ଲଣ୍ଡନ,୧୪।୭- ଐତିହାସିକ ଲଡର୍ସ ଗ୍ରାଉଣ୍ଡରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ରୋମାଞ୍ଚଭରା ବିଶ୍ୱକପ୍ ଫାଇନାଲ ମ୍ୟାଚ୍ ଖେଳାଯାଇଥିଲା। ଏହି ମ୍ୟାଚ୍ ଲାଗି ପୂର୍ବତନ ଭାରତୀୟ କ୍ରିକେଟର ଗୁଣ୍ଡପା ବିଶ୍ୱନାଥ ଓ ତାଙ୍କ ଶାଳକଙ୍କୁ ଟିକେଟ୍ ମିଳି ନ ଥିଲା। ଗୁଣ୍ଡପାଙ୍କୁ ଫାଇନାଲ ଟିକେଟ୍ ଦେବା ଲାଗି ବିସିସିଆଇ କର୍ମକର୍ତ୍ତା ପ୍ରତିଶ୍ରୁତି ଦେଇଥିଲେ। ହେଲେ ଠିକ୍ ସମୟରେ ଉକ୍ତ କର୍ମକର୍ତ୍ତା ଫୋନ ଉଠାଇ ନ ଥିଲେ। ଏ ନେଇ ପୂର୍ବତନ ଭାରତୀୟ ଅଧିନାୟକ ତଥା ଭାଷ୍ୟକାର ସୁନୀଲ ଗାଭାସ୍କର ଦୁଃଖ ପ୍ରକାଶ କରିଛନ୍ତି। ବିସିସିଆଇ କିଛି ବକ୍ସ ଟିକେଟ୍ ରଖିଥିବା ନେଇ ମୁଁ ନିଶ୍ଚିତ। ମୋ ମତରେ ବିସିସିଆଇ ୧୯୮୩ ବିଶ୍ୱକପ୍ ଚାମ୍ପିୟନ କପିଳ ଦେବ ଓ ମହିନ୍ଦର ଅମରନାଥ ୨୦୧୧ ବିଶ୍ୱକପ୍ ବିଜୟୀ ଦଳର ସଦସ୍ୟ ଯୁବରାଜ ସିଂଙ୍କୁ ମଧ୍ୟ ଫାଇନାଲ ଲାଗି ଆମନ୍ତ୍ରଣ କରିବା କଥା। ଭାରତୀୟ ଦଳର ବିଶ୍ୱକପ୍ ସଫଳତାରେ ଏମାନଙ୍କର ବଡ଼ ହାତ ରହିଛି। ସେମାନଙ୍କୁ ସମ୍ମାନିତ କରାଯିବା ଉଚିତ। ଏପରି କି କିମ୍ବଦନ୍ତୀ କ୍ରୀଡ଼ାବିତ ପ୍ରକାଶ ପାଦୁକୋନ ଓ ମିଲଖା ସିଂଙ୍କୁ ମଧ୍ୟ ଆମନ୍ତ୍ରଣ କରାଯାଇ ପାରିଥାନ୍ତା ବୋଲି ଗାଭାସ୍କର କହିଛନ୍ତି। ରବିବାର ଐତିହାସକ ମ୍ୟାଚ୍ ଉପଭୋଗ କରିବା ଲାଗି ବିସିସିଆଇ କର୍ମକର୍ତ୍ତା ଓ ପୂର୍ବତନ କର୍ମକର୍ତ୍ତା ଲଡର୍ସରେ ଉପସ୍ଥିତ ଥିଲେ।
