ନୂଆଦିଲ୍ଲୀ,୧ା୫- ଟେଷ୍ଟ ହେଉ କିମ୍ବା ଦିନିକିଆ କ୍ରିକେଟ, ସଚିନ ତେନ୍ଦୁଲକର ଓ ଶେନ ୱର୍ନଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିିତା ବେଶ୍ ଚର୍ଚ୍ଚିତ। ଦିନଥିଲା ସଚିନ-ୱର୍ନ ମୁକାବିଲା ଦେଖିବାକୁ ଦର୍ଶକମାନେ ଉତ୍କଣ୍ଠାର ସହ ଅପେକ୍ଷା କରୁଥିଲେ। ୧୯୯୮ ସିରିଜର କଥା । ଏକ ଟେଷ୍ଟରେ ମାତ୍ର ୪ରନ କରି ୱର୍ନଙ୍କ ବଲ୍ରେ ଆଉଟ ହେବାପରେ ସଚିନ ନିଜକୁ ଦୀର୍ଘ ସମୟ ଫିଜିଓଙ୍କ ରୁମ୍ରେ ନିଜକୁ ବନ୍ଦକରି ରଖିଥିଲେ । ପରବର୍ତ୍ତୀ ଇନିଂସରେ ସେ ଚମତ୍କାର ଖେଳିଥିଲେ। ଅତୀତକୁ ମନେପକାଇ ଏହା ପ୍ରକାଶ କରିଛନ୍ତି ସଚିନଙ୍କ ପୂର୍ବତନ ଟିମ୍ମେଟ୍ ତଥା କ୍ରିକେଟ ଭାଷ୍ୟକାର ଭିଭିଏସ୍ ଲକ୍ଷ୍ମଣ। ୧୯୯୮ରେ ମାର୍କ ଟେଲରଙ୍କ ଅଷ୍ଟ୍ରେଲିଆ ଭାରତ ଭ୍ରମଣରେ ଆସିଥାଏ। ଏହି ସିରିଜରେ ଚର୍ଚ୍ଚାର ଶିରୋନାମାରେ ରହିଥିଲେ ବିଶ୍ୱର ଆଗଧାଡ଼ିର ବ୍ୟାଟ୍ସମ୍ୟାନ ସଚିନ ଓ ଚମତ୍କାରୀ ବୋଲର ୱର୍ନ। ସେତେବେଳେ ମହମ୍ମଦ ଆଝାରୁଦ୍ଦିନଙ୍କ ନେତୃତ୍ୱାଧୀନ ଭାରତ ଘରୋଇ ପରିବେଶରେ ବେଶ୍ ପ୍ରଭାବୀ ପ୍ରଦର୍ଶନ କରୁଥାଏ। ୧୯୮୭ରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନଠାରୁ ହାରିବାପରେ ଘରୋଇ ପରିବେଶରେ ଭାରତକୁ ଆଉ କୌଣସି ଦଳ ହରାଇପାରି ନ ଥାନ୍ତି। ୧୯୯୬ରେ ଟେଲରଙ୍କ ଅଷ୍ଟ୍ରେଲିଆ ଭାରତ ଆସି ନୂଆଦିଲ୍ଲୀରେ ଏକ ଟେଷ୍ଟ ଖେଳିଥିଲେ ହେଁ ପରାଜିତ ହୋଇଥିଲା। ତେଣୁ ୧୯୯୮ ସିରିଜ ମୁଖ୍ୟତଃ ୱର୍ନଙ୍କ କୌଶଳ ଓ ସଚିନଙ୍କ ଅସାଧାରଣ ବ୍ୟାଟିଂ ଉପରେ ପର୍ଯ୍ୟବସିିତ ଥିଲା। ପ୍ରଥମ ଟେଷ୍ଟ ଚେନ୍ନାଇର ଚେପକ୍ରେ ଖେଳାଯାଇଥିଲା। ଭାରତର ଟପ୍-୩ ବ୍ୟାଟ୍ସମ୍ୟାନ ଭଲ ଖେଳି ଅର୍ଦ୍ଧଶତକ ହାସଲ କଲାପରେ ସଚିନଙ୍କ ଉପରେ ସମସ୍ତଙ୍କ ନଜର ରହିଥିଲା। ୱର୍ନଙ୍କ ବଲ୍ରେ ଚୌକା ମାରି ସଚିନ ଇନିଂସ ଆରମ୍ଭ କରିଥିଲେ। ମାତ୍ର ପରବର୍ତ୍ତୀ ବଲ୍କୁ ମିଡ୍ଅନ୍ ଉପରେ ବଡ଼ ଶଟ୍ ମାରିବା ଚକ୍କରରେ ମାର୍କ ଟେଲରଙ୍କ ଦ୍ୱାରା କ୍ୟାଚ ହୋଇ ପ୍ୟାଭିଲିୟନ ଫେରିଥିଲେ। ଏହାକୁ ସହଜରେ ହଜମ କରିପାରି ନ ଥିଲେ ସଚିନ। ସେ ପଡ଼ିଆରୁ ଆସି ସିଧା ଫିଜିଓଙ୍କ ରୁମ୍ରେ ନିଜକୁ ବନ୍ଦକରି ରଖିଥିଲେ। ପାଖାପାଖି ୧ଘଣ୍ଟା ପରେ ସେଠାରୁ ବାହାରିବା ବେଳକୁ ତାଙ୍କ ଆଖି ଲାଲ ହୋଇଯାଇଥିଲା। ଭାବପ୍ରବଣ ହୋଇ ପଡ଼ିଥିବା ସଚିନ ଏପରି ଆଉଟ୍ରେ ଖୁସି ନ ଥିଲେ। ଅଷ୍ଟ୍ରେଲିଆ ପ୍ରଥମ ଇନିଂସରେ ଅଗ୍ରଣୀ ନେଇଥିବାରୁ ଭାରତ ଦ୍ୱିତୀୟ ଇନିଂସରେ ବଡ଼ ସ୍କୋର କରିବା ଆବଶ୍ୟକ ହେଉଥିଲା। ନିଜ ତ୍ରୁଟିକୁ ବୁଝିପାରିଥିବା ସଚିନ ଖେଳିଥିଲେ ଅନ୍ୟତମ ଶ୍ରେଷ୍ଠ ଇନିଂସ। ସେ ୱର୍ନ ଏବଂ ଅନ୍ୟ ବୋଲରଙ୍କ ବଲ୍କୁ ପଡ଼ିଆର ଚତୁର୍ଦ୍ଦିଗକୁ ଶଟ୍ମାନ ମାରି ୧୫୫ ରନରେ ଅପରାଜିତ ରହିଥିଲେ। ୱର୍ନଙ୍କ ସମସ୍ତ କୌଶଳ ସଚିନଙ୍କ ଆଗରେ ଫେଲ୍ ମାରିଥିଲା। ପରେ ଅନୀଲ କୁମ୍ବଲେ ଓ ଭେଙ୍କଟପତି ରାଜୁଙ୍କ କ୍ବାଲିଟି ସ୍ପିନକୁ ମୁକାବିଲା କରି ନ ପାରି ଅଷ୍ଟ୍ରେଲିଆ ଦ୍ୱିତୀୟ ଇନିଂସରେ ଶୀଘ୍ର ଆଉଟ ହୋଇ ଯାଇଥିଲା। ଭାରତ ଏହି ଟେଷ୍ଟ ଓ ସିରିଜ ଜିତିଥିଲା। ”ମୁଁ ଦେଖିବାରେ ସଚିନ-ୱର୍ନଙ୍କ ମଧ୍ୟରେ ଏହା ସବୁଠାରୁ ଶ୍ରେଷ୍ଠ ଲଢ଼େଇ ଥିଲା“ ବୋଲି କହିଛନ୍ତି ଲକ୍ଷ୍ମଣ।