ମୁମ୍ବାଇ: ‘ଶୁଭମଙ୍ଗଳ ଜ୍ୟାଦା ସାବ୍ଧାନ’ର ଅଭିନେତ୍ରୀ ମାନଭି ଗାଗାରୁଙ୍କୁ ଏକ ଫ୍ୟାଶନ ବ୍ରାଣ୍ଡ କମ୍ପାନୀ କ୍ଷମା ମାଗିଛି। ମାନ୍ଭିଙ୍କ ବିନା ଅନୁମତିରେ ଏକ କମ୍ପାନୀ ବିଜ୍ଞାପନ ପାଇଁ ତାଙ୍କ ଫଟୋ ବ୍ୟବହାର କରିଥିଲା। ଖାଲି ବ୍ୟବହାର କରି ନ ଥିଲା ବରଂ ତାଙ୍କ ସହିତ ଭୁଲ ଟ୍ୟାଗ୍ଲାଇନ ମଧ୍ୟ ଲେଖିଥିଲା। ଏହା ପରେ ମାନ୍ଭି ଗାଗାରୁ କମ୍ପାନୀ ଉପରେ କ୍ରୋଧ ପ୍ରକାଶ କରିଥିଲେ।
ମାନ୍ଭି ତାଙ୍କ ଅଫିସିଆଲ ଟୁଇଟର ଆକାଉଣ୍ଟରେ ଏକ ଫ୍ୟାଶନ ବିଜ୍ଞାପନର ସ୍କ୍ରିନସଟ୍ ଶେୟାର କରିଥିଲେ। ସେ କମ୍ପାନୀ ବିରୋଧରେ ନିଜର କ୍ରୋଧ ପ୍ରକାଶ କରି ଲେଖିଛନ୍ତି, ‘ମୋର ମୋଟାପଣ ଲୁଚାଇବା ପାଇଁ ମୁଁ ଏହି ପୋଷାକ ପିନ୍ଧି ନାହିଁ। ଏହି ବ୍ରାଣ୍ଡ୍କୁ ମୋର ଫଟୋ ବ୍ୟବହାର କରିବାକୁ କିମ୍ବା କାହାକୁ ଫ୍ୟାଟ୍ କରିବା ପାଇଁ ଅନୁମତି ନାହିଁ । ମୁଁ ସେମାନଙ୍କର ଖରାପ ଟ୍ୟାଗ୍ଲାଇନ ବିରୋଧରେ।’
ମାନ୍ଭିଙ୍କ ଏହି ଟୁଇଟ୍ ପରେ କମ୍ପାନୀ ତାଙ୍କୁ କ୍ଷମା ମାଗିଛି। କମ୍ପାନୀ ସୋସିଆଲ ମିଡିଆ ଜରିଆରେ କ୍ଷମା ମାଗି ଲେଖିଛି, ‘ଆମେ ଖୁବ୍ ଲଜ୍ଜିତ। କମ୍ପାନୀ ଆହୁରି ଲେଖିଛି, ଆମର ଲକ୍ଷ୍ୟ ସବୁବେଳେ ଆମର ଗ୍ରାହକଙ୍କ ସୌନ୍ଦର୍ଯ୍ୟକୁ ପ୍ରସ୍ଫୁଟିତ କରିବା ଏବଂ ସେମାନଙ୍କ ମୁହଁରେ ହସ ଆଣିବା। ଆମ କମ୍ପାନୀର ଏହା ଏକ ବଡ଼ ଭୁଲ ଥିଲା, ତେଣୁ ଏଥିପାଇଁ କ୍ଷମା ପ୍ରାର୍ଥନା କରୁଛୁ। ସେହି ବିଜ୍ଞାପନକୁ ମଧ୍ୟ ହଟାଇ ଦିଆଯାଇଛି। ମାନଭି ସୋସିଆଲ ମିଡିଆ ମାଧ୍ୟମରେ କମ୍ପାନୀର କ୍ଷମା ପ୍ରାର୍ଥନା ସମ୍ପର୍କରେ ମଧ୍ୟ ସୂଚନା ଦେଇଛନ୍ତି।
