ଭୁବନେଶ୍ୱର, ୫ା୨(ବ୍ୟୁରୋ): ରାଜ୍ୟର ସମସ୍ତ ବସ୍ଷ୍ଟାଣ୍ଡଗୁଡ଼ିକର ଉନ୍ନତୀକରଣ ହେବ। ସେଠାରେ ଶପିଂ ମଲ୍ କରାଯିବାକୁ ଯୋଜନା ଥିବାବେଳେ ଆବଶ୍ୟକସ୍ଥଳେ ବଡ଼ ବସ୍ଷ୍ଟାଣ୍ଟଗୁଡ଼ିକରେ ମଲ୍ଟିପ୍ଲେକ୍ସର ବ୍ୟବସ୍ଥା ମଧ୍ୟ କରାଯିବ। ଜନସାଧାରଣଙ୍କୁ ଉତ୍ତମ ସେବା ଯୋଗାଇବାକୁ ଲକ୍ଷ୍ୟ ରଖି ବସ୍ଷ୍ଟାଣ୍ଡଗୁଡ଼ିକରେ ଏଭଳି ଅତ୍ୟାଧୁନିକ ସୁବିଧାସୁଯୋଗ ଯୋଗାଇ ଦିଆଯିବ। ଏଥିସହ ରାଜ୍ୟ ସରକାରଙ୍କ ଦ୍ୱାରା ଚାଲୁଥିବା ଓଏସ୍ଆର୍ଟିସି ବସ୍ ସଂଖ୍ୟା ବଢ଼ାଯିବା ସହ ସେଥିରେ ଆବଶ୍ୟକ ସମସ୍ତ ବ୍ୟବସ୍ଥା ରହିବ। ଭୁବନେଶ୍ୱର, କଟକ ଓ ଖୋର୍ଦ୍ଧାରେ ଚାଲୁଥିବା ‘ମୋ ବସ୍’ ପରି ଓଏସ୍ଆରଟିସିର ବସ୍ଗୁଡ଼ିକରେ ଜନସାଧାରଣଙ୍କୁ ଉତ୍ତମ ସେବା ଯୋଗାଇବା ଦିଗରେ ପଦକ୍ଷେପ ନିଆଯିବ ବୋଲି ପଞ୍ଚାୟତିରାଜ, ପାନୀୟ ଜଳ ଯୋଗାଣ, ଆଇନ, ଗୃହ ଏବଂ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା କହିଛନ୍ତି।
‘ମୋ ବସ୍’ ସେବା ଯୋଗାଉଥିବା କ୍ରୁଟ୍ ଏବଂ ଜର୍ମାନୀ ସଂସ୍ଥା ଜିଆଇଜେଡ୍ର ମିଳିତ ଉଦ୍ୟମରେ ଓଡ଼ିଶାର ପରିବହନ ସେବାର ସୁଗମ ପରିଚାଳନାକୁ ନେଇ ଭୁବନେଶ୍ୱରଠାରେ ଦୁଇଦିନିଆ କାର୍ଯ୍ୟକ୍ରମ ‘ମୋବିଲଗ୍’ ଆରମ୍ଭ ହୋଇଛି। ବୁଧବାର ଭିଏସ୍ଏସ୍ନଗରସ୍ଥିତ ଏକ ହୋଟେଲରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ମନ୍ତ୍ରୀ ଜେନା କହିଲେ, ‘ମୋ ବସ’ ଭଲ ସେବା ଯୋଗାଇ ଖୁବ୍ କମ୍ ଦିନରେ ଲୋକଙ୍କ ବିଶ୍ୱାସ ଭାଜନ ହୋଇପାରିଛି। ଆଗାମୀ ଦିନରେ ମୋ ବସ୍ ପରି ଓଏସ୍ଆର୍ଟିସି ସେବାକୁ ମଧ୍ୟ ଅଧିକ ସମୃଦ୍ଧ କରାଯିବାକୁ ଲକ୍ଷ୍ୟ ରଖାଯାଇଛି ବୋଲି ସେ କହିଥିଲେ।
କ୍ରୁଟ୍ର ପରିଚାଳନା ନିର୍ଦ୍ଦେଶକ ଅରୁଣ ବୋଥ୍ରା କହିଥିଲେ, ବର୍ତ୍ତମାନ କଟକ, ଭୁବନେଶ୍ୱର ଓ ଖୋର୍ଦ୍ଧାର ୨୧ ରୁଟ୍ରେ ଦୈନିକ ୨୦୦ ‘ମୋ ବସ୍’ ଯାତାୟତ କରୁଛି। ‘ମୋ ବସ୍’ର ଉନ୍ନତ ସେବା ପାଇଁ କେନ୍ଦ୍ର ସରକାର ରାଜ୍ୟକୁ ପ୍ରଶଂସା କରିଛନ୍ତି। ଚଳିତବର୍ଷଠାରୁ ମୋବସ୍ର ରୁଟ୍କୁ ବଢ଼ାଯିବା ସହ ଆଉ ୧୩୯ ମୋ ବସ୍ ଓ ୫୦ ଇ-ବସ୍ ଚଳାଚଳ ଆରମ୍ଭ କରିବ। ଓଏସ୍ଆରଟିସି ଓ କ୍ରୁଟ କିଭଳି ଭାବେ ରାଜ୍ୟରେ ଉନ୍ନତ ବସ୍ ସେବା ଯୋଗାଇବା କ୍ଷେତ୍ରରେ କାର୍ଯ୍ୟ କରିବେ ତାହା ଉପରେ ଆଲୋଚନା କରିଥିଲେ। ଦୈନିକ ୧ଲକ୍ଷ ୫୦ ହଜାର ଯାତ୍ରୀ ଛୁଇଁବା ‘ମୋ ବସ’ର ଆଗାମୀ ଲକ୍ଷ୍ୟ ବୋଲି ବୋଥ୍ରା କହିଥିଲେ। ଜିଆଇଜେଡ୍ର ବରିଷ୍ଠ ଅଧିକାରୀ ଲଘୁ ପରାସର, କ୍ରୁଟ୍ର ଜିଏମ୍ ଦିପ୍ତୀ ମହାପାତ୍ର ଏ ସଂକ୍ରାନ୍ତରେ ନିଜର ମତ ରଖିଥିଲେ। କ୍ରୁଟ୍, ଓଏସ୍ଆରଟିସି ସମେତ ଗଞ୍ଜାମ, ସମ୍ବଲପୁର, ରାଉରକେଲାର ୧୨୦ଜଣ ପରିବହନ ଅଧିକାରୀ ଯୋଗଦେଇଥିଲେ।
