ଭୁବନେଶ୍ୱର, ୨୬ା୬(ବ୍ୟୁରୋ): ଫ୍ଲାଟ ଦେବାକୁ କହି ଏକ ବିଲ୍ଡର ସଂସ୍ଥା ଜଣେ ମର୍ଚ୍ଚାଣ୍ଟ ନାଭି ଅଫିସରଙ୍କଠାରୁ ୭୧ ଲକ୍ଷ ଟଙ୍କା ଠକି ନେଇଛନ୍ତି। ଏନେଇ ‘ଓଡିଶା ହୋମ୍ ଆଣ୍ଡ କମର୍ସିଆଲ ନାମକ ଏକ ବିଲ୍ଡର ସଂସ୍ଥା ନାମରେ ନୟାପଲ୍ଲୀ ଥାନାରେ ଅଭିଯୋଗ ହୋଇଛି। ବାରମ୍ବାର ଅଭିଯୋଗସତ୍ତ୍ୱେ ପୋଲିସ ମାମଲା ରୁଜୁ କରୁ ନ ଥିଲା। ଅଭିଯୋଗକାରୀ ପ୍ରଫୁଲ୍ଲ କୁମାର ବେହେରା ପୋଲିସ କମିଶନର ସତ୍ୟଜିତ ମହାନ୍ତିଙ୍କୁ ଭେଟିବା ପରେ ଥାନା ପୋଲିସ ସଂସ୍ଥାର ଏମ୍ଡି ମନୋଜ କୁମାର ପଣ୍ଡା, ସରୋଜ କୁମାର ପଣ୍ଡା ଓ ଅରବିନ୍ଦ ସାନ୍ତରାଙ୍କ ନାମରେ ଆଇପିସି ଦଫା ୪୨୦ ଓ ୩୪ ଅନୁଯାୟୀ ଏକ ମାମଲା (ନଂ.୨୭୯/୧୯) ରୁଜୁ କରି ତଦନ୍ତ ଚଳାଇଛି। ଗତ ୧୩ ତାରିଖରୁ ମାମଲା ରୁଜୁ ହୋଇଥିଲେ ମଧ୍ୟ ପୋଲିସ ତୁରନ୍ତ ପଦକ୍ଷେପ ଗ୍ରହଣ ନ କରିବାରୁ ଅଭିଯୁକ୍ତମାନେ ଫେରାର ହେବା ସହ ହାଇକୋର୍ଟରୁ ଆଗୁଆ ଜାମିନ ପାଇଁ ଯୋଜନା କରୁଥିବା ପ୍ରଫୁଲ୍ଲ କହିଛନ୍ତି।
ମିିଳିଥିବା ସୂଚନାନୁସାରେ, ନୟାପଲ୍ଲୀ ଥାନା ଆଇଆର୍ସି ଭିଲେଜ ଭିଆଇପି କଲୋନୀସ୍ଥିତ ପ୍ଲଟ ନଂ-୧୫୬ରେ ରହିଛି ଉକ୍ତ ବିଲ୍ଡର ସଂସ୍ଥା। ଜୟଦେବ ବିହାର ନିକଟରେ ରୁହନ୍ତି ଅଭିଯୋଗକାରୀ ପ୍ରଫୁଲ୍ଲ କୁମାର ବେହେରା। ତାଙ୍କ ପୁଅ ସିଙ୍ଗାପୁରରେ ମର୍ଚ୍ଚାଣ୍ଟ ନାଭିରେ ଚାକିରି କରନ୍ତି। ପୁଅ ପ୍ରଶାନ୍ତ ଫ୍ଲାଟ୍ କିଣିବାକୁ ସଂସ୍ଥା ସହ ଯୋଗାଯୋଗ କରିଥିଲେ। ୨୦୧୪ରେ ସଂସ୍ଥା ତାଙ୍କୁ କଳିଙ୍ଗ ଷ୍ଟୁଡିଓ ଛକ ନିକଟରେ ହେଉଥିବା ଏକ ପ୍ରୋଜେକ୍ଟରେ ଫ୍ଲାଟ ଦେବାକୁ କହି ୫୭ ଲକ୍ଷ ଟଙ୍କା ନେଇଥିଲା। ୨୦୧୫ ଶେଷ ହୋଇଯାଇଥିଲେ ମଧ୍ୟ ସଂସ୍ଥା ତାଙ୍କୁ ଫ୍ଲାଟ ଦେଇପାରି ନ ଥିଲା। ଟଙ୍କା ଫେରାଇବାକୁ ପ୍ରଶାନ୍ତ କହିବାରୁ ରସୁଲଗଡରେ ହେଉଥିବା ଆଉ ଏକ ପ୍ରୋଜେକ୍ଟରେ ଘର ଦେବ ବୋଲି ସଂସ୍ଥା କହିଥିଲା। ଏଥିପାଇଁ ଆହୁରି ୧୪ ଲକ୍ଷ ଟଙ୍କା ନେଇଥିଲେ ମଧ୍ୟ ଘର ଦେଇପାରି ନ ଥିଲେ। ସଂସ୍ଥାର ନିର୍ଦ୍ଦେଶକ ଓ ଅନ୍ୟମାନେ ଧରାଛୁଆଁ ନ ଦେବାରୁ ଗତ ୪ ମାସ ତଳେ ଥାନାରେ ଅଭିଯୋଗ କରିଥିଲେ। ତତ୍କାଳୀନ ଥାନାଧିକାରୀ ଉମାକାନ୍ତ ପ୍ରଧାନ ବିଲ୍ଡରଙ୍କୁ ଥାନାକୁ ଡାକିଥିଲେ। ହେଲେ ସେ ନିଜେ ନ ଆସି ଅନ୍ୟ ଜଣଙ୍କୁ ପଠାଇ ଟଙ୍କା ଫେରାଇବାକୁ କହି ଚେକ୍ ଧରାଇ ସମୟ ନେଇଥିଲେ। ପରେ ଉକ୍ତ ଚେକ୍ ବାଉନ୍ସ ହୋଇଯାଇଥିଲା। ଏହାପରେ ପୁଣି ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ କିଛି ଶୁଣି ନ ଥିଲା। ପ୍ରଶାନ୍ତ ଚାକିରି କରୁଥିବାରୁ ବାପା ପ୍ରଫୁଲ୍ଲ ଥାନାକୁ ଦୌଡିବା ପରେ ଶେଷରେ ପୋଲିସ କମିଶନର ସତ୍ୟଜିତ୍ ମହାନ୍ତିଙ୍କୁ ଭେଟି ଜଣାଇଥିଲେ। ପୋଲିସ କମିଶନରଙ୍କ ନିର୍ଦ୍ଦେଶ ପରେ ନୟାପଲୀ ଥାନା ଅଧିକାରୀ ସଂପୃକ୍ତ ବିଲ୍ଡରଙ୍କ ନାମରେ ମାମଲା ରୁଜୁ କରିଛନ୍ତି। ଏନେଇ ଥାନା ଅଧିକାରୀ ଅରୁଣ କୁୁମାର ସ୍ବାଇଁ କହିଛନ୍ତି,ଏନେଇ ଆମେ ଏକ ମାମଲା ରୁଜୁ କରି ତଦନ୍ତ କରୁଛୁ। ଏ ସଂକ୍ରାନ୍ତ କାଗଜପତ୍ର ଯାଞ୍ଚ କରାଯାଉଛି। ଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ।
