ଦିଗପହଣ୍ଡି,୧୩ା୮(ଡି.ଏନ.ଏ.)- ଦିଗପହଣ୍ଡି ଓ କୁକୁଡ଼ାଖଣ୍ଡି ତହସିଲ ଇଲାକାରେ ଥିବା କେରାଣ୍ଡିମାଳ ପର୍ବତକୁ ଗତ ପ୍ରାୟ ୧୫ ବର୍ଷ ନିର୍ଦ୍ଦିଷ୍ଟ କେତେଜଣ ପଥର ମାଫିଆ ଲୁଟି ଚାଲିଛନ୍ତି। ଏଠାରୁ ଦୁର୍ମୂଲ୍ୟ ଗ୍ରାନାଇଟ ପଥର ଚୋରାଚାଲାଣ କରାଯାଉଛି।ତେବେ ବିଳମ୍ବରେ ହେଉ ପଛେ ପୋଲିସ ପ୍ରଶାସନ କେତେଜଣ ଲୁଟେରାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବ୍ରହ୍ମପୁର ସହରର ଜଣେ ଜଣାଶୁଣା କ୍ରଶର ମାଲିକ, ତାଙ୍କ ଦୁଇ ସୁପରଭାଇଜର, ୫ ଗାଡ଼ି ଚାଳକ ଓ ୨ ସହଯୋଗୀଙ୍କୁ ବିଭିନ୍ନ ଦଫା ଏବଂ ବିସ୍ଫୋରକ ସାମଗ୍ରୀ ନିୟନ୍ତ୍ରଣ ଆଇନର କେତେକ ଧାରା ଅନୁଯାୟୀ କୋର୍ଟଚାଲାଣ କରିବା ପରେ ଏ ନେଇ ଚର୍ଚ୍ଚା ଜୋର ଧରିଛି। ପୂର୍ବରୁ ଅନେକଥର ପୋଲିସ ମହୁଡ଼ା ନିକଟ ପଥରଖାଦାନ ଓ କ୍ରଶର ୟୁନିଟ ଉପରେ ଚଢ଼ାଉ କରି କେତେଜଣ ଶ୍ରମିକ ଓ ଟ୍ରାକ୍ଟର ଚାଳକମାନଙ୍କୁ ଗିରଫ କରିଛି । କିନ୍ତୁ କ୍ରଶର ମାଲିକ କିମ୍ବା ତାଙ୍କ କର୍ମଚାରୀଙ୍କୁ ଧରିବାକୁ ପୋଲିସ କି ପ୍ରଶାସନ କେହି ସାହସ କରିପାରୁ ନ ଥିଲା ।
ଗତ କିଛିବର୍ଷ ହେଲା ଦିଗପହଣ୍ଡି ବ୍ଲକ ଅଧୀନ ବିଭିନ୍ନ ଅଞ୍ଚଳରେ ଥିବା ପାହାଡ଼ ପର୍ବତରୁ ରାତାରାତି ଟନ୍ ଟନ୍ ପଥର ଚାଲାଣ ହେଉଛି। ମୂଲ୍ୟବାନ ପଥର ମଧ୍ୟରେ ରହିଛି କଳା ଗ୍ରାନାଇଟ। ଏସବୁ ଗ୍ରାନାଇଟ ପଥର ବିଶାଖାପାଟଣା, ହାଇଦ୍ରାବାଦ, ଭୁବନେଶ୍ୱର, ପାରାଦୀପ, ବ୍ରହ୍ମପୁର, କଟକ ଆଦିକୁ ଚାଲାଣ ହେଉଛି। ଏପରିକି ଗଞ୍ଜାମ ଜିଲାର ବହୁ କ୍ରଶରକୁ ମଧ୍ୟ ପଥର ଚୋରାଚାଲାଣ ହେଉଥିବା ଅନୁସନ୍ଧାନରୁ ଜଣାପଡ଼ିଛି । ଅଳ୍ପ କେତେକ ପଥର ଖାଦାନ (କ୍ବାରି)କୁ ଛାଡ଼ିଦେଲେ ବହୁ ସଂଖ୍ୟକ ପଥରକ୍ବାରୀ ବିନା ଲିଜ୍ରେ ଚାଲିଛି। ଏଥିରେ ପଥରମାଫିଆ ମାଲାମାଲ ହେଉଥିବା ବେଳେ ସରକାର ରାଜସ୍ବ ହରାଉଛନ୍ତି। ଅନ୍ୟପକ୍ଷରେ ପଥର ଖାଦାନଗୁଡ଼ିକରେ ଜିଲୋଟିନ, ଡିନାମାଇଟ ଭଳି ବିସ୍ଫୋରକ ଖଞ୍ଜି କମ୍ପ୍ରେଶର ମେଶିନ ଜରିଆରେ ପଥର ଫଟାଯାଉଛି। ବିସ୍ଫୋରଣ ଏତେ ଶକ୍ତିଶାଳୀ ଯେ, ରାସ୍ତା ଓ ଚାଷଜମିକୁ ପଥରଖଣ୍ଡ ସବୁ ଛିଟିକି ଆସୁଛି । ଲିଜ୍ ଦିଆଯାଇଥିବା ଖାଦାନରୁ ପଥର ଉତ୍ତୋଳନ ବେଳେ ରାଜ୍ୟ ପ୍ରଦୂଷଣ ବୋର୍ଡ ପକ୍ଷରୁ ଜାରି କରାଯାଇଥିବା ସର୍ତ୍ତ ପାଳନ କରାଯାଉନାହିଁ । ଲିଜ୍ଧାରୀ ସଂସ୍ଥା କିମ୍ବା ବ୍ୟକ୍ତିବିଶେଷ କେତେ ପରିମାଣର ପଥର ଉତ୍ତୋଳନ କଲେ ତାହା ତଦାରଖ ପାଇଁ ପଦକ୍ଷେପ ନିଆଯାଉନାହିଁ । ପ୍ରତ୍ୟେକ ଦିନ ଟ୍ରକ, ଟ୍ରାକ୍ଟର ଓ ଟିପ୍ପରରେ ମେଟାଲ, ପଥର, ଚିପ୍ସ, ସ୍ପଲ ଚୋରାଚାଲାଣ କରାଯାଉଥିଲେ ମଧ୍ୟ ପୋଲିସ ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ସାଧାରଣରେ ସନ୍ଦେହ ସୃଷ୍ଟି କରିଛି । ରାଜ୍ୟ କ୍ରାଇମବ୍ରାଞ୍ଚ ସିଆଇଡ଼ି କର୍ତ୍ତୃପକ୍ଷଙ୍କ ନିର୍ଦ୍ଦେଶକ୍ରମେ ପୋଲିସ ଏବେ ଚଢ଼ାଉ ପାଇଁ ତପତ୍ର ହୋଇଛି। ଦିଗପହଣ୍ଡି ତହସିଲଦାର ଅଦୈତ କୁମାର ସ୍ବାଇଁ କହିଛନ୍ତି, ପଥର ଖାଦାନରେ ବ୍ଲାଷ୍ଟିଂ ପାଇଁ କୌଣସି ଲିଜ୍ଧାରୀଙ୍କୁ ଅନୁମତି ଦିଆଯାଇନାହିଁ। ଥାନା ଆଇଆଇସି ଗୌରାଙ୍ଗ ଚରଣ ସାହୁ ପଥର ଚୋରାଚାଲାଣ ଓ ବିସ୍ଫୋରକ ସାମଗ୍ରୀ କାରବାର ସମ୍ପର୍କରେ ତଦନ୍ତ ଚାଲୁ ରହିଥିବା କହିଛନ୍ତି। ଅଭିଯୁକ୍ତଙ୍କ ଆର୍ଥିକ କାରବାର ସଂକ୍ରାନ୍ତରେ ନଜର ରଖାଯାଇଛି । ଆବଶ୍ୟକ ହେଲେ ସେମାନଙ୍କ ବ୍ୟାଙ୍କ ଆକାଉଣ୍ଟ ଅଚଳ ପାଇଁ ପଦକ୍ଷେପ ନିଆଯିବ।
