ଧର୍ମଶାଳା,୧୯ା୫(ପି.ଟି.): ଆଇପିଏଲ୍ର ଜଟିଳ ପ୍ଲେ ଅଫ୍ ଅଙ୍କକଷା ମଧ୍ୟରେ ନିଜର ଅନ୍ତିମ ମ୍ୟାଚ୍ ଖେଳିବେ ରାଜସ୍ଥାନ ରୟାଲ୍ସ ଓ ପଞ୍ଜାବ କିଙ୍ଗ୍ସ। ଉଭୟ ଦଳର ପ୍ରଦର୍ଶନ ଅସ୍ଥିର ରହିଛି। ଅନ୍ତିମ ମ୍ୟାଚରେ ଉଭୟ ଦଳ ପରସ୍ପରକୁ ଭେଟୁଥିବା ବେଳେ ଏହି ମ୍ୟାଚ୍ ଜିତି ପ୍ଲେ ଅଫ୍ର ସାମାନ୍ୟ ସମ୍ଭାବନା ବଜାୟ ରଖିବାକୁ ଚେଷ୍ଟା କରିବେ। ଉଭୟ ଦଳ ୧୩ ମ୍ୟାଚ୍ ଖେଳି ୬ ବିଜୟ ସହିତ ୧୨ ପଏଣ୍ଟ ହାସଲ କରିଛନ୍ତି। କୌଣସି ଦଳ ବିଜୟ ହେଲେ ୧୪ ପଏଣ୍ଟ ସହିତ ଏହା ଅନ୍ୟ ମ୍ୟାଚ୍ର ଫଳାଫଳ ଉପରେ ନିର୍ଭର କରିବ। ପଞ୍ଜାବ କିଙ୍ଗ୍ସର ବୋଲିଂ ବିଭାଗ ବେଶ୍ ଦୁର୍ବଳ ରହିଥିବା ବେଳେ ରାଜସ୍ଥାନ ଉଭୟ ବ୍ୟାଟିଂ ଓ ବୋଲିଂରେ ଦୁର୍ବଳ ପ୍ରଦର୍ଶନ କରିଛି। ପଞ୍ଜାବ ନିକଟରେ କାଗିସୋ ରାବାଡା, ଅର୍ଶଦୀପ ସିଂ ଓ ସାମ୍ କୁରାନଙ୍କ ଭଳି ବୋଲର ରହିଥିଲେ ହେଁ ଦଳ ଏହାର ଫାଇଦା ଉଠାଇ ପାରିନାହିଁ। ୩ ବୋଲରଙ୍କ ଇକୋନୋମି ୧୦ ଉପରେ ରହିଛି, ଯାହାକି ଚିନ୍ତାଜନକ। ଅନ୍ୟପକ୍ଷରେ ଟୁର୍ନାମେଣ୍ଟର ଅଧା ଯାଏ ପର୍ପଲ କ୍ୟାପ ଦୌଡରେ ରହିଥିବା ଅର୍ଶଦୀପଙ୍କ ବୋଲିଂ ଏତେଟା ପ୍ରଭାବଶାଳୀ ରହିନାହିଁ। ରାବାଡା ନିଜ କ୍ୟାରିୟରର ଶ୍ରେଷ୍ଠ ଫର୍ମରେ ନ ଥିବା ବେଳେ ସାମ୍ କୁରାନ୍ଙ୍କ ପ୍ରଦର୍ଶନରେ ମଧ୍ୟ ସ୍ଥିରତା ନାହିଁ। ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚରେ ହରପ୍ରୀତ ବ୍ରାରଙ୍କୁ ମ୍ୟାଚ୍ର ଅନ୍ତିମ ଓଭର ପକାଇବାକୁ ଦେଇଥିଲେ ଶିଖର ଧାଓ୍ବନ। ଏହି ଓଭରରେ ୨୦ ରନ୍ ବ୍ୟୟ କରିବା ମ୍ୟାଚରେ ନିର୍ଣ୍ଣାୟକ ସାବ୍ୟସ୍ତ ହୋଇଥିଲା। ସେହିପରି ଶିଖର ଧାଓ୍ବନଙ୍କ ବ୍ୟାଟ୍ ମଧ୍ୟ ନୀରବ ରହିଛି। ଅନ୍ୟପକ୍ଷରେ ରାଜସ୍ଥାନ ରୟାଲ୍ସ ଟୁର୍ନାମେଣ୍ଟ ଆରମ୍ଭରୁ ବେଶ୍ ଶକ୍ତିଶାଳୀ ଦଳ ମନେହେଉଥିଲା। ପ୍ରଥମ ୫ ମ୍ୟାଚରୁ ୪ଟିରେ ବିଜୟୀ ହୋଇଥିଲା ଦଳ। ୟୁଜବେନ୍ଦ୍ର ଚହଲ ଓ ଯଶସ୍ବୀ ଜୟସ୍ବାଲଙ୍କ ପରି ଖେଳାଳି ବ୍ୟକ୍ତିଗତ ଭାବରେ ମଧ୍ୟ ଶ୍ରେଷ୍ଠ ପ୍ରଦର୍ଶନ ଦେବାରେ ସମର୍ଥ ହୋଇଥିଲେ। ତେବେ କିଛି ସଂଘର୍ଷପୂର୍ଣ୍ଣ ମ୍ୟାଚ୍ ହାରିବା ରୟାଲ୍ସକୁ ମହଙ୍ଗା ପଡିଥିଲା। ଜୋସ୍ ବଟଲର ଚଳିତ ସିଜନ ଦୃଢ ଭାବରେ ଆରମ୍ଭ କରିଥିବା ବେଳେ ପରେ ସମାନ ବ୍ୟାଟିଂ ନଜର ଆସି ନ ଥିଲା। ବୋଲିଂରେ ଆର. ଅଶ୍ୱିନ୍, ଚହଲ, ଟ୍ରେଣ୍ଟ ବୋଲ୍ଟ ଓ ସନ୍ଦୀପ ଶର୍ମାଙ୍କ ପ୍ରଦର୍ଶନ ମଧ୍ୟ ଠିକ୍ଠାକ ରହିଛି।
