ବାରିପଦା ଅଫିସ, ୧୩ା୨- ବେକାରମୁକ୍ତ ମୟୂରଭଞ୍ଜ ଗଠନ ଦାବିରେ ଭଞ୍ଜସେନା ପକ୍ଷରୁ ବୁଧବାର ଜିଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ ସହିତ ଧାରଣା ଦିଆଯାଇଥିଲା। ଶିମିଳିପାଳର ସୁରକ୍ଷା ସମେତ ଜିଲାରେ ଥିବା ବିଭିନ୍ନ ପର୍ଯ୍ୟଟନସ୍ଥଳୀର ବିକାଶ ଏବଂ ବନ୍ୟଜାତ ଦ୍ରବ୍ୟର ଉଚିତ ବ୍ୟବସାୟୀକରଣ କରି ଜିଲାକୁ ବେକାରମୁକ୍ତ କରିବା ପାଇଁ ଭଞ୍ଜସେନା ପକ୍ଷରୁ ଏହି ଧାରଣା ଦିଆଯାଇଥିଲା। ସେନାର ଜିଲା ସଭାପତି ପିଣ୍ଟୁ ମାଇତିଙ୍କ ନେତୃତ୍ୱରେ ଶତାଧିକ ଯୁବକ ଯୋଗ ଦେଇ ‘ସରକାର ମତେ ରୋଜଗାର ଦିଅ’ ନାରା ଦେଇଥିଲେ। ଭଞ୍ଜସେନା ପକ୍ଷରୁ କୁହାଯାଇଛି ଯେ, ବିଶ୍ୱସ୍ତରୀୟ ଟ୍ରାଭେଲସ୍ ଏବଂ ଟୁରିଜମ୍ କ୍ଷେତ୍ରରେ ୩୧୯ ଲକ୍ଷ ବେରୋଜଗାର ଯୁବତୀ ଯୁବକ ପ୍ରତ୍ୟକ୍ଷ ଓ ପରୋକ୍ଷ ଭାବେ ରୋଜଗାରକ୍ଷମ ହେଉଛନ୍ତି। ଏଥିସହିତ ବିଶ୍ୱ ଅର୍ଥନୀତିରେ ଶତକଡ଼ା ୩.୯ % ଆର୍ଥିକ ଯୋଗଦାନ ଦେବାରେ ଏହା ସହାୟକ ହୋଇଥାଏ। ଜିଲାରେ ଶିମିଳିପାଳ ଜାତୀୟ ଉଦ୍ୟାନ ରହିଥିବା ବେଳେ ଏହାର ଯେଉଁଭଳି ଭାବେ ଉନ୍ନତି ହେବା କଥା ହୋଇପାରୁ ନାହିଁ, ଫଳରେ ଜିଲାର ଯୁବକମାନେ ବେକାର ହୋଇ ବସି ରହିଛନ୍ତି। ଶିମିଳିପାଳର ସମ୍ପୂର୍ଣ୍ଣ ସୁରକ୍ଷା ସମେତ ଏହାର ଚତୁଃପାର୍ଶ୍ୱରେ ଅବହେଳିତ ଅବସ୍ଥାରେ ପଡ଼ି ରହିଥିବା ଶତାଧିକ ପର୍ଯ୍ୟଟନସ୍ଥଳୀକୁ ବିକଶିତ କରାଯାଇ ପାରିଲେ ବର୍ଷ ତମାମ ସେ ସ୍ଥାନକୁ ପର୍ଯ୍ୟଟକମାନଙ୍କ ଆଗମନ ହୁଅନ୍ତା। ସେହିଭଳି ରେଳଲାଇନ୍ କ୍ଷେତ୍ରରେ ଉନ୍ନତୀକରଣ କରାଗଲେ ପର୍ଯ୍ୟଟକମାନେ ଆସିବାକୁ ଆଗ୍ରହ ପ୍ରକାଶ କରନ୍ତେ। ଉଭୟ କେନ୍ଦ୍ର ଓ ରାଜ୍ୟ ସରକାର ଏଥିପ୍ରତି ଗୁରୁତ୍ୱ ଦେବାକୁ ସେନା ପକ୍ଷରୁ ଦାବି କରାଯାଇଛି। ଶିମିଳିପାଳ ଅଭୟାରଣ୍ୟରେ ଥିବା ଦୁର୍ଲଭ ଜାତୀୟ ଔଷଧୀୟ ବୃକ୍ଷଗୁଡିକୁ ଚିହ୍ନଟ କରି ଏହାକୁ ବାହାରକୁ ରପ୍ତାନି କରାଯିବା ସହିତ ଜିଲାରେ ଆୟୁର୍ବେଦ ଔଷଧ ନିର୍ମାଣ ଶିଳ୍ପ ପ୍ରତିଷ୍ଠା କରାଯାଇପାରନ୍ତା ବୋଲି ଭଞ୍ଜସେନା ପକ୍ଷରୁ ଦର୍ଶାଯାଇଛି। ଜିଲାରେ ବନ୍ଦ ହୋଇ ପଡ଼ି ରହିଥିବା କଳକାରଖାନା ଗୁଡ଼ିକୁ କାର୍ଯ୍ୟକ୍ଷମ କରାଇବା ସହ ସବାଇ ଘାସ ଶିଳ୍ପ ଓ ବାଉଁଶ ଶିଳ୍ପ ଚାହିଦାକୁ ଦୃଷ୍ଟିରେ ରଖି କାଗଜ କଳ ଓ ବାଉଁଶ କୁଟୀର ଶିଳ୍ପ କରାଯାଇପାରିଲେ ଜିଲାରେ ବେକାରି ସଂଖ୍ୟା ହ୍ରାସ ହୋଇପାରନ୍ତା। ଏ ନେଇ ଭଞ୍ଜସେନା ପକ୍ଷରୁ ବାରମ୍ବାର ଦାବି ସତ୍ତ୍ୱେ ଉଭୟ କେନ୍ଦ୍ର ଓ ରାଜ୍ୟ ସରକାର ମୌନବ୍ରତ ଆପଣାଇଛନ୍ତି। ଫଳରେ ଜିଲାରେ ବେକାରି ସମସ୍ୟା ଜଟିଳରୁ ଜଟିଳ ହେବାରେ ଲାଗିଲାଣି। ଯଦି ରାଜ୍ୟ ଓ କେନ୍ଦ୍ର ସରକାର ଏ ଦିଗରେ ଧ୍ୟାନ ନ ଦେବେ ତାହା ହେଲେ ଆଗାମୀ ଦିନରେ ଆନ୍ଦୋଳନକୁ ଜୋରଦାର୍ କରାଯିବ ବୋଲି ସେନା ପକ୍ଷରୁ ଚେତାବନୀ ଦିଆଯାଇଛି। ଅନ୍ୟମାନଙ୍କ ମଧ୍ୟରେ ସଂଯୁକ୍ତା ବସା, ଭାନୁମିତ ଆଚାର୍ଯ୍ୟ, ଯୁବଛାତ୍ର ସଙ୍ଗଠକ ରାକେଶ ବେହେରା, ଉପଖଣ୍ଡ ସଭାପତି ସୌମ୍ୟ ଶେଖର ପାଲ୍, ନିମାୟୀ ତ୍ରିପାଠୀ, ଉପସଭାପତି ପ୍ରଶାନ୍ତ ମହାକୁଡ଼, ସମ୍ପାଦକ ରାକେଶ ମହାନ୍ତି, ମୁଖପାତ୍ର ଜ୍ୟୋତିରଞ୍ଜନ ପୃଷ୍ଟି , ସହର ସଭାପତି ସୌମ୍ୟରଞ୍ଜନ ମିଶ୍ର, ସହର ଉପସଭାପତି ଏସ୍ କେ ରାଜାଖାନ, ଅମରେଶ ସିଂ, ଆଲୋକ ବେହରା , ମନୋଜ ପାତ୍ରଙ୍କ ସମେତ ଅନ୍ୟାନ୍ୟ କର୍ମୀମାନେ ଧାରଣାରେ ସାମିଲ ହୋଇ ବିକ୍ଷୋଭ ପ୍ରଦର୍ଶନ କରିଥିଲେ।
