ବରଗଡ଼ ଅଫିସ୍,୨୭।୪: ବରଗଡ଼ ଜିଲା ପଦ୍ମପୁର ଉପଖଣ୍ଡ ଦହିଗାଁ ପଞ୍ଚାୟତର ବୁବୁଡ଼ାରେ ୨୪ଜଣ ଶ୍ରମିକ ଅସହାୟ ଅବସ୍ଥାରେ ଫସି ରହିଛନ୍ତି । ସେମାନେ ଛତିଶଗଡ଼ର ମୂଳ ବାସିନ୍ଦା ହୋଇଥିବାବେଳେ ଇଟା ଗଢ଼ିବାକୁ ଏଠାକୁ ଆସିଥିଲେ । ସେଠାରେ ଝାଟିମାଟି କୁଡ଼ିଆଟିଏ କରି ସେମାନେ ଇଟା ଗଢ଼ିବା ସହିତ ନିଜ ଜୀବନଯାପନ କରୁଥିଲେ । ମାତ୍ର ଲକ୍ ଡାଉନ୍ କଟକଣା ଲାଗୁ ହେବା ପରେ ସେମାନଙ୍କ ରୋଜଗାର ବନ୍ଦ ହୋଇ ଯାଇଛି । ସେମାନଙ୍କ ପାଖକୁ ଏ ପର୍ଯ୍ୟନ୍ତ ପ୍ରଶାସନ ପକ୍ଷରୁ କିଛି ସହାୟତା ପହଞ୍ଚି ପାରି ନାହିଁ । ଏହି ସୂଚନା ପାଇବା ପରେ ବରଗଡ଼ର ରଞ୍ଜିତା ପ୍ରିୟଦର୍ଶିନୀ ଅସହାୟ ଶ୍ରମିକଙ୍କୁ ସହଯୋଗ କରିବା ପାଇଁ ଶ୍ରମ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ, ଆଇଜି ଅମିତାଭ ଠାକୁର ପ୍ରମୁଖଙ୍କୁ ନିବେଦନ କରିଛନ୍ତି।
