ବିକାନେର,୯ା୩: ରାଜସ୍ଥାନର ବିକାନେ ଜିଲା ନୋଖାରେ ରବିବାର ୪ ଜଣ ବ୍ୟକ୍ତିଙ୍କ ଉପରେ ପୋଟ୍ରୋଲ ଢାଳି ଜାଳିଦେବା ଭଳି ଅଭାବନୀୟ କାଣ୍ଡ ସାମ୍ନାକୁ ଆସିଛି। ନିଆଁରେ ପୋଡ଼ି ହୋଇଯିବା ପରେ ସେମାନଙ୍କ ମଧ୍ୟରୁ ୨ ଜଣ ଜୀବନ ସହ ସଂଘର୍ଷ କରୁଛନ୍ତି।
୪ ଜଣ ଯୁବକ ଏକ ଜିପ୍ରେ ଯାଉଥିବାବେଳେ ନୋଖା ଥାନା ପଛପଟ ରାସ୍ତାରେ ୭ରୁ ୮ ଜଣ ଦୁର୍ବୃତ୍ତ ସେମାନଙ୍କୁ ଅଟକାଇଥିଲେ। ଦୁର୍ବୃତ୍ତମାନେ ଉକ୍ତ ଜିପ୍ରେ ପୋଟ୍ରୋଲ ଢାଳି ନିଆଁ ଲଗାଇଦେଇଥିଲେ। ଯୁବକମାନେ ଜିପ୍ରୁ ତଳକୁ ଓହ୍ଲାଇଆସିବାରେ ସକ୍ଷମ ହୋଇଥିଲେ। ସେମାନଙ୍କୁ ସ୍ଥାନୀୟ ଲୋକେ ପିବିଏମ୍ ସରକାରୀ ହସ୍ପିଟାଲରେ ଭର୍ତ୍ତି କରିଥିଲେ। ଶାନ୍ତି ଲାଲ ଓ ଅଜିତ ସିଂ ନାମକ ଦୁଇ ଯୁବକଙ୍କ ଅବସ୍ଥା ସଙ୍କଟାପନ୍ନ ରହିଛି। ପୂର୍ବ ଶତ୍ରୁତାକୁ କେନ୍ଦ୍ରକରି ଦୁର୍ବୃତ୍ତମାନେ ଏପରି କାଣ୍ଡ ଭିଆଇଥିବା ବିକାନେର ଏସ୍ପି ପ୍ରଦୀପ ମୋହନ ଶର୍ମା ସୂଚନା ଦେଇଛନ୍ତି। ଏସ୍ପି କହିଛନ୍ତି, ଅଜିତ ଓ ଅନ୍ୟମାନେ କିଛିଦିନ ତଳେ ନୋଖା ନିକଟସ୍ଥ ଉଗମସର ଗ୍ରାମର ଜଣେ ବ୍ୟକ୍ତିଙ୍କୁ ମାଡ଼ ମାରିଥିଲେ। ଏହାର ପ୍ରତିଶୋଧ ନେବାକୁ ଯାଇ ସେମାନେ ଏପରି କରିଛନ୍ତି। ୪ ଜଣ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି। ସେମାନେ ହେଲେ ସୁରେଶ ବିଷ୍ଣୋଇ, ଗୋବିନ୍ଦ ଡାନ, ରାହୁଲ ଓ ରଓ୍ବେନ୍ତ। ଇତିମଧ୍ୟରେ ସ୍ଥାନୀୟ ଭାଜପା ଏମ୍ପି ବିହାରୀ ଲାଲ ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ଦାବି କରିଛନ୍ତି।
