ ଥର ପାଇଁ ବିଜୟ ହାସଲ କରି ହ୍ୟାଟ୍ରିକ କରିଛନ୍ତି । ସେ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଭାଜପା ପ୍ରାର୍ଥୀ ଇରାସିସ ଆଚାର୍ଯ୍ୟଙ୍କୁ ୩୨ହଜାର ୩୩୦ଖଣ୍ଡ ଭୋଟରେ ପରାସ୍ତ କରି ବିଜୟ ହାସଲ କରିଛନ୍ତି । ଗୁରୁବାର ଫଳାଫଳ ଜଣାପଡିବା ପରେ ନିର୍ବାଚନ ମଣ୍ଡଳୀର ବିଭିନ୍ନ ଗ୍ରାମରୁ ଶୁଭେଚ୍ଛୁମାନେ ଆସି ମନ୍ତ୍ରୀ ସିଂଙ୍କୁ ଫୁଲତୋଡା ଦେଇ ଶୁଭେଚ୍ଛା ଜଣାଇଥିଲେ । ସୋହେଲାରେ ବିଜେଡି କର୍ମୀ ଓ ଶୁଭେଚ୍ଛୁମାନେ ବାଣ ଫଟାଇ ଖୁସି ମନାଇ ମିଠା ବାଣ୍ଟିଥବବା ଦେଖିବାକୁ ମିଳିଥିଲା । ଭଟଲି ଓ ଅମ୍ବାଭୋନା ଅଞ୍ଚଳରେ ମଧ୍ୟ ବିଜେଡି କର୍ମୀମାନେ ମନ୍ତ୍ରୀ ସିଂହଙ୍କ ବିଜୟରେ ଉଲ୍ଲସିତ ହୋଇ ବାଣ ଫଟାଇ ଖୁସି ମନାଇଥିଲେ । ଭଟଲି ଓ ଅମ୍ବାଭୋନା ବ୍ଲକରେ ବିଜେଡି ଓ ଭାଜପା ପ୍ରାର୍ଥୀଙ୍କ ମଧ୍ୟରେ କଡା ଟକ୍କର ହୋଇଥିଲା । ଭୋଟ ଗଣତିର ଶେଷ ପର୍ଯ୍ୟାୟରେ ଭଟଲି ବ୍ଲକରୁ ବିଜେଡି ୨ହଜାର ୫ଶହରୁ ଊର୍ଦ୍ଧ୍ୱ ଭୋଟ ପାଇ ଆଗୁଆ ହୋଇ ବିଜୟର ଧାରା ଜାରି ରଖିଥିଲା। ଶେଷରେ ସୋହେଲା ବ୍ଲକ ହିଁ ସୁଶାନ୍ତ ସିଂହଙ୍କୁ ବିଜୟୀ କରିବାରେ ସହାୟକ ହୋଇଥିଲା । ଉଲ୍ଲେଖଯୋଗ୍ୟ,ଏହି ନିର୍ବାଚନ ମଣ୍ଡଳୀରେ ଅନୁଷ୍ଠିତ ହୋଇଥିବା ନିର୍ବାଚନଗୁଡିକରେ ଅଦ୍ୟାବଧି କାୈଣସି ପ୍ରାର୍ଥୀ ଲଗାତର ତିନିଥର ବିଜୟୀ ହୋଇ ନ ଥିଲେ । ମନ୍ତ୍ରୀ ସୁଶାନ୍ତ ସିଂ ଏଠାରେ ହ୍ୟାଟ୍ରିକ ମାରିଛନ୍ତି। ଆଜିର ଫଳାଫଳରେ ବିଜେଡି ପ୍ରାର୍ଥୀ ସୁଶାନ୍ତ ସିଂ ୯୮ହଜାର ୩୮୫, ଭାଜପା ପ୍ରାର୍ଥୀ ଇରାସିସ ଆଚାର୍ଯ୍ୟ ୭୫ହଜାର ୫୫, ବହୁଜନ ସମାଜ ପ୍ରାର୍ଥୀ ନାରାୟଣ ଭେସ୍ରା ୧ହଜାର ୧୫୯, କଂଗ୍ରେସ ପ୍ରାର୍ଥୀ ସରୋଜ କୁମାର ମହାପାତ୍ର ୮ହଜାର ୩୩୮, ସମତା କ୍ରାନ୍ତି ଦଳ ପ୍ରାର୍ଥୀ ଧନପତି ସାହୁ ୧ହଜାର ୭ ଏବଂ ନୋଟାରେ ୧ହଜାର ୩୬୪ଖଣ୍ଡ ଭୋଟ ପଡିଛି । ବିଜୟୀ ପ୍ରାର୍ଥୀ ସୁଶାନ୍ତ ସିଂ ୫୩.୦୯ ପ୍ରତିଶତ ଭୋଟ ପାଇଥିବା ବେଳେ ଭାଜପା ପ୍ରାର୍ଥୀ ଇରାସିସ
ଆଚାର୍ଯ୍ୟ ୪୦.୫ପ୍ରତିଶତ ଭୋଟ ପାଇଛନ୍ତି ।
