ଢେଙ୍କାନାଳ ଅଫିସ, ୩୦।୬ – ବିବାହର ୫ବର୍ଷ ପରେ ପଶ୍ଚିମବଙ୍ଗର ଜଣେ ମହିଳା ସ୍ବାମୀଙ୍କ ଦ୍ୱାରା ଅକଥନୀୟ ନିର୍ଯାତନାର ଶିକାର ହୋଇଥିବା ଅଭିଯୋଗ ହୋଇଛି। ସମ୍ପୃକ୍ତ ମହିଳା ନ୍ୟାୟ ପାଇଁ ସାମାଜିକ ସଙ୍ଗଠନର କର୍ମକର୍ତ୍ତାଙ୍କ ସହାୟତାରେ ଶନିବାର ଢେଙ୍କାନାଳ ଏସ୍ପି ଅନୁପମା ଜେମ୍ସଙ୍କ ଦ୍ୱାରସ୍ଥ ହୋଇଛନ୍ତି। ଅଭିଯୁକ୍ତ ସ୍ବାମୀଙ୍କୁ ଗିରଫ କରିବାକୁ ପୀଡ଼ିତା ଦାବି କରିଛନ୍ତି।
ପଶ୍ଚିମବଙ୍ଗର ଦକ୍ଷିଣ ଚବିଶପ୍ରଗଣା ଜିଲା ଅନ୍ତର୍ଗତ ଠାକୁରପୁକାର ଥାନା ଅଞ୍ଚଳର ସମ୍ପୃକ୍ତା ମହିଳା ଢେଙ୍କାନାଳ ଜିଲା କାମାକ୍ଷାନଗର ଥାନା ଅଞ୍ଚଳର ଜଣେ ଯୁବକଙ୍କୁ ୨୦୧୩ ଜୁନ୍ ୨୨ରେ ହିନ୍ଦୁ ମ୍ୟାରେଜ ଆକ୍ଟ ଅନୁଯାୟୀ କଲିକତାରେ ରେଜିଷ୍ଟ୍ରୀ ବିବାହ କରିଥିଲେ। ଦୀର୍ଘ ୬ବର୍ଷ ହେଲା ସେମାନେ ସ୍ତ୍ରୀସ୍ବାମୀ ଭାବେ ଚଳୁଥିଲେ। ଏପରି କି ଯୁବକ ଜଣକ ତାଙ୍କୁ ନିଜ ଘରକୁ ଆଣିଥିଲେ। ଏହାପରେ ଭୁବନେଶ୍ୱରର ମାଷ୍ଟରକ୍ୟାଣ୍ଟିନରେ ଥିବା ଏକ ହୋଟେଲରେ ରଖିଥିଲେ। ୬ବର୍ଷ ମଧ୍ୟରେ ସ୍ବାମୀ ୧୭ଥର ଗର୍ଭପାତ କରିଛନ୍ତି, ଯାହାର ରିପୋର୍ଟ ମହିଳାଙ୍କ ନିକଟରେ ରହିଛି। ଏପରି କି ତାଙ୍କୁ ଅନୈତିକ କାର୍ଯ୍ୟରେ ଲିପ୍ତ କରିବାକୁ ଉଦ୍ୟମ ମଧ୍ୟ କରିଥିଲେ। ଅଧିକାଂଶ ସମୟରେ ଶାରୀରିକ, ମାନସିକ ନିର୍ଯାତନା ଦେଉଥିଲେ। ଏସବୁ ଭିତରେ ଜୁନ୍ ୧୫ରେ ସ୍ବାମୀ ହଠାତ୍ ତାଙ୍କୁ ଛାଡ଼ି କେଉଁଆଡ଼େ ଚାଲିଯାଇଛନ୍ତି। ଶାଶୁ ଘର ଲୋକଙ୍କ ସହ ଯୋଗାଯୋଗ କରିବା ପରେ ସ୍ବାମୀ ୨ୟ ବିବାହ କରିସାରିଥିବା ସେମାନେ ସୂଚନା ଦେଇଥିଲେ। ସ୍ବାମୀଙ୍କ ଗଁାକୁ ଯାଇ ଖୋଜାଖୋଜି କରି ସେ ନିରାଶ ହୋଇଛନ୍ତି। ଢେଙ୍କାନାଳ ରେଳଷ୍ଟେଶନରେ ତାଙ୍କୁ ଅନେକ ସମୟରେ ଭୋଗ ଉପାସରେ ଅସହାୟ ଅବସ୍ଥାରେ ରହିବାକୁ ପଡ଼ିଛି। ଭାଷା ଜାଣି ନ ଥିବାରୁ ସେ ହିନସ୍ତା ହେଉଛନ୍ତି। ଶନିବାର ଅନ୍ତର୍ଜାତୀୟ ମାନବ ଅଧିକାର ସ୍ବେଚ୍ଛାସେବୀ ଅନୁଷ୍ଠାନର କର୍ମକର୍ତ୍ତା ସସ୍ମିତା ଦାସଙ୍କ ସହାୟତାରେ ନିର୍ଯାତିତା ମହିଳା ଜଣକ ଏସ୍ପିଙ୍କୁ ଭେଟି ନ୍ୟାୟ ମାଗିଛନ୍ତି।
ଏ ନେଇ ଏସ୍ପି କୁହନ୍ତି, ଅଭିଯୋଗକାରିଣୀ ବିବାହର ସମସ୍ତ ପ୍ରମାଣପତ୍ର ଦେଖାଉଛନ୍ତି। ଉକ୍ତ କାଗଜପତ୍ରରେ କେତେ ସତ୍ୟତା ରହିଛି, ତାହାର ବିଧିବଦ୍ଧ ତଦନ୍ତ କରାଯିବ। ଏବେ ଅଭିଯୁକ୍ତ ଏବଂ ତାଙ୍କ ପରିବାର ଗ୍ରାମରେ ନାହାନ୍ତି। ଅଭିଯୋଗର ସତ୍ୟାସତ୍ୟ ଅନୁଧ୍ୟାନ କରାଯିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
