ତିହିଡ଼ି, ୨୨ା୧(ଡି.ଏନ.ଏ.)-ଭଦ୍ରକ ଜିଲା ତିହିଡ଼ି ବିଦ୍ୟୁତ୍ ଉପଖଣ୍ଡ ଅଧୀନରେ ତିହିଡ଼ି ଓ ଚାନ୍ଦବାଲି ବ୍ଲକର ୧୩ ହଜାର ପରିବାରକୁ ବିଦ୍ୟୁତ୍ ସଂଯୋଗ ଦିଆଯାଇଛି। ରାଜୀବ ଜ୍ୟୋତି ଓ ସୌଭାଗ୍ୟ ଜ୍ୟୋତି ଯୋଜନାରେ ଏସବୁ ପରିବାରକୁ ବିଦ୍ୟୁତ୍ ସଂଯୋଗ ଦିଆଯାଇଛି। ଇତିମଧ୍ୟରେ ରାଜୀବ ଜ୍ୟୋତି ଯୋଜନା ବନ୍ଦ ହୋଇଯାଇଥିବା ବେଳେ ଆସନ୍ତା ମାର୍ଚ୍ଚ ୩୧ତାରିଖରେ ସୌଭାଗ୍ୟ ଜ୍ୟୋତି ଯୋଜନା ବନ୍ଦ ହେବ ବୋଲି ଜଣାଯାଇଛି। ତେବେ ଏହି ସମୟ ସୀମା ମଧ୍ୟରେ ବାଦ୍ ପଡ଼ିଥିବା ପରିବାରଗୁଡ଼ିକୁ ବିଦ୍ୟୁତ୍ ସଂଯୋଗ ଦିଆଯିବ ବୋଲି ବିଦ୍ୟୁତ୍ ଉପଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ଜଣାଯାଇଛି। ଅପରପକ୍ଷେ ତାଲିକାଭୁକ୍ତ ହୋଇ ନ ଥିବା କେତେକ ପରିବାର ମଧ୍ୟ ଏବେ ବି ଅନ୍ଧାରରେ ରହିଛନ୍ତି। ଯୋଜନା ବନ୍ଦ ହେବା ପରେ ସେମାନେ କେମିତି ବିଦ୍ୟୁତ୍ ସଂଯୋଗ ପାଇବେ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
୨୦୧୧ଏପ୍ରିଲଠାରୁ ରାଜୀବ ଜ୍ୟୋତି ଯୋଜନା ଆରମ୍ଭ ହୋଇଥିଲା। ଯୋଜନାରେ ବିପିଏଲ୍ ପରିବାରଗୁଡ଼ିକୁ ବିଦ୍ୟୁତ୍ ସଂଯୋଗ ଦିଆଯାଇଥିଲା। ତେବେ ଧାର୍ଯ୍ୟ ସମୟସୀମା ମଧ୍ୟରେ ସମସ୍ତ ପରିବାର ବିଦ୍ୟୁତ୍ ସଂଯୋଗ ପାଇପାରି ନ ଥିଲେ। ଫଳରେ ୨ୟ ପର୍ଯ୍ୟାୟରେ ପୁଣି ସଂଯୋଗ କାର୍ଯ୍ୟ ଆରମ୍ଭ ହୋଇ ସମସ୍ତ ପରିବାରକୁ ବିଦ୍ୟୁତ୍ ଯୋଗାଇ ଦିଆଯାଇଥିଲା। ପରେ ସମସ୍ତ ପରିବାରକୁ ବିଦ୍ୟୁତ୍ ସଂଯୋଗ କରାଯିବା ଲକ୍ଷ୍ୟ ନେଇ ସୌଭାଗ୍ୟ ଯୋଜନା ଆରମ୍ଭ ହୋଇଥିଲା। ୨୦୧୮ ଏପ୍ରିଲଠାରୁ ଏହା ଆରମ୍ଭ ହୋଇ ୨୦୧୯ ଡିସେମ୍ବର ୩୧ ସୁଦ୍ଧା ସମ୍ପୂର୍ଣ୍ଣ କରାଯିବାକୁ ଲକ୍ଷ୍ୟ ରଖାଯାଇଥିଲା। ତେବେ ଧାର୍ଯ୍ୟ ସମୟ ସୀମା ମଧ୍ୟରେ ବିଦ୍ୟୁତ୍ ସଂଯୋଗ କାର୍ଯ୍ୟ ସମ୍ପୂର୍ଣ୍ଣ ନ ହେବାରୁ ୨୦୨୦ ମାର୍ଚ୍ଚ ୩୧ତାରିଖ କାର୍ଯ୍ୟ ସମ୍ପୂର୍ଣ୍ଣ ପାଇଁ ନିର୍ଦ୍ଦେଶ ଦିଆଯାଇଛି। ସଂଯୋଗ କାର୍ଯ୍ୟ ଦାୟିତ୍ୱରେ ଥିବା ଲେଜର କେବୁଲ ବାଦ୍ ପଡ଼ିଥିବା ପରିବାରକୁ ବିଦ୍ୟୁତ୍ ସଂଯୋଗ କରୁଥିବା ଜଣାଯାଇଛି। ତେବେ ଏହି ଯୋଜନାରେ ତାଲିକାଭୁକ୍ତ ହୋଇ ନ ଥିବା କେତେକ ପରିବାର ରହିଛନ୍ତି। ସେହି ପରିବାରଗୁଡ଼ିକ ପରେ ଆବେଦନ କରିଥିଲେ ମଧ୍ୟ ସେମାନଙ୍କୁ ବିଦ୍ୟୁତ୍ ସଂଯୋଗ ମିଳିବା ସମ୍ଭବ ହେବନାହିଁ। କୌଣସି ନୂଆ ଯୋଜନା ଆରମ୍ଭ ହେଲେ ଜିଲା ବିଦ୍ୟୁତ୍ ବୈଠକରେ ଆଲୋଚନା ପରେ ସ୍ଥିର ହେବା ପରେ ସେମାନେ ବିଦ୍ୟୁତ୍ ସଂଯୋଗ ପାଇପାରିବେ ବୋଲି ବିଦ୍ୟୁତ୍ ବିଭାଗ ଏସ୍ଡିଓ ଜିତେନ୍ଦ୍ର ବେହେରା କହିଛନ୍ତି। ବାଦ୍ ପଡ଼ିଥିବା ପରିବାର ସଂଖ୍ୟା ବହୁତ କମ୍ ଅଟେ ଏବଂ ସେମାନେ ଯୋଜନା ସମ୍ପର୍କରେ ଜାଣିପାରି ନ ଥିବାରୁ ବାଦ୍ ପଡ଼ିଥିବା ଏସ୍ଡିଓ ବେହେରା କହିଛନ୍ତି।
