ବେତନଟୀ,୯ା୫(ଡି.ଏନ୍.ଏ.)- ୨୦୧୯ରେ ସାମୁଦ୍ରିକ ଝଡ଼ ‘ଫନି’ ପ୍ରଭାବରେ ବ୍ୟାପକ କ୍ଷୟକ୍ଷତି ହୋଇଥିଲା। ଏହାକୁ ଦୃଷ୍ଟିରେ କ୍ଷତିଗ୍ରସ୍ତମାନଙ୍କୁ ସରକାରଙ୍କ ପକ୍ଷରୁ ସହାୟତା ରାଶି ବଣ୍ଟନ କରାଯାଇଥିଲା। ମୟୂରଭଞ୍ଜ ଜିଲା ବେତନଟୀ ବ୍ଲକ ମୁକ୍ତାପୁର ପଞ୍ଚାୟତ ଅଧୀନ ଛଚିନାପଦା ଓ ଛୋଟରାୟପୁର ଗ୍ରାମର କୁମ୍ଭକାରମାନେ ସେହି ସମୟରେ ସହାୟତା ପାଇବା ପାଇଁ ଆବେଦନ କରିଥିଲେ। ଏହି ଆବେଦନ ବେତନଟୀ ବ୍ଲକର ଶିଳ୍ପ ବିକାଶ ଅଧିକାରୀ ମନୋରଞ୍ଜନ ପାତ୍ରଙ୍କ ଜରିଆରେ ହୋଇଥିଲା ବେଳେ ବର୍ଷକ ପରେ ୨୦୨୦ରେ ଆବେଦନକାରୀଙ୍କୁ ସହାୟତା ରାଶି ମିଳିଛି। ମାତ୍ର ଏହି ସହାୟତା ରାଶି ଗ୍ରାମର ଅଳ୍ପ ସଂଖ୍ୟକ ଗ୍ରାମବାସୀଙ୍କୁ ୮ ହଜାର ୨ଶହ ଟଙ୍କା ଲେଖାଏଁ ମିଳିଥିବା ବେଳେ ବହୁ ଗ୍ରାମବାସୀ ଏଥିରୁ ବଞ୍ଚିତ ହୋଇଛନ୍ତି। ଏହାର ପ୍ରତିବାଦରେ ଶୁକ୍ରବାର ମୁକ୍ତାପୁର ପଞ୍ଚାୟତରୁ ଶତାଧିକ କୁମ୍ଭକାର ଯୁବନେତା ବିଶ୍ୱନାଥ ହେମ୍ବ୍ରମଙ୍କ ନେତୃତ୍ୱରେ ବ୍ଲକ ଶିଳ୍ପ ବିକାଶ କାଯର୍ୟାଳୟକୁ ଦୀର୍ଘସମୟ ଧରି ଘେରାଉ କରି ରଖିଥିଲେ। ଶତାଧିକ ଗ୍ରାମବାସୀଙ୍କ ଉପସ୍ଥିତିରେ ଏଥିପାଇଁ ଏକ ଲଖିତ ଅଭିଯୋଗ କାର୍ଯ୍ୟାଳୟର ଅଧିକାରୀଙ୍କୁ ପ୍ରଦାନ କରାଯାଇଥିଲା। ଯୁବନେତା ହେମ୍ବ୍ରମ ସମସ୍ତଙ୍କ ଉପସ୍ଥିତିରେ ଶିଳ୍ପ ବିକାଶ ଅଧିକାରୀଙ୍କ ସହିତ ଦୀର୍ଘ ସମୟ ଆଲୋଚନା କରିବା ପରେ ବ୍ଲକ ଘେରାଉ ପ୍ରତ୍ୟାହୃତ ହୋଇଥିଲା। ଏ ସମ୍ପର୍କରେ ଶିଳ୍ପ ବିକାଶ ଅଧିକାରୀ ପାତ୍ରଙ୍କୁ ପଚାରିବାରୁ ବଞ୍ଚିତ ହିତାଧିକାରୀମାନଙ୍କୁ ସରକାରଙ୍କ ଦ୍ୱାରା ଧାର୍ଯ୍ୟ ଅନ୍ୟ ସହାୟତା ରାଶି ପ୍ରଦାନ କରିବା ପାଇଁ ଉଦ୍ୟମ କରୁଛି ଓ ଅନ୍ଲାଇନରେ ଆବେଦନ କରି ନ ଥିବା ହିତାଧିକାରୀ ଫନି ସହାୟତାରୁ ବଞ୍ଚିତ ହୋଇଛନ୍ତି ବୋଲି ସେ କହିଛନ୍ତି।
