ବରପାଲିି, ୧୫।୭ (ଡି.ଏନ.ଏ): ହସ୍ତତନ୍ତ ଓ ବିୟନଶିଳ୍ପରେ ଅନେକ କଳା ମଧ୍ୟରୁ ବାନ୍ଧକଳା ଅନ୍ୟତମ । ଏହି ଅନନ୍ୟ କଳାକୃତି ଓ ହସ୍ତତନ୍ତ ବୁଣା ସମ୍ବଲପୁରୀ ଶାଢ଼ୀ ପାଇଁ ବରଗଡ଼ ଜିଲା ବରପାଲି ବିଶ୍ୱ ବିଖ୍ୟାତ । ସମ୍ପ୍ରତି ରାଜ୍ୟ ଓ ରାଜ୍ୟବାହାରେ ବରପାଲି ମାଟିର ବହୁ ବାନ୍ଧଶିଳ୍ପୀ ସମ୍ମାନିତ ହୋଇଛନ୍ତି । ତନ୍ମଧ୍ୟରୁ ବିଦ୍ୟାବତୀ ମେହେର ଅନ୍ୟତମ। ବର୍ତ୍ତମାନ ଆଧୁନିକ ଯୁଗରେ ନୂତନ ଶୈଳୀ ଯୋଗୁ ମେସିନରେ ତିଆରି ଲୁଗା, ହାତରେ ତିଆରି ବାନ୍ଧ ଆଦି କମ୍ପ୍ୟୁଟର ମାଧ୍ୟମରେ ଡିଜାଇନ ହୋଇପାରୁଛି । ଏହାକୁ ନେଇ ବରପାଲିର ଜଣେ ଯୁବତୀ ସୁଶ୍ରୀ ବିଦ୍ୟାବତୀ ମେହେର ନିଜର ଦୃଢ଼ ଇଚ୍ଛାଶକ୍ତି ତଥା ଆଗ୍ରହ ବଳରେ ବାନ୍ଧକଳାକୁ କମ୍ପ୍ୟୁଟର ମାଧ୍ୟମରେ ଗ୍ରାଫ ଡିଜାଇନ କରି ନୂତନ ଦିଗନ୍ତ ସୃଷ୍ଟି କରିଛନ୍ତି । ସେ ଏହି କ୍ଷେତ୍ରରେ ଉଲ୍ଲେଖନୀୟ ଭୂମିକା ଗ୍ରହଣ କରି ରବିଦ୍ୟାବତୀ ଆମେରିକାଠାରେ ସମ୍ବର୍ଦ୍ଧିତ ହୋଇଛନ୍ତି ।
ବରଗଡ ଜିଲା ସୀମାନ୍ତ ଛତିଶଗଡ ରାଜ୍ୟର ଶକରା ଗ୍ରାମରେ ବାପା ହେମ ସାଗର ମେହେରଙ୍କ ଜ୍ୟେଷ୍ଠା କନ୍ୟା ବିଦ୍ୟାବତୀ । ପରିବାରର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବାରୁ ସେ ଉଚ୍ଚ ଶିକ୍ଷା ଗ୍ରହଣ କରିପାରିନାହାନ୍ତି । କିନ୍ତୁ ବରପାଲିଠାରେ ନୂତନ ଭାବେ ଖୋଲିଥିବା ଏକ ଗୋଷ୍ଠୀ ସୂଚନା ସାଧନ କେନ୍ଦ୍ରରେ ସେ ୨୦୧୬ରେ ଆଡମିଶନ କରି କମ୍ପ୍ୟୁଟର ତାଲିମ ନେଇଥିଲେ । କେନ୍ଦ୍ରର ଅଧ୍ୟକ୍ଷ ତାଙ୍କୁ ଡିଜାଇନ ତିଆରି କରିବାର ଆଉ ଏକ ଭିନ୍ନ ଧରଣର ସଫ୍ଟୱେର ବିଷୟରେ ତାଲିମ ଦେଇଥିଲେ। ବାନ୍ଧକଳାକୁ ଗ୍ରାଫ ଡିଜାଇନ କରିବାରେ ବିଦ୍ୟାବତୀଙ୍କ ସଫଳତା ଦେଖି ସଂସ୍ଥା ପକ୍ଷରୁ ତାଙ୍କ ନାମକୁ ଆମେରିକାର ଇଣ୍ଟରନେଟ୍ ସୋସାଇଟିକୁ ସୁପାରିଶ କରାଯାଇଥିଲା। ସୌଭାଗ୍ୟବଶତଃ ବିଶ୍ୱର କେତେକଙ୍କ ମଧ୍ୟରେ ବିଦ୍ୟାବତୀ ଆମେରିକାଠାରେ ସମ୍ବର୍ଦ୍ଧିତ ହୋଇଥିଲେ । ସେ ଏବେ ବରପାଲିଠାରେ ବାନ୍ଧ ଡିଜାଇନ ସହ ବୁଣାବୁଣି ଓ ରଙ୍ଗକାମ କରୁଛନ୍ତି । କମ୍ପ୍ୟୁଟର ମାଧ୍ୟମରେ ନୂତନତାକୁ ଆହ୍ବାନ କରିବା ସହ ବ୍ୟବସାୟରେ ଉନ୍ନତି ଓ ବୁଣାକାରଙ୍କୁ ସହଯୋଗ କରିବା ପାଇଁ ସେ ଲକ୍ଷ୍ୟ ରଖିଥିବା କହିଛନ୍ତି ।
