କଟକ ଅଫିସ,୭।୧୧- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ପକ୍ଷରୁ ଓଡ଼ିଶାର ଉଦୀୟମାନ ପେସ୍ ତାରକା ରାଜେଶ ମହାନ୍ତିଙ୍କ ଉପରୁ ବାସନ୍ଦ ଆଦେଶ ବୁଧବାର ଉଠାଇ ଦିଆଯାଇଛି। ଗତ ୧ ତାରିଖରେ ବୟସ ଜାଲିଆତି ଅଭିଯୋଗରେ ବିସିସିଆଇ ରାଜେଶଙ୍କ ସମେତ କ୍ରୀଷ୍ଣା ପଲାଇଙ୍କୁ ୨ବର୍ଷର ବାସନ୍ଦ ଆଦେଶ ଦେଇଥିଲା। ତେବେ କେବଳ ରାଜେଶଙ୍କୁ କ୍ଲିନ ଚିଟ୍ ମିଳିଛି। ବିସିସିଆଇର ଆଣ୍ଟି ଡୋପିଂ, ବୟସ ଯାଞ୍ଚ ଓ ମେଡ଼ିକାଲ ପରାମର୍ଶ ବିଭାଗର ଡ. ଅଭିଜିତ ସାଲଭି ଏ ନେଇ ବୁଧବାର ଅପରାହ୍ନରେ ଓସିଏକୁ ଏକ ମେଲ୍ ପଠାଇଛନ୍ତି। ସୂରଟଠାରେ ଆସନ୍ତା ୮ରୁ ଆରମ୍ଭ ହେବାକୁ ଥିବା ସୟଦ ମୁସ୍ତାକ ଅଲ୍ଲୀ ଟି୨୦ ଟୁର୍ନାମେଣ୍ଟ ନିମନ୍ତେ ରାଜେଶ ଖୁବଶୀଘ୍ର ରାଜ୍ୟ ଦଳରେ ଯୋଗଦେବେ ବୋଲି ଜଣାପଡ଼ିଛି।
୧ ତାରିଖରେ ରାଜ୍ୟର ଦୁଇ ପ୍ରତିଭାବାନ କ୍ରିକେଟ ଖେଳାଳିଙ୍କୁ ବୟସ ଜାଲିଆତିରେ ୨ବର୍ଷ ନିମନ୍ତେ ବାସନ୍ଦ କରାଯାଇଥିଲା। ରାଉରକେଲାର କ୍ରୀଷ୍ଣା ଓ ନୟାଗଡ଼ର ରାଜେଶ ଏହି ଆଦେଶ ପାଇଥିଲେ। ନୟାଗଡ଼ର ତୁଳସୀପୁର ଗ୍ରାମରେ ଜନ୍ମିତ ରାଜେଶଙ୍କ ଉପରେ ଲାଗିଥିବା ବୟସ ଜାଲିଆତି ଅଭିଯୋଗକୁ ବିସିସିଆଇ ଉଠାଇ ଦେଇଛି। ରାଜେଶଙ୍କର ଜନ୍ମ ନୟାଗଡ଼ର ବଡ଼ ପଣ୍ଡୁସରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ହୋଇଛି। ଏଣୁ ତାଙ୍କ ଜନ୍ମପ୍ରମାଣ ପତ୍ରର ପଞ୍ଜୀକରଣ ନମ୍ବର ନୟାଗଡ଼ ମ୍ୟୁନିସିପାଲିଟିର ୱେବସାଇଟ୍ରେ ନାହିଁ। ଯାହା ଫଳରେ ରାଜେଶଙ୍କ ଜନ୍ମ ପ୍ରମାଣପତ୍ରର ପଞ୍ଜୀକରଣ ନମ୍ବର ନୟାଗଡ଼ ମ୍ୟୁନିସିପାଲିଟିର ୱେବସାଇଟ୍ରେ ଖୋଜିଲେ ଅନ୍ୟ ଜଣେ ଯୁବକଙ୍କ ନାଁ ଓ ଠିକଣା ଦେଖାଉଛି। ଏହାକୁ ଭିତ୍ତି କରି ରାଜେଶଙ୍କ ନାମରେ ଅଭିଯୋଗ କରାଯାଇଥିଲା। କ୍ଲିନଚିଟ୍ ପାଇବା ପରେ ଏହି ପ୍ରତିଭାବାନ ପେସ ବୋଲର ଜଣଙ୍କ ପୁନର୍ବାର ରାଜ୍ୟ ଦଳକୁ ପ୍ରତ୍ୟାବର୍ତ୍ତନ କରିବେ। ସୟଦ ମୁସ୍ତାକ ଅଲ୍ଲୀ ଟି୨୦ ଟୁର୍ନାମେଣ୍ଟ ନିମନ୍ତେ ଘୋଷିତ ୧୫ଜଣିଆ ଦଳରେ ତାଙ୍କ ନାମ ଥିଲା। ବାସନ୍ଦ ଆଦେଶ ପରେ ତାଙ୍କ ବଦଳରେ ପ୍ରୟାସ ସିଂ ଙ୍କୁ ଦଳରେ ନିଆଯାଇଛି। ଓସିଏ ଚୟନକମିଟି ଅଧ୍ୟକ୍ଷ ବିଷ୍ଣୁଦେବ ମହାନ୍ତିଙ୍କୁ ଏ ସମ୍ପର୍କରେ ପଚାରିବାରୁ ସେ କହିଛନ୍ତି, ବିସିସିଆଇ ବାସନ୍ଦ ଆଦେଶ ଉଠାଇବା ପରେ ସେ ଖୁବଶୀଘ୍ର ଦଳରେ ଯୋଗଦେବେ। ଓସିଏର ପଦାଧିକାରୀଙ୍କ ସହ ବୈଠକ ଡକାଯାଇ ଏ ନିଷ୍ପତ୍ତି ନିଆଯିବ ବୋଲି ଅଧ୍ୟକ୍ଷ ମହାନ୍ତି କହିଛନ୍ତି।
