ଭୁବନେଶ୍ୱର,୨୮।୪(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) କରୋନା ସଂକ୍ରମଣରୁ ସହରକୁ ମୁକ୍ତ କରିବା ଲକ୍ଷ୍ୟରେ କଟକଣା ବଳବତ୍ତର ରଖିଛି। କେନ୍ଦ୍ର ସରକାର ଶନିବାର ସର୍ତ୍ତମୂଳକ ଭାବେ ଦୋକାନ ଖୋଲିବାକୁ ନିର୍ଦ୍ଦେଶ ଦେଇଥିଲେ। ରବିବାର ଭୁବନେଶ୍ୱରର କେତେଜଣ ଦୋକାନୀ ବିଏମ୍ସିର ବିନା ଅନୁମତିରେ ଦୋକାନ ଖୋଲିଥିଲେ। ଫଳରେ ସେମାନଙ୍କ ଦୋକାନ ଉପରେ ବିଏମସି ପକ୍ଷରୁ ଚଢାଉ କରାଯାଇ ଜରିମାନା ଆଦାୟ କରାଯାଇଛି। ବିଏମ୍ସି ପକ୍ଷରୁ ଯେ ପର୍ଯ୍ୟନ୍ତ ନୂଆ ନିର୍ଦ୍ଦେଶନାମା ଜାରି କରାଯାଇନାହିଁ ସେ ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନକୁ ଛାଡି କୌଣସି ଦୋକାନ ଖୋଲିବ ନାହିଁ ବୋଲି ବିଏମସି ଡେପୁଟି କମିଶନର ଶୁଭେନ୍ଦୁ ସାହୁ କହିଛନ୍ତି। କେବଳ ନିର୍ମାଣ ସାମଗ୍ରୀ ଦୋକାନ ଖୋଲା ରହିବ ସହ ବିକ୍ରି କରାଯିବ। ସମ୍ପୃକ୍ତ ଦୋକାନୀମାନେ ରାତିରେ ଯାନବାହାନ ଯୋଗେ ସ୍ଥାନାନ୍ତର କରିପାରିବେ ବୋଲି ଡେପୁଟି କମିଶନର ସାହୁ କହିଛନ୍ତି।
ରବିବାର ଭୁବନେଶ୍ୱରରେ ବିଭିନ୍ନ ଅଞ୍ଚଳରେ ବ୍ୟବସାୟୀ ଦୋକାନ ଖୋଲି ବ୍ୟବସାୟ କରୁଥିବା ନଜରକୁ ଆସିଥିଲା। ଦୋକାନ ବନ୍ଦ ରଖିବାକୁ ବିଏମ୍ସି ଦ୍ୱାରା ସ୍ବତନ୍ତ୍ର ନିର୍ଦ୍ଦେଶନାମା ପ୍ରକାଶ ପାଇଥିଲା। ହେଲେ ବ୍ୟବସାୟୀମାନେ କେନ୍ଦ୍ର ସରକାରଙ୍କ ଦ୍ୱାରା ଦିଆଯାଇଥିବା ନିର୍ଦ୍ଦେଶନାମାକୁ ଦେଖାଇ ଦୋକାନ ଖୋଲିଥିଲେ। ରାଜ୍ୟ ସରକାର ବିଏମ୍ସି କମିଶନରଙ୍କୁ ଭୁବନେଶ୍ୱରରେ କ’ଣ ଖୋଲାଯିବ ଓ ନ ଖୋଲିବ ତା’ର ବିଚାର କରିବାକୁ ଦାୟିତ୍ୱ ଦେଇଥିଲେ। ହେଲେ ବିଏମ୍ସି ନିର୍ଦ୍ଦେଶକୁ ୩ ଜୋନର ମିଠା, ଗ୍ୟାରେଜ ଓ ଛୋଟ ଛୋଟ ଦୋକାନୀମାନେ ଅମାନ୍ୟ କରି ଦୋକାନ ଖୋଲିଥିବାରୁ ସେମାନଙ୍କଠାରୁ ସୋମବାର ୫୦ହଜାରୁ ଊର୍ଦ୍ଧ୍ୱ ଟଙ୍କା ଜରିମାନା ଆଦାୟ ସହ ନୂଆ ନିର୍ଦ୍ଦେଶନାମା ନ ଆସିବା ଯାଏ ଦୋକାନ ବନ୍ଦ ରଖିବାକୁ ଚେତାବନୀ ଦିଆଯାଇଛି।
