ଜଗତ୍ସିଂହପୁର ଅଫିସ୍,୬ା୨: ବିଦ୍ୟାଳୟଗୁଡିକରେ ଛାତ୍ରୀଛାତ୍ରଙ୍କ ନାମ ଲେଖାଠାରୁ ଆରମ୍ଭ କରି ବିଦ୍ୟାଳୟ ଛାଡିବା ପର୍ଯ୍ୟନ୍ତ ସମସ୍ତ ତଥ୍ୟ ଫାଇଲ୍ରେ ରଖାଯାଉଛି। ଯଦ୍ଦ୍ବାରା ଅଯଥା କାଗଜପତ୍ର କାମ ସାଙ୍ଗକୁ ଅନେକ କିଛି ତ୍ରୁଟି ପରିଲକ୍ଷିତ ହେଉଛି। କିନ୍ତୁ ଏଣିକି ସେଭଳି ଆଉ ହେବନାହିଁ। କମ୍ପ୍ୟୁଟର ଟେକ୍ନୋଲୋଜିର ପ୍ରୟୋଗ ଦ୍ୱାରା ସମଗ୍ର ଶିକ୍ଷାକୁ ସରଳୀକରଣ କରାଯିବ। ଅର୍ଥାତ୍: ପିଲାମାନଙ୍କ ତଥ୍ୟ ସମେତ ମଧ୍ୟାହ୍ନଭୋଜନ, ପାଠ୍ୟପୁସ୍ତକ, ପୋଷାକ ବିତରଣ ଆଦି ଅନ୍ଲାଇନ୍ ମାଧ୍ୟମରେ ସୁରୁଖୁରୁରେ କରାଯାଇ ପାରିବ। ଶିକ୍ଷୟିତ୍ରୀ, ଶିକ୍ଷକଙ୍କୁ ଏ ସଂକ୍ରାନ୍ତରେ ତାଲିମ ଦିଆଯିବା ପ୍ରକ୍ରିୟା ଆରମ୍ଭ ହୋଇଯାଇଛି। ଓସେପା(ଓଡ଼ିଶା ସ୍କୁଲ ଏଜୁକେଶନ ପ୍ରୋଗ୍ରାମ ଅଥରିଟି)ଙ୍କ ନିର୍ଦ୍ଦେଶକ୍ରମେ ଜିଲାରେ ଏହି ମଣ୍ଡଳସ୍ତରୀୟ ପରିବର୍ଦ୍ଧିତ ତଥ୍ୟ ସଂଗ୍ରହ ବ୍ୟବସ୍ଥା ସମ୍ପର୍କିତ ତାଲିମ ୩ ତାରିଖରୁ ଆରମ୍ଭ ହୋଇଛି। ଏହା ଆସନ୍ତା ୧୦ ତାରିଖ ପର୍ଯ୍ୟନ୍ତ ଚାଲିବ ବୋଲି ଜଣାଯାଇଛି।
ସୂଚନା ଅନୁଯାୟୀ, ଜିଲାର ୧,୭୧୪ ବିଦ୍ୟାଳୟର ଶିକ୍ଷକଙ୍କୁ ଜିଲା ଓ ବ୍ଲକ ଶିକ୍ଷା ବିଭାଗର ଏମ୍ଆଇଏସ୍ ଅଧିକାରୀମାନେ ତାଲିମ ଦେଉଛନ୍ତି। ସରକାରୀ ନିର୍ଦ୍ଦେଶ ଅନୁଯାୟୀ, ପ୍ରତ୍ୟେକ ବିଦ୍ୟାଳୟ ପ୍ରଥମେ କମ୍ପ୍ୟୁଟର୍ ଲଗ୍ ଇନ କଲାପରେ ଛାତ୍ରୀଛାତ୍ରଙ୍କ ସମ୍ପର୍କିତ ୩୬ଟି ମାନଙ୍କ ପୂରଣ କରିବେ। ଏଥିରେ ବିଶେଷକରି ପିଲାମାନଙ୍କ ଆଧାର ସଂଯୋଗ ରହିବ। ପରେ ନିର୍ଦ୍ଦିଷ୍ଟ କୋଡ୍ ଚିହ୍ନଟ ହେବ। ସେଥିରେ ଛାତ୍ରୀଛାତ୍ରଙ୍କ ସ୍ଥାନାନ୍ତର, ନୂତନ ନାମଲେଖା, ଅଧ୍ୟୟନ ସମାପ୍ତ ଆଦି ପୂରଣ ହୋଇପାରିବ। ଏଥିସହିତ ପ୍ରଧାନଶିକ୍ଷକ ପିଲାମାନଙ୍କ ପରୀକ୍ଷା ଫଳ, ଦୈନିକ ଉପସ୍ଥାନ ମଧ୍ୟ ଅନଲାଇନ୍ ପୋର୍ଟାଲରେ ଲିପିବଦ୍ଧ କରିପାରିବେ। ଏହି ବ୍ୟବସ୍ଥା ଫଳରେ ବିଦ୍ୟାଳୟଗୁଡିକରେ ଅଧାରୁ ପାଠ ଛାଡୁଥିବା, ୨ଟି ସ୍ଥାନରେ ନାମ ଥିବା, ମିଥ୍ୟ ଉପସ୍ଥାନ ଓ ତଥାକଥିତ ଭୂତ ପିଲାମାନଙ୍କ ସଂଖ୍ୟା ହ୍ରାସ ପାଇପାରିବ। ବିଦ୍ୟାଳୟସ୍ତରରେ ଶୈକ୍ଷିକ ବ୍ୟବସ୍ଥାରେ ସୁଧାର ଆସିପାରିବ ବୋଲି ଲକ୍ଷ୍ୟ ରଖାଯାଇଛି। ସରକାରଙ୍କ ୫-ଟି କାର୍ଯ୍ୟକ୍ରମକୁ ଆଖି ଆଗରେ ରଖି ପ୍ରତ୍ୟେକ ଅଭିଭାବକମାନଙ୍କ ମୋବାଇଲ ନମ୍ବର ସଂଯୋଗକୁ ଉକ୍ତ ତଥ୍ୟରେ ବାଧ୍ୟତାମୂଳକ କରାଯାଇଛି। ଏହି ସୂଚନା ଦେଇଛନ୍ତି ସମଗ୍ର ଶିକ୍ଷା ଅଭିଯାନର ଜିଲା ତଥ୍ୟ ଓ ପରିଚାଳନାର ବରିଷ୍ଠ ସଂଯୋଜକ ଚନ୍ଦ୍ରଜିତ ପରିଜା। ସେ ଏକଥା ମଧ୍ୟ କହିଛନ୍ତି, ଅନ୍ଲାଇନ୍ ପୋର୍ଟାଲ ମାଧ୍ୟମରେ ତଥ୍ୟ ସଂଗ୍ରହ ହେଲେ ଛାତ୍ରୀଛାତ୍ର, ଅଭିଭାବକ ଓ ବିଦ୍ୟାଳୟ କର୍ତ୍ତୃପକ୍ଷ ପ୍ରତ୍ୟେକ ଉପକୃତ ହେବେ।
