ଆଜି ହେଉଛି ବିଶ୍ୱ ପରିବେଶ ଦିବସ। ବାୟୁମଣ୍ଡଳରେ ଅଙ୍ଗାରକାମ୍ଳ ବାଷ୍ପର ଅହେତୁକ ବୃଦ୍ଧି ଏବଂ ଜଳବାୟୁ ପରିବର୍ତ୍ତନ ଯୋଗୁ ବିଶ୍ୱବାସୀ ଚିନ୍ତିତ ହୋଇପଡ଼ିଛନ୍ତି। ଏଥିରୁ ରକ୍ଷା ପାଇବା ପାଇଁ ଜୁନ୍ ୫କୁ ବିଶ୍ୱ ପରିବେଶ ଦିବସ ଭାବେ ପାଳନ କରାଯାଇଆସୁଛି। ଏକ ଅଧ୍ୟୟନରୁ ଜଣ।ପଡ଼ିଛି, କେବଳ ଭାରତର ୫ଟି ସହର ଅଧିକ ପ୍ରଦୂଷିତ। କିନ୍ତୁ ବିଶ୍ୱରେ ଏମିତି ଦେଶ ରହିଛି ଯେଉଁଠି ପ୍ରକୃତି ସେମାନଙ୍କର ସବୁକିଛି। ଭାରତର ପଡ଼ୋଶୀ ଭୁଟାନ ହେଉଛି ପ୍ରଦୂଷଣ ମୁକ୍ତ ଏବଂ ଶାନ୍ତିପୂର୍ଣ୍ଣ ଦେଶ। ଖାସ୍ କରି ଏହାର ସବୁଜିମା ଦେଖିବାକୁ ବହୁ ପର୍ଯ୍ୟଟକ ଧାଇଁ ଆସିଥାନ୍ତି। ଗ୍ରୋସ ନ୍ୟାଶନାଲ ହାପିନେସ ସେଣ୍ଟରର ଡ. ସାଙ୍ଗଡୁ ଛେତ୍ରୀ କୁହନ୍ତି, ଭୁଟାନର ଲୋକେ ପ୍ରକୃତିକୁ ଭଗବାନ ମନେ କରନ୍ତି। ଏଠାକାର ଲୋକେ ପ୍ରକୃତିକୁ ଭଲପାଆନ୍ତି। ଜୀବନର ମୂଲ୍ୟକୁ ବୁଝି ଆଗକୁ ବଢ଼ିଥାନ୍ତି। ଜାଣନ୍ତୁ ଭୁଟାନବାସୀଙ୍କ ପ୍ରକୃତିପ୍ରେମ ସମ୍ପର୍କରେ…
ଭୁଟାନରେ ୭୦ ପ୍ରତିଶତ ଜଙ୍ଗଲ :
ଭୁଟାନର ବଳ ହେଉଛି ତା’ର ପ୍ରକୃତି। ଏଠାରେ ପ୍ରାୟ ୭୦ ଭାଗ ଜଙ୍ଗଲ ରହିଛି। ଉଚ୍ଚ ପର୍ବତ, ନଦୀ, ପାଣି ଏବଂ ସବୁଜ ବନାନୀ ଏହାର ସ୍ବତନ୍ତ୍ରତା। ସରକାରଙ୍କ ପକ୍ଷରୁ ପରିବେଶ ପାଇଁ ଯେତିକି ଚିନ୍ତା କରାଯାଇନାହିଁ ବା ପଦକ୍ଷେପ ନିଆଯାଇନାହିଁ ଏଠାକାର ଲୋକେ ବେଶୀ ପରିବେଶ ଚିନ୍ତା କରିଥାନ୍ତି। ତେଣୁ ପ୍ରତ୍ୟେକ ପରିବାର ସଦସ୍ୟମାନେ ଗଛ ଲଗାଇ ପରିବେଶକୁ ସୁରକ୍ଷା ଦେଇଥାନ୍ତି। ଫଳରେ ବିଶ୍ୱର ସବୁଠୁ ଅଧିକ ଅକ୍ସିଜେନ ଏହି ଦେଶରୁ ମିଳିଥାଏ।
୨୦ ବର୍ଷ ଧରି ପ୍ଲାଷ୍ଟିକ ବ୍ୟାନ :
ପ୍ଲାଷ୍ଟିକ ପରିବେଶ ପାଇଁ କେତେ ହାନିକାରକ ତାହା ଭୁଟାନବାସୀ କେବେଠୁ ଅନୁଭବ କରିସାରିଛନ୍ତି। ୧୯୯୯ରୁ ଏଠାରେ ପ୍ଲାଷ୍ଟିକ ପ୍ରତି ପ୍ରତିବନ୍ଧକ ଲଗାଯାଇଛି। ଦୀର୍ଘ ୨୦ ବର୍ଷ ଏଠାକାର ପ୍ରତି ନାଗରିକ ଏହି ନିୟମକୁ ମାନି ଆସୁଛନ୍ତି।
ଧୂମପାନ ନିରୋଧ ଆଇନ : କୁହାଯାଏ, ୧୭୨୯ରୁ ଭୁଟାନରେ ପ୍ରଥମେ ଧୂମପାନ ନିରୋଧ ଆଇନ ପାଳନ କରାଯାଇଆସୁଛି। ୧୯୯୦ରେ ସିଗାରେଟ୍ ଟାଣିବା ପ୍ରତି ପ୍ରତିବନ୍ଧକ ଲଗାଯାଇଥିଲା। ଭୁଟାନର ପ୍ରାୟ ୨୦ଟି ଜିଲାକୁ ଧୂମପାନମୁକ୍ତ କରାଯାଇଥିବାବେଳେ ୨୦୦୪ରେ ଦେଶକୁ ସମ୍ପୂର୍ଣ୍ଣ ଧୂମପାନମୁକ୍ତ କରାଯାଇଛି। ନିୟମ ଅନୁଯାୟୀ, ଯଦି କେହି ବ୍ୟକ୍ତି ଧୂମପାନ କରୁଥିବା ଜଣାପଡ଼େ ତେବେ ତାକୁ ଆଜୀବନ ଜେଲ୍ ହୋଇଯିବ।
ଯାନବାହନ ଚଳାଚଳ ବନ୍ଦ :
ସମଗ୍ର ଭୁଟାନରେ ବିଶ୍ୱ ପରିବେଶ ଦିବସ ଉପଲକ୍ଷେ କୌଣସି ଯାନବାହନ ରାସ୍ତାରେ ଚଳାଚଳ କରେ ନାହିଁ। କେବଳ ଜରୁରୀକାଳୀନ ସେବାକୁ ଛାଡ଼ି ଦେଲେ ଅନ୍ୟ କୌଣସି ଗାଡ଼ିମୋଟର ରାସ୍ତାରେ ଚଳାଚଳ କରି ନ ଥାନ୍ତି। ଏଠାକାର ଲୋକେ ମଧ୍ୟ ଏହାକୁ ପାଳନ କରିଆସୁଛନ୍ତି।
