ଭୋଗରାଇ, ୧୦।୪(ଡି.ଏନ.ଏ.)-କରୋନା ପାଇଁ ବାଲେଶ୍ୱର ଜିଲା ଭୋଗରାଇ ସୀମାନ୍ତ ବିଶ୍ୱପ୍ରସିଦ୍ଧ ଚନ୍ଦନେଶ୍ୱର ମହାଦେବଙ୍କ ଚୈତ୍ର ଚଡ଼କ ମେଳା ଚଳିତବର୍ଷ ଫିକା ପଡ଼ିଛି। ଚନ୍ଦନେଶ୍ୱର ଟ୍ରଷ୍ଟ ବୋର୍ଡ଼ ତଥା ଜିଲା ପ୍ରଶାସନର କଡ଼ା କଟକଣା ଯୋଗୁ ହୁଗୁଳି ଗ୍ରାମର ଜଳଯନ୍ତ୍ର ଦେବତା ସମିତି ସେବାୟତ ଓ ଭକ୍ତମାନେ ନିରାଡମ୍ବର ଭାବେ ବୁଧବାର ଚନ୍ଦନେଶ୍ୱରଜୀଉ ଓ କାମିନୀଙ୍କୁ ବିବାହ କରାଇଥିଲେ। କେବଳ ଚନ୍ଦନେଶ୍ୱର ମହାଦେବଙ୍କ ଶ୍ରେଷ୍ଠଭକ୍ତ ପାଟଭକ୍ତ, ଦେଉଳିଆ, ଶ୍ରୀବେକିଡ଼ି (ତିନି ଉପବୀତଧାରୀ ଭକ୍ତ) ସହିତ ମାଳାକାର, ସେବାୟତଙ୍କ ଦ୍ୱାରା ଚନ୍ଦନେଶ୍ୱର ମହାଦେବଙ୍କ ଗର୍ଭଗୃହ ମଧ୍ୟରେ ନୀତିକାନ୍ତି ପୂଜାପାଠରେ ସମାପନ ହୋଇଛି। ଏହି ବିବାହରେ ପୂର୍ବଭଳି ଶାହାନାଈ ବାଜିନି କି ଆତସବାଜି ପ୍ରଦର୍ଶନ କରାଯାଇନି। ସେବାୟତ, ଟ୍ରଷ୍ଟବୋର୍ଡ଼ର ସଦସ୍ୟ, ଭକ୍ତ ସାମାଜିକ ଦୂରତା ରକ୍ଷା କରି ନୀତିକାନ୍ତି ପୂଜାରେ ମହାଦେବଙ୍କୁ ଆରାଧନା କରିଥିଲେ। ଆସନ୍ତା ଶନିବାର ‘ମହାନୀଳ ପର୍ବ’ ଓ ରବିବାର ପ୍ରସିଦ୍ଧ ପାଟ ଉତ୍ସବ ସାମାଜିକ ଦୂରତା ରକ୍ଷା କରି ବିଧିରକ୍ଷା ପାଳନ ବୋଲି ଟ୍ରଷ୍ଟବୋର୍ଡ଼ ପକ୍ଷରୁ ସୂଚନା ଦିଆଯାଇଛି।
